《足印》-從幼稚園開始，對你的心意原來一直是愛情-: 49
晚飯過後離開的那段路，由於阿峰與我們不同路，所以走到一半我們也與他分別。
走著走著，阿柔突然跟我討論起剛剛飯聚的話題：
「阿峰佢太心急想拍拖喇，」她搖搖頭，苦笑說：「反而唔知道咁樣咄咄逼人只會令到個女仔尷尬難堪。」
「緊係想同你拍拖啦，三大級花之一嘅阿柔喎，咁靚女~」我笑說。
「喂吔……又笑我…」阿柔輕輕搖著我肩膀。
「講笑咋，唔好嬲。」我摸摸她的頭，續說：「老實講…我都覺得佢急得滯。」
「咪係囉。唉…都唔明你哋啲男仔到底點諗嘅，」阿柔抱抱手，說：「連最基本嘅認識都未做足，點可以咁心急都有架……至少我一定唔會鍾意未清楚認識嘅人囉。」
「哈，如果我係個女仔，我應該都會咁諗。」我淺笑。
「咁……你又有冇…鍾意嘅女仔？」阿柔看著我，問。
我先是呆了一呆，不過馬上就反應過來。於是我招招手，示意她把耳朵伸過來。
「邊個…？」阿柔把耳朵伸到我嘴邊，問。
「這是個不能說的祕密~」為了配合剛才在餐廳聽到的歌曲劇情，我還故意說出自己十分普通的普通話。
「哎喲，不錯喔~」阿柔先是滿面笑容的看著我，隨即一秒變臉裝作一臉兇殘的對我起飛踢：「不錯你個頭啊！又整蠱我，去死啦你！！！」
「救命救命，投降！」我一邊嘗試擋著她的攻擊、一邊笑說。
哈哈，真是個傻妹。
回家的路途上，我和阿柔兩人都是慢慢的踱步著，可能剛剛吃得太多，有點吃撐了。走到樓下公園時，可能因為內心對阿柔的不捨，我不自覺的牽起了她的手，緩緩走到一旁的石椅坐下。
我們就這樣牽著手的，一起抬頭看著晚上的夜空。這裏的夜空當然不及東龍島的星空漂亮，但是我們都依然看得出神、看得目不暇給。
「天仔……答我啱啱個問題…」阿柔突然說。
「嗯？咩問題？」
「有冇鍾意嘅女仔啊…」
「……有啊。」就是你啊，傻妹。
「…」阿柔先是呆了一會，隨即才望向我，說：「講我知…？」
「咁你呢？」我望向她，轉移話題：「有冇鍾意嘅男仔啊？」
阿柔看著我，臉紅的點點頭。
四目相投的我們，雖然彼此都沒有說話，但好像百般滋味在心頭…
互相等待著對方的答案。
我感覺到…自己和阿柔的臉都開始透紅。
不知不覺間，我們兩人的肩膀碰了在一起。
阿柔的頭也不知不覺的伏了在我肩上，我也輕輕的伏在她頭上。
此刻的氣氛……
很甜蜜。
雖然不確定阿柔喜歡的男生是不是我，
但是作為男生…要鼓起勇氣做先說的一方吧…！
雖然我知道時機還未成熟，但至少……
我希望在你離開前向你表明自己的心意。
不知道哪來的勇氣，我開始說起話來：
「我鍾意嗰個女仔呢，我細細個就識佢架喇。佢好傻架，成日都會扮嬲咁樣同我玩，但係我哋又會玩得開心喎；但係佢好叻架，讀書又叻，煮嘢食又叻，運動又叻，做咩都係咁叻。
直至我終於明白自己內心諗法嘅時候，我先知道原來自己一直以嚟都係咁鍾意佢。每次見到佢笑，我都想陪佢一齊笑；每次見到佢喊，我都想攬住佢、安慰佢。我好想…可以喺未來嘅每一日都陪喺佢身邊，分享佢嘅快樂、分擔佢嘅不安。
我好想可以徹底咁轉變，一邊充實自己嘅人生、一邊變得更好，咁樣我先可以做佢嘅男朋友。哈哈，唔好誤會我係自卑喎，因為佢成日都叫我要有自信，唔可以睇少自己架。你可能會問，唔係自卑咁係啲咩啊？我會答你，係因為我想先等到自己真係變得成熟嘅嗰一刻，咁先可以喺佢身邊一直好好保護佢。
因為我想畀最好嘅自己佢。因為……我真係好鍾意佢。」
聰明的你，不會不知道那個人是誰吧。
「我講完喇。你覺得……佢點啊？」我淺笑。
「呵呵，佢都好犀利架喎，可以改變到咁懶嘅你。」阿柔甜笑的說。
「佢唔止犀利架，」我輕輕捏住她的臉頰：「仲係我嘅唯一。」
阿柔的臉頰變得更紅了。
「你鍾意嗰個男仔呢？佢……又係點架？」縱然緊張非常，我依然盡量保持著微笑。
「佢啊…」阿柔甜笑一聲，伏回在我的肩上續說：
「都係同我由細識到大架。無論喺我開心嘅時候又好，抑或喺我唔開心嘅時候都好，佢都總係會喺我身邊一直陪住我。
細細個嘅時候呢，我遇上過好幾次人生中唔如意嘅事，佢都會喺我身邊氹返我，不斷鼓勵我、支持我，陪我渡過一個又一個難關。喺人哋眼中，佢可能只係一個普通嘅男仔，冇咩咁特別。
但係喺我眼中，佢永遠都係我嘅守護天使，一直都喺我身邊守護住我，為我帶嚟安心同快樂。我諗喺細細個嘅時候……我對佢嘅愛情小種子一早就已經深深埋下咗喇。
而家我哋都長大喇，佢好懶散架，做任何事都好似冇用盡全力咁。不過其實我知道佢有嗰份決心架，只係好容易又會俾另一個挫折打敗，不自覺咁樣原地踏步。起初我都好擔心，不過我都一直喺佢身邊鼓勵佢、支持佢，就好似佢細細個對我所做嘅一樣。
因為我啊…相信終有一日，佢會因為我而轉變嘅。見到而家嘅佢有一份堅定嘅決心，見到佢嘅努力終於開始得到成果，我自己都好開心，同時好戥佢開心。細細個種落嘅小種子，總覺得……好似已經開始慢慢發芽喇。
我好期待架，期待呢粒小種子繼續發芽，慢慢長高成大樹嘅嗰一刻。好期待，可以一直喺佢身邊，陪佢渡過未來嘅每一日、渡過未來嘅人生。因為我啊…一直都好鍾意佢。」