《足印》-從幼稚園開始，對你的心意原來一直是愛情-: 後記

 
大家好，我係米椏。
 
首先，好多謝大家嘅支持。
 
呼……終於都完。
 
完咗呢個故事，亦完咗我一個小小嘅心願。
 
初中時期，仲細個嘅我間唔中都會有嘗試創作嘅呢個諗法。


 
不過……呢個諗法總係會不了了之。
 
可能因為我懶？
 
又可能因為……人遇到困難，總係會唔經唔覺咁選擇咗去逃避？
 
不過點都好，最後我都下定決心開始寫。
 
如果你有曾經留意過我喺連登討論區嘅回覆，相信你對接下嚟嘅呢一句應該會有啲印象？


 
「小弟都係過來人。」
 
冇錯，我都係過來人。我都曾經有過一個「她」。
 
而嗰一個「她」最後……因為我嘅唔成熟而選擇咗離開我。
 
適逢感情失利，學校假期同埋肺炎疫情，每一日我都留喺屋企無所事事。
 
咁不如……試下完咗呢個細細個就有嘅心願？


 
抱住呢個諗法，開始花時間去定立大綱、創作人物、構思劇情。
 
最後……膽粗粗咁放上連登同紙言。
 
唔知道，你又鍾唔鍾意個結局呢？又有冇啲咩特別嘅諗法咁呢？
 
點都好，我都好多謝你曾經花過時間落我呢個故事上面。
 
真心多謝喺度留過言嘅你。雖然對你嚟講可能只係簡單一句，但係對我嚟講係最大嘅鼓勵同支持，同時係我一直堅持嘅動力。
 
真心多謝，參與過呢個故事，見證住天仔成長嘅每一位。
 
有朋友問我，滿唔滿意第一次寫故事嘅呢個成績？
 


雖然唔係話特別多人睇，不過如果我答你唔滿意，就一定係呃你嘅。
 
題材唔係特別吸引、文筆唔係特別流利、劇情唔係特別豐富……
 
老實講，有人睇我已經好開心。
 
自知之明我都有啲嘅，哈哈。
 
咁樣講返起，我仲記得細細個嘅我都曾經覺得自己係個好特別嘅人。
 
可能因為小學成績相對地名列前芧？
 
總覺得自己……就係世界嘅主角。
 
直到升上中學，先真正明白到「人外有人，天外有天」呢個道理。


 
真正明白到，其實自己只係個平凡不過嘅常人。
 
不過……再平凡嘅人都可以嘗試充實自己，從而活出不平凡嘅人生吧？
 
至少，我自己係咁諗啦。哈哈。
 
臨近結尾，再同大家分享一件小趣事。
 
好似係放頭幾篇文上網之前嗰幾日？我諮詢過朋友意見，問佢覺得一日應該要放幾多份量嘅文先好。
 
佢講笑咁同我講：「是旦啦，你估真係會有咁多人睇你咩。」
 
我知道佢係講笑，所以冇乜點介意。
 


加上，諗深一層其實佢都冇講錯。
 
作為一個初出茅廬嘅作者，的確唔需要太注重「量」，反而應該注重「質」吧？
 
不過，我依然選擇咗每日堅持出呢個份量，務求做到兩者兼顧。
 
始終我覺得……
 
人，點都要畀自己一個目標吧？
 
就係咁，堅持咗差唔多兩個月。
 
撫心自問，我自己覺得「量」嗰方面都算唔錯。
 
唔知道睇緊嘅你，覺得「質」嗰方面又點呢？


 
哈哈，希望你都覺得唔錯啦。
 
嚟緊我會喺紙言呢邊少執一下個故事(主要係前段對話)，當係做個完滿嘅結束。
 
如果你有興趣重睇一次，或者想推薦畀朋友睇，都可以喺紙言呢邊睇。
 
唔好意思，當係畀我自己幻想一下上述兩個冇乜可能發生嘅情況。哈哈。
 
至於未來仲會唔會寫新嘅故事……
 
老實講，其實腦入面有少少靈感。
 
不過，呢樣就遲啲再算。
 
可能自己寫完一個故事，親身體悟到創作嘅不容易。
 
原來真係好攰。比我想像中嘅更攰，哈哈。
 
所以，可能會寫，亦可能唔會再寫。
 
如果真係開始一個新故事，希望到時會再見到你。
 
到最後……
 
再次多謝你。
 
多謝你曾經畀我嘅建議，多謝你一直對我嘅支持。
 
多謝你願意花時間落我呢個小小故事上面。
 
希望呢個故事帶出嘅小小道理，都可以陪你渡過未來嘅人生。
 
人生……難免會遇上一個又一個挑戰。
 
如果想放棄嘅時候，不彷回頭望一望後面。
 
睇住一路走過嚟嘅每一個足印……
 
你會發現，幾難嘅路，唔係都已經走過咗喇咩？
 
咁……仲有咩難關係跨越唔過架呢？
 
鼓起勇氣，放眼未來。
 
我係米椏，有緣再會。