【青春純愛+靈異】收音機裡的情人: 第八章：約定

因爲陳志豪的爪牙已經伸延都普通班的關係，每一位同學都不敢靠近我，生怕他們也會被牽連到此事，只有班上向來不理世事的書呆子孔子對這些規則視若無睹。 

「任樂謙，你呢排得唔得閒呀？一齊去自修室溫書啦好冇呀？」雖然我跟他不熟，也不太熱衷於溫習，但我也不想拒絕他一番好意，便答應了他。

 我和他放學後一同乘小巴到了沙田圖書館，便全程任由他自行溫習，自己則瀏覽着Instagram, 看看彤彤有沒有更新任何新動態。

只見那有千多名追蹤者的賬戶上全是她和陳志豪的合照，還有高級料理，名牌衣服，精美文具一系列她最愛的物件。可惜，我從沒有經濟能力送她喜歡的禮物給她。 

頃刻，她上載了一個新動態。 照片的背景是一幅石地，中心則對焦着她纖細的手腕上一條名牌手鍊，動態角落還有心心貼圖。不用問肯定是陳志豪送的吧？

我趕快關掉畫面，免得再像癡漢般留意着不屬於我的女人她的一舉一動。

 慢着！這背景豈不是我們之前一起去的涼亭？我趕快對孔子說自己有急事要離開，奔向涼亭。

 果真，一個穿着我們校服的少女還在這裏坐着。 

「你又知道我喺度嘅？」

「見到你個story， 一眼就認得出呢個涼亭啦！」



「你......唔嬲我咩？我宜家搞到你咁樣.......」她眉頭緊鎖，看似心事重重。 

「點會，喺嗰個陳志豪黑人憎啫......呀！sorry! 一時唔記得佢係你男朋友添！」當你墮進愛情的無底深淵，在你眼中，愛人永遠也不會做錯事的。

「......」

「其實可以咁樣見到你，我已經好開心㗎喇！」我續道。

 「其實......你係咪真係鍾意我呀？」她突如其來的提問，殺我一個措手不及。



 「誒......係呀！可惜宜家都冇機會。」事到如今，也再無必要隱瞞。 

「咁.......如果我俾個機會你呢？」 

「吓？你唔驚陳志豪咩？」 

「你當初都唔驚佢啦！我都唔想辜負你嘅一番心意，先咁提出㗎。」

 「如果你可以做到全級第一，我就同你一齊。」 

點解要係全級第一？唔可以係其他嘢咩？咁如果我成功咗嘅話你又點樣同陳志豪交代？」我一口氣把心中種種疑問道出。 

「點解呀？因爲我想睇你有幾大決心囉！我最鍾意啲有能力，有目標嘅男人㗎喇！至於志豪嗰方面，我有辦法㗎喇！」難道她自己也這般勤快。

 「好！一言爲定！」縱使這個挑戰對我而言實在是十分困難，但上天既然賜予這個機會，我就不應該放棄！



「我隨口講下㗎咋！你唔係真係當真呀？」

「梗係當真啦！堂堂男子漢大丈夫，應承得人嘅就唔會反口！」

「嗱！你話㗎！」我看着她久違的微笑。