《足印》-從幼稚園開始，對你的心意原來一直是愛情-: 44
「嘩，係五月天嘅簽名相簿仔啊……點解佢會有嘅？」她一臉驚訝的問。
「佢話係演唱會嘅入場贈品嚟嘅，所以送一份畀你。」我如實交代。
「喔，原來係咁…發個訊息畀佢講聲多謝先…」阿柔說著這句話的同時，我留意到她臉上掠過一絲苦惱的樣子。
…是不喜歡嗎？
「唔鍾意？」我問。
「嗯？唔係啊…」她苦笑。
「咁點解…你睇落咁煩惱嘅？」…還有其他原因嗎？
阿柔招招手，示意我把耳朵伸向她嘴邊。
會意的我，馬上把耳朵靠近。
「你估下~估中咗就話你知~」阿柔小聲的笑說。
「又整蠱我！？」說著我便雙手捏住阿柔臉頰。
被我捏住的她反而笑得更大聲，打趣的做了個鬼臉，說：「學你咋傻佬，哈哈哈~」
對了，我也曾經像這樣作弄過她一次……當打個平手好了。
胡鬧了一輪，我見時候差不多，便走到廚房打算開始烹調。
我拿出剛剛購買的食材，準備著事前的功夫。
按照食譜所說，我先是將冬菇切粒並浸軟，隨即簡單醃製了一下免治豬肉。把芫荽及芹菜一同沖洗並切粒過後，我便加入少許生粉及幼鹽到蠔仔之中，慢慢沖洗並瀝乾。隨後，我將方魚烘到酥脆並盛起，放涼後便簡單的去皮去骨，撕成一片又一片小塊。
此時，阿柔走到我身旁，興致勃勃的問：「天仔！今晚食咩啊？」
「蠔仔粥啊，希望唔會整得唔好食啦。」我淺笑。
「喂吔……琴日咪食咗粥囉…」阿柔像個小女孩般，輕輕搖著我肩膀的撒嬌。
我苦笑一下，輕輕彈了彈她的額頭：「啱啱好返咋你，要戒下口，食得清淡啲先得架。聽話啦。」
「哎呀呀，知喇長氣佬！」阿柔輕碰我的鼻尖，甜笑說：「咁你要整得好食啲架喎！」
「我盡量啦。」我一邊笑說著、一邊拿出膠袋內的食材。
「加油喎！」她給了我個大拇指後，便一彈一跳的躺到沙發上看電視。
阿柔離開後，我也按著食譜的下一步指示繼續跟著做。由於事前功夫已經準備完成，接下來只剩最重要的粥底。
我先將清水放入大鍋內煲滾，隨即先後加入肉碎、蠔仔、冬菇一同煮五分鐘，最後加入芹菜、芫荽、白飯以大火煮滾，並適時加入適量鹽用作調味。待到粥底煮得軟綿綿之際，我便將其盛起並舀進碗內，再在粥面放上方魚乾。
大功告成。
阿柔不喜歡吃芹菜和芫荽，因此我故意把用作提升香味的這兩項配料一一夾起挑走，完成後才慢慢捧著兩碗熱騰騰的粥放到沙發前的桌上。
首次替你做晚餐，希望你會喜歡吧。
「食得喇，睇下。」我向阿柔招招手，笑說。
「睇過~」她滿臉笑容的看過來，看了一眼後舉起大拇指說道：「睇落賣相唔差喎！」
「方魚肉碎蠔仔粥，希望你會覺得好食啦。」我淺笑。
「呵呵，咁就要試下先喇~」阿柔拿起湯匙，大口的嘗了一口。
「覺得點…？」有點緊張呢…
阿柔嘗了一口後，過了一會兒都沒有作聲，只是一直微微的甜笑著。
只是為甚麼…這個笑容看上去好像帶點失落？
「呃……唔好食…？」我苦笑。
「唔係啊，幾好食啊。」她笑說。
「嗯……如果真係唔好食嘅話，可以講真話喎…」我不好意思的說。
「我講真架傻佬，真係好食啊。」阿柔再次對我舉起大拇指，說。
「哈…我見你食咗一啖之後就喺度笑，以為好難食添……」我撓著頭說。
「呵呵，畀多啲自信自己呀嘛。」阿柔對我戚戚眉，說：「咁不如…你估下點解我會笑啊？估中咗就話你知！」
「嗯…」我思考了一會，隨即說：「發呆傻笑？」
「錯~」
「賣相唔差？」
「錯~」
「比想像中好食？」
「都錯~」
「第一次食我煮嘅嘢所以開心？」
「啱一半~」
「投降。」我打趣的舉起雙手，苦笑。
「另外一半呢…係你特登挑起晒我唔鍾意食嘅芫荽同埋芹菜，」阿柔點點頭，甜笑的說：「見到你咁細心，我超開心囉。」
「喔……」奇怪了…我明明沒有告訴她啊。
我一臉疑惑的樣子被阿柔看見，逗得她哈哈大笑的戳住我臉頰：
「做咩啊傻佬，你當我未煮過蠔仔粥咩？我緊係知你有落芫荽芹菜調味啦。蠢~」
「係喎，你係五星級大廚嚟架喎。」我淺笑。
「十星級~」她打趣的笑說。
吃過粥、洗過碗，我便坐到阿柔旁邊一起看電視。
看到一半，阿柔突然把頭伏在我肩上，說：
「天仔啊…你未來呢，有啲咩打算咁啊…？」
「嗯……」我沉思了一會，說：「想努力讀好啲書，努力考好DSE，可以入到間好啲嘅大學，咁嘅話…未來可能會有多啲出路囉。」
這樣…我才可以更好的照顧你一生。
「哎呀呀…冇諗過會喺你口中聽到呢啲說話呢。」阿柔打趣的打量著我說。
「又笑我。」我輕力捏捏她臉頰，笑問：「咁你呢，有咩打算咁啊？」
過了一陣子，阿柔還是沒有回答。傻妹不會是又睡著了吧？
我見阿柔久沒回答，便探頭一看，這才驚覺她在我肩上小聲抽泣著。
「咩…咩事啊！？做咩喊啊…？」我連忙拿出紙巾，打算為她擦走臉上的眼淚。
阿柔哭得雙眼通紅，緊緊的抱住我腰間。
「做咩啊傻妹…」我一邊為她擦著眼淚、一邊輕撫著她的頭：「唔好喊啦，講我聽咩事得唔得啊？」
她也很安定，一動不動的給我擦著眼眶安慰著。
(3/7今日連登討論區嗰邊有個小互動，畀大家估下阿柔喊嘅原因，有人估中嘅話聽日嗰篇會加少少字數！有興趣就去嗰邊留個言擺低你嘅猜想啦！)