如是者,我,阿峰,同Charlotte全晚就在包廂裡面傾計。阿峰有一個由中學開始就一齊的女朋友,雙方都認定對方為結婚對象,父母都非常支持這婚事,大概是知道阿峰真的是一個好男仔吧。不煙少酒,幾乎都不會在類似蘭桂坊的地方看到他的蹤影。如果在酒吧找到他的蹤影的話,旁邊一定有我在。

「喂阿峰你電話響啊,一定係阿嫂搵你啦!」我看著他在震動的電話說。

「收皮啦你!」阿峰也很少講粗口的,我怎麼想也想不到他是如何對著我去強忍那些粗口的。

「係喎,阿峰女朋友都係我地學校嘅同學嚟㗎喎。」Charlotte說。

「咁你呢?有冇拍過拖?」我的好奇心驅使我去問的。





「以前有一個拍咗2年嘅男朋友,不過佢比帽我戴,所以分開咗。」Charlotte解釋的時候,臉上掛著一種令人憐憫的神情。

「Oh… 唔緊要啦... 總會遇到一個更好嘅人嘅,希望在明天嘛!」我真的不懂如何去安慰別人,特別是這個剛認識不夠2小時的...朋友。

「你呢?咁靚仔,一定有好多女朋友啦!」Charlotte來一記回馬槍。

其實我以前的確曾經有過一個女朋友,不過最後因為我自己的原因,所以分開了,直到今天,我依然很掛念她,因為我覺得自己虧欠了她。

「我以前有過一個女朋友嘅,不過分開咗...,原因就...可唔可以唔講,哈哈...」我說的時候,左手不自覺地摸了摸自己的頸。





「當然可以啦!每個人都有佢自己嘅秘密㗎嘛,唔想講都冇所謂!」Charlotte開朗地說。還對我微笑了一下。

「點啊你地,傾咩傾到咁開心啊!」完成對女朋友報到的阿峰一下子跳坐到我旁邊。

「唔話你知!」我和Charlotte異口同聲地說。

「咁快就同聲同氣啦你兩個。」阿峰說。

3:01 a.m.





「原來3點㗎啦!我要走啦,應承咗女朋友唔會太遲返到屋企,我走先啦!」阿峰頭也不回直奔出酒吧包廂。

李鴻峰!你每次都這樣!又把帳單留下給我!

「都夜啦,我都要返屋企啦,我地下次再飲?同你傾計都幾開心!」Charlotte說。她的笑容真的能融化人啊。

「我都要返屋企啦,下次再飲啦,張單等我埋得㗎啦。」我說著便拿起帳單,走到門口附近。

「第一次見面就要你請,唔係咁好嘅。」Charlotte邊說邊拿銀包出來。

「唔洗啦,呢間酒吧我成日嚟幫襯,我喺度飲嘢有折㗎。」回頭跟Charlotte說完話的我便逕自走到酒吧的Bar檯,跟調酒師說了兩句便付了錢。

「多謝你啊,阿一!咁我走先啦,我行呢邊!」Charlotte就像一個買完糖果的小女孩,蹦蹦跳跳地跳到我面前。

「好啦我行第二邊啊,下次飲過!」話畢,我便獨自踏上我回家的路。





走著走著,總覺得有人在我身後跟著我,我不時回頭看一下但又沒有發現任何人。回家的路本來只有10分鐘的路程,我這次特意走了遠路,足足走了30分鐘才回到屋苑的樓下。因為我住在私人屋苑,所以會有保安,我也跟當值的保安說了要多加留意有沒有可疑的人在附近。就這樣,我抱著疲憊的身軀上了樓,拿鑰匙打開門後發現媽還沒有回來。

「仲未返嚟啊..? 肯定又喺公司OT啦..」

說著我便回到自己的房間拿替換的衣服,打算到浴室洗澡。

3:45 a.m.

「沖完涼舒服曬!」我一下子攤在床上,不用一會便睡著了。

就這樣,我睡到中午才起來,醒來的時侯還在害怕今天的課要遲到了,慌張的我拿起電話打給阿峰。

「喂!今日上幾點堂!」我很慌張地問。





「大佬,你係咪未訓醒啊?你畢咗業啦喎!」峰笑道。

「屌,係喎。哈哈哈...」是酒精嗎..? 讓我忘記了自己已經畢業了,暫時還是個無業遊民呢...

「係咁先啦,我女朋友叫我啦。」峰在電話的另一邊說道。

放下電話後,我離開了我的床,往洗手間出發。去完洗手間後,還是沒有發現媽有回過家的痕跡,字條還是完好如初地貼在門上。我開始著急起來,於是決定打一通電話給媽。
已有 0 人追稿