【青春純愛+靈異】收音機裡的情人: 第五章：遺忘 （下）

「終於聽完新聞喇，原來唔講嘢一陣真係幾悶下喎。你快啲講下嘢啦，好悶呀！」

 「得喇得喇，我哋宜家泊翻部單車就去食飯啦！」這個丫頭爲什麼就這般需要人陪伴，真令人麻煩。 

放好單車後，我便帶着昕昕到附近的一間賣車仔麪的隱世小店。

比起燒鵝大王這些老牌大餐聽，我其實更喜歡支持這些小店，在狹小的的空間親密地與夥計老闆相處， 相較其他餐廳來得更有人情味，更貼地。 

「喂！謙仔！又過嚟食飯呀！今日我整咗啲有特別餡料嘅雲吞呀！唔係加料喎，係special餡料喎！」風趣的徐老闆還要特別強調自己所說的英文，難道他真的覺得這樣說會顯得他的雲吞更高級，更特別一點嗎？ 



我微微嗤笑，道：「你啲雲吞款款都差唔多㗎喇，可以有幾特別啫？」

「邊係喎！我唔理喇，你點都要食翻隻！」

「誒，講漏咗添，我喺話你啲雲吞款款到差唔多咁好食呀！你畀返普通雲吞我得喇！其他照舊！」

「算你識講嘢呀！私人醒隻特製雲吞比你，頂多繼翻普通雲吞嘅價錢喇！」徐老闆馬上就把熱騰騰的車仔麪放到我面前，弄到我整副眼鏡都是霧氣；其他配料和麪底都像我平時點的一樣，看來他真的有耐心記住我平時的喜好。 

「喇，慢慢食呀！」徐老闆放下車仔麪，用搭在肩上的祝君安好毛巾輕印額上的汗珠。



「開餐！」因剛才消耗了點體力的關係，我飛快地吸入麪條和雲吞，果真老闆弄的麪永遠都是煙韌爽口，雲吞皮滑多汁。

「喂！我又想食呀！比我出嚟睇吓啦！」昕昕又像小孩般吵鬧。

「唔比呀！一陣間比人見到點算呀！」我也不想讓熟人看見自己像自問自答般跟台收音機談話吧。

「喂呀！我唔制！次次食嘢你都唔比我望，我唔使食嘢都可以望下啩！」

「我話唔得就唔得啦！咁樣做好大風險㗎！」



「求下你啦.......一次 please…...」

「謙仔，同女朋友仔講嘢呀？仲要喺度打情罵俏添，我呢啲阿叔都係行開一邊喇。」徐老闆嘴角微揚，就這樣打斷我們的對話。 

「邊係呀！我喺有女朋友就唔使自己一個人嚟你度食嘢啦！」我帶點無奈且誠實地回應。有哪個血氣方剛的青年不曾奢望過自己牽着女朋友嫩滑的小手逛街吃飯看戲，一起做哪回事的嗎？

「咁你頭先又係度陰陰嘴笑？你唔係中意人又唔追佢啊？後生仔要主動啲喎！」口水多過茶的徐老闆真不識趣，見人尷尬靦腆的神色也繼續肆無忌憚地說着話。

「冇啦！邊有喎！」我再三拒絕。

「咁好囉！後生仔嘅嘢我喺唔多識㗎喇！」便轉頭忙着招呼新進來的顧客。

「竟然有人覺得你咁嘅尊容，都可以溝到女喎！我睇你都係匿喺屋企睇鹹片打飛機算喇！」昕昕的語氣仿似完全不爲剛才的說話感到尷尬，更罕有地跟我一樣粗豪地說話。

「仲以爲你喺斯文人嚟㗎添！啲語氣今次我兄弟講嘅嘢咁嘅。」



「我當然好斯文啦！但你都唔會覺得我純潔到連打下飛機呢啲都唔講得啩？」沒錯，在我真正認識的幾個女孩中，每一位都像仙女般清麗脫俗，屁也不會放，更何況是談論自慰等話題。

「我識親啲女個個都好純情㗎！好似我哋學校之前有個女仔，眉清目秀，成身都又白又滑，隻腳又長，身材又幾唔錯。仲要呢，佢真係乖到難以置信㗎，連仆街都可以唔知係咩嚟囉！」我說得興起，便滔滔不絕地把那個她的優點全部列舉出來，像是回到從前遇上她的那天。

「喺我哋咁嘅垃圾學校裏面，佢真係出淤泥而不染呀！個人又上進，讀書又叻，又靚女，又純品，簡直係我哋嘅校花呀！」原本我還深深地痛恨，想要忘記這個人，現在我卻對另一個女孩把她描寫得像地下無天上有般罕見完美，場面實在諷刺。

「計姐姐話，你十成十仲鍾意嗰個女仔啦！邊有人有你講到咁完美㗎？我就唔信佢一啲缺點都無！」女人果然是世上直覺最強的生物，聽畢三兩句就可以看穿你的心意。

「佢嘅缺點呀.......咪係唔中意我囉！」這句看似開玩笑的話偏偏就與事實重疊，那像針般刺痛的感覺也再次在心中重複又重複地出現，蔓延到全身。 

「你宜家冇嘢呀嘛？有咩同姐姐講得㗎喇，包補我啲感情建議幫到你！」昕昕也意識到不妥，語氣也變得像母親般溫柔知性。

「等我食埋個麪先啦！」我含着一口麪條，務求令自己不再說話。 




離開麪檔後，我到了城門河旁一個人煙稀少的角落，在旁邊空置着的涼亭坐下來，拿出收音機。

 「呢度幾靚喎！我都唔知城門河有個位係咁少人行嘅添！啱曬人講心事啦！」

「其實講比你聽都唔係唔得嘅，只不過呢件事我已經收埋喺心到好耐。用咗咁耐時間忘記佢，宜家就咁攞返出嚟講，真係有啲可惜。」

「我淨係知道，呢啲感情事鬱喺個心到只會令到人痛苦，呢一世都唔會忘懷。反正我又唔係你邊個，講畀我聽應該冇乜嘢嘅。講啦！講咗會舒服啲。」

 就這樣，我把自己和她的故事一字不漏地娓娓道出來。