【青春純愛+靈異】收音機裡的情人: 第十一章： 心底話

 ----

聽畢啊謙的故事後，我也忍不住哭了起來。這真的只是基於同情嗎？當然不是。 

我後悔，後悔自己爲何沒老早關心啊謙；我失望，爲他還放不下那曾經熟悉的人感到失望；我自責，自責自己爲何不是人類，不是他身旁，可以安慰他的那個人，而不是一把聲音。 

幸好，他也至少肯將自己的心事說出來，我想這也是對我的信任吧。 

我此時才想起自己的角色，嘗試平復心情，才有能力開解他。 



「佢都走咗咁耐，點解仲要因爲佢而唔move on 啫？點解唔活在當下，珍惜你而家有嘅嘢呢？你話佢嘅離開令到你好空虛呀嘛，咁你咪建立過另外一段關係去填補佢囉！如果你乜嘢都唔做，咁你只會繼續痛苦落去！」我越趨激動，竟把自己的心底話全訴說出來。 

沒錯，我本來就不溫柔體貼，不懂安慰別人；我只知道我痛恨他如此愚笨地執着於過去，使自己痛苦，更痛恨自己永遠都不能真正成爲填補他空洞內心的人，不能取代黃芊彤在他心目中的位置。

 「你份人咁念舊，幾年前嘅事到宜家都放唔低，人地就咁上進，放眼未來，就算一齊咗到夾唔到啦！」 

「既然你都識話自己同佢咁唔同，一定喺唔到一齊，咁點解仲要記掛住呢件事啫？大家唔夾就唔夾㗎啦，都唔係你嘅錯，點解你要自責？」

 「反而係佢，明知你鍾意佢仲收人做兵，你爲咗佢比人打就一句多謝都無，佢有起咩事就要你安慰保護佢，點解你可以咁蠢㗎？」 



「仲有呀，佢喺到扮咩上菜啫？着名牌，食貴嘢，又講英文扮high。我問你，佢全名係咪黃芊彤呀？」我確認她的身份。

 「吓？係呀！你以前識佢嘅咩？」他詫異地看着我。 
「係，佢以前係我鄰居，好似話佢呀爸去咗大陸發展，搵到唔少錢，所以由新翠全搬咗去名城。佢哋成家都鍾意充大頭鬼㗎，扮嗮好有錢咁，尤其是係嗰個黃芊彤，細細個已經冇啲禮貌，成日喝佢個工人，見到啲看更又黑口黑面，但對住佢啲朋友扮嗮好人，擺明就係睇唔起普通人啦！佢淨係癡住啲有錢人就得㗎喇！」我雖然與她只是點頭之交，但對她的描述可謂是句句確實無誤。 

「咁人地生活環境好咗就自然追求更多㗎啦！ 態度唔好嗰啲可能係你聽錯啫，我識咗佢咁耐，佢都無話對我有幾唔好！」

 「你咪傻啦！人地當你水泡先對你好咋！如果唔係咁，佢點會對住你講佢男朋友壞話，轉個頭又癡翻埋佢到啫！」 

「夠喇！！」他大喝一聲。




 「可唔可以唔好咁話佢呀？」他續道。 

「咁我都係講事實啫！對住啲咁嘅女人你都沉嗮船，辛苦嗰個只會係你咋！！」聽見他如此執着，我也不禁傷心得流淚。

 「我想自己一個人靜下。」他拔下收音機上的耳筒，拿起電話聽音樂。

糟糕了！我惹怒了他麼？儘管我語氣有點重，我也只是想讓他接受事實而已！

 我努力地保持理性地道出事實，不就是爲他好嗎，難道他認爲我故意惹怒他的嗎？他的不快和執着也使人很不好受的！

爲何我倆都要見證着自己所愛的人心裏惦掛着另一個人呢？

 想到這裏，我已無法停止自己的哭聲，只能獨自不切實際地希望着他總有一日會放下。


------