［真人真事改篇］《有一種鍾意，係我鍾意你鍾意我。》/《初戀1000天》: 第七章上 「我共你去到最遠 也只是友情 如現實是場玩笑 一早清楚內情」 〈好好戀愛〉

https://www.youtube.com/watch?v=9ONRnrCE9qo
第七章上
放學後，James自動自覺地走到Jessie桌前，等待手腳慢的她收拾書包，問道：「一陣你想去邊？」

「呃⋯⋯不如去食雪糕？今日Haagen-Dazs買一送一！」想起最愛的焦糖餅乾口味，還有那軟滑的質感，已讓Jessie垂涎三尺。

雖然James對雪糕沒太大興趣，還是微笑地說：「好呀。」



自從他們在一起後，只要他不用補課，Jessie不用練波的日子，他們都會一起放學，一起去吃M記的「廿蚊餐」或是吉野家下午茶，又或買一堆小食和珍珠奶茶去看電影；而當Jessie要練波的時候，他就會和她一起吃雞蛋仔或街邊的串燒——只要Jessie想要的，James都會陪她做。

「你地今日又一齊放學呀？」Andy的語氣裏盡是不情願，「你已經好耐無同我地一齊放學啦下，再係咁落去信唔信我地同你絕交呀拿？」

「拿，係佢要同你絕姐，同我無關係。」Chloe連忙澄清道。

「你啱啱唔係咁講架喎，叛徒！」Andy不悦地說。

「一係我地四個一齊去食囉。」Jessie說。



「唔要。我依個單身狗唔想比你地閃盲。」Andy果斷地拒絕道。

「咁聽日先囉。」Chloe說。

「咁我地走啦，拜拜。」Jessie拿起背包，跟着James離開了課室。

「重色輕友！」Andy看着Jessie的背影說，「算，Jonathan，一於我地三個去食四杯雪糕！」

從來說話都不多的Jonathan，近來變得更沉默寡言，臉上的表情也變得刻板，常常板着一張臉，連Jessie和他說話，他也總是一句起，兩句止。



「唔啦，我返屋企。」Jonathan拿起背包，徑自往門口走去，看都沒有看Andy一眼。

「佢兩個搞咩？一個掛住拍拖，一個好似同我地絕交咁，晏就連飯都唔再同我地食。」Andy無奈地說，漸漸懷念起以往四人一起打打鬧鬧的日子。

「點呀咁你，仲食唔食雪糕？定去搵你個呀C？」Chloe問道。

「唔好提啦，佢依排對我冷淡到幾日先覆我一句Message，我決定放棄佢！」

聽到這句話，Chloe頓時眼前一亮，說：「係真唔係，你講過放棄佢咁多次，最後都無放棄到。」

「今次我認真架！」Andy堅定地看着Chloe說。

雖然身為Andy的好友Chloe已聽過這句話很多遍，可每次聽到，心裏還是不禁燃起一絲希望，高興地看着Andy說：「咁就要去慶祝下啦，走，我地去唱K。」

「吓，慶祝啲咩？」Andy疑惑地問道，「慶祝我失戀呀？」



「慶祝你甩難呀！咁多野講架你，行啦！」Chloe拉着Andy的手往前走，而Andy也沒有反抗。

他永遠不會知道，每當他失戀，都是她最快樂，卻也是最難過的時候——為他的傷心而難過，卻也為他不會再留意其他人而高興。


「我想焦糖餅乾同藍莓芝士蛋糕，但又想食冧酒提子，同柚子蜂蜜⋯⋯點解揀好？」Jessie看着透明玻璃裏七彩繽紛的雪糕咽了咽口水。

「唔該我想要兩杯雪糕，一杯焦糖餅乾同藍莓芝士蛋糕味，另一杯要冧酒提子，同柚子蜂蜜。」James對店員說，然後把八達通放在拍卡器上，整個過程不消一分鐘便完成了，而Jessie還站在玻璃前猶豫着。

「唔洗咁糾結啦，我買晒你想要嗰四隻味。」James把收據放到Jessie手上。

「真係架？你無想食嘅口味咩？」聽到James的話，Jessie的目光才終於從誘人的雪糕移到他身上，雙眼冒着閃光。

「你想食咩我就想食咩。」James溫柔地說。



聽到這樣甜蜜的說話，Jessie竟露出一抹羞澀的笑容。她喜歡這樣被他寵愛，甚麼都慣着她的感覺。

「你嘅兩杯雪糕。」店員把雪糕遞到James和Jessie手上。

剛拿到雪糕，還未坐下，饞嘴的Jessie已忍不住舔了James手上的柚子蜂蜜一口，綿密如雲的口感瞬間俘虜了Jessie的心。

「柚子味好濃，好好味！」Jessie嘴角上翹，樣子單純又滿足，臉上幸福的笑容瞬間感染了James，使他也忍不住挖了一口來吃，說：「係喎，又幾好味。」

可是他不敢吃太多，因為把最好吃的都留給她。

「個冧酒反而麻麻，我唔鍾意啲提子乾。」

「咁留返比我負責食啦。」James努力避開上面的柚子蜂蜜，只敢挖下面的冧酒提子來吃。



「喂，你剩係掛住食我嗰啲，你嗰杯就溶晒啦。」James看着饞嘴的Jessie只顧着吃他那杯雪糕，手上的雪糕都從雪糕筒一點一滴地流到她的手指上，馬上從褲袋掏出紙巾，小心翼翼地替Jessie抹去，再從她手上的雪糕挖了一勺子遞到她面前。

然而，饞嘴的Jessie沒有張開嘴巴，而是接過他手上的勺子放到自己的口裏。

儘管他們已在一起，她還是不習慣與人過份親暱的感覺，像是她辛苦建起的城牆突然被攻破，會讓她失去安全感。

「話說，Jonathan最近好奇怪。」Jessie雙目仍緊盯着手上的雪糕說。
「點奇怪法？」

「佢最近又唔同我地食Lunch，小息又成日唔係位，問親佢野佢都好冷淡，好似⋯⋯刻意疏遠我咁。」說到這裏，Jessie本來幸福的表情多了一分婉惜。

「幾時開始架？」

「上個月？完咗旅行日無耐之後。係咪我做咗啲咩激嬲咗佢呢？」



旅行日之後？James想起那天在課室前，與Jonathan相遇時，他那張毫無表情，帶點怒惱的臉。唔通係由嗰個時候開始，好似Lemon講嘅咁？James心想。

確實，以往他回頭偷看Jessie的時候，幾乎每次都看到她和Jonathan在聊天或打鬧，而這個月來，Jessie和Jonathan之間彷彿隔着一條鴻溝，像斷了的橋，兩人幾乎再沒有交集，而Jonathan臉上的笑容也變得稀有。

咁都好呀，最好你地以後都係咁，James心想。

「會唔會佢有咗鍾意嘅人，有心避開你，廢時引起誤會咋？」James吃着雪糕，故作不經意地說。

「佢會有鍾意嘅人？但⋯⋯佢好似對個個女仔都差唔多咋喎⋯⋯」Jessie想起雖然平日有不少女同學主動和Jonathan聊天，可Jonathan卻從不主動找她們說一句話，而且每次的回應都總是不溫不熱，加上他幼稚的思維，實在無聊想像他竟會有喜歡的人。

「成日咁多女仔聊佢，會唔會平時有MSN同人傾計你唔知咋？」James繼續添鹽添醋，刻意把這本來沒有味道的一鍋清水煮成沸騰的濃湯，「我見佢同Christy、Mandy佢地好似都幾啱傾。」

唔通嗰晚佢唔覆我，就係因為忙住同其他女仔傾計？Jessie心想，臉上的幸福逐漸變得黯淡。

他們中間的那道牆又被加固了。

「食完未呀？仲有無邊到想去？」James看着被挖空的雪糕筒問道。

「我想返屋企。」Jessie頓時意興闌珊，打消了本來打算到無印良品逛逛的想法。

「好呀，我送你返去呀。」

「唔洗啦，咁遠。」

Jessie每次回去都總要走過幾條長長的斜坡才到家，尤其夏天的時候，總是讓人走得汗流浹背，為免麻煩別人，Jessie每次都會選擇拒絕James的好意。

「唔遠，行啦。」James替Jessie扔掉手上的垃圾，然後牽起她的手準備離開。

自某天他來接她放學，在過馬路之際，突然伸出在冒冷汗的手，小心翼翼地牽起她的手，到現在，Jessie已習慣他手心的溫度，卻不曾有過一絲隨之而來的心動。

「點解咁遠你都堅持要送我返去？」Jessie問道。

「因為我想見你耐啲囉。」反應敏捷的James總能輕易說出讓人臉紅心跳的甜言蜜語，要是一般女生，應該早就被他融化了。

可惜，這對Jessie的作用卻不太大，她的腦海還是與她日漸疏遠的Jonathan。

點解佢會變成咁？仲成日都好似唔係好開心咁？Jessie心想，手卻正與James十指緊扣。