我把收音機放在口袋裏,帶着一片寂靜的耳筒,匆匆趕去巴士站。 

果然,她選擇了離開我。

 也許她只是提早把這難以維持的關係斬斷,或是純粹厭倦困在收音機內的生活罷了

 或者,我是否慶幸自己還有時間,還有機會可以與她一起,解開她的心結。

 「你將個計劃諗成點呀?首先,我哋要點搵你屋企人先?或者求其話我喺部收音機入面發現咗啲咩遺書,然後比佢睇?又或者我問下阿文可唔可以報夢?」我實在不知道如何應對這一切。



 「應該可以嘅,不過我都唔知有咩可以同佢地講。」她冷淡的回應。 

「或者我哋觀察咗佢哋嘅生活,先再諗要同佢地講咩?」我不停主動建議。

 「喂,落車喇!」這是她第一句主動說的話。

 匆忙吃過母親任職的酒樓留下的飯菜後,我便繼續商討整個計劃,只是對象成了阿文。

 既然昕昕態度如此消極,我又付了錢給阿文,不找他是我的損失。



 「要報夢就難啲喇,因爲佢個靈魂困咗喺收音機到,既唔可以瞓覺嗰時埋到佢父母身,又唔可以走入佢地個夢到。」

 「佢又冇兄弟姊妹,一般而言真係好難埋到佢父母身,就算係工作上都好,都未必真係好徹底咁知道佢哋對個女嘅諗法係點。」 

「知道佢哋諗乜?咁搵呀妙姐幫手咪得囉!」我靈機一觸。

「你又知佢嘅能力嘅?不過無用㗎,凡人嘅事佢唔插手㗎。」 

「又或者搵私家偵探跟蹤佢哋?不過我冇錢喎.......」



 「我都有啲『朋友』介紹到比你嘅,不過佢哋啲報酬就有啲特別喇。」他道。

 「唔緊要啦,幫到昕昕就得。」

 此時,母親又拿着一大堆酒樓餸菜,說有些不能留過夜,必須要現在吃。

 也許,這就是我討厭到酒樓吃飯的原因吧。  

翌日,我騎着單車去送外賣賺外快,晚上就獨自到阿文的辦公室去拜訪他所說的「朋友」。
 

昕昕整天都沒跟我說話了。

 「呢個係明哥,佢應該幫到你㗎!」阿文指着空中的一縷白煙說道。

 「hello, 但點解你係舊好似白煙嘅物體嘅?」我好奇的問。 



「咁係因爲你修行唔夠,見唔到我嘅人形,我先勉強變自己做舊雲咁,方便你睇咋死仔!」阿文的嘴巴沒有在動。

 那縷白煙徑自將桌面上的相機拿起來,就像是魔術師把物件憑空拿起般。

 「咔嚓!」他把相機的畫面放到我眼前,而相片徹底把我目瞪口呆的神情捕捉了。

 「明哥佢生前係個專業嘅狗仔隊嚟嘅,佢可以潛入呀昕屋企觀察佢屋企人,再用相機影相同錄音筆。」

 「嗱!我就可以全天候24小時捕住佢哋嘅,而我過往嘅履歷都包括有踢爆明星吸毒,包二奶,生仔嗰啲,試過三日三夜唔瞓覺就係爲咗捕住個目標幾時出屋企,所以可以話係非常專業,影出嚟嘅嘢有品質保證㗎!」 

「不過,我要翻咁上下報酬嘅,就係要部Canon EOS R5。」 對攝影一竅不通的我立刻上網搜尋這部相機的型號,豈料價錢竟貴得可怕。 

「吓?三萬蚊?點買比你呀?我唔好去搵私家偵探?」我驚歎。



 「嗱,你有兩個方法:一,係直接搵部真嘅相機出嚟,長期擺喺我張車頭相前面供奉,二呢,就係整個紙紮嘅出嚟,燒翻比我,不過紙紮鋪好似冇賣呢個型號,要你自己整。有得你揀,仲想點呀?話嗮我都可以做到啲常人做唔到嘅事㗎喎!」

 「我都講咗明哥嘅要求係比較難做㗎啦,你自己考慮吓喇。」阿文道。

 「得!整紙紮相機咋嘛!有幾難呀!」 

「𡃁仔,唔好話我唔提你,紙紮唔代表可以求其㗎!我要做到100%還原先可以收貨㗎!」 

「好!包保整個出嚟比你囉!」條友咁串,唔大翻佢都對唔住自己。 

我離開後,便到了紅磡打算買個紙紮相機作模板,稍後用作研究。 

若然要把相機每一個細節還原的話,我必定要找個真的相機作參考才行。

 「喂?榮少,你咪好鍾意影相嘅?你有冇部Canon EOS R5 借住嚟先呀?」 



「吓?呢部貴嘢要成三皮㗎喎!單反我就多!」 

「你要嚟做咩先?我可以問我表哥借嘅.......」

 「誒誒......實不相瞞,我係攞嚟溝女嘅......」難道說我要要弄個紙紮相機,要借來實物參考嗎?

 「有女溝咪好囉!不過,你千祈唔好整爛呀!睇你個樣都冇錢賠㗎喇!」 

「得啦!我上次都有同你一齊去影相㗎,見我影出嚟啲相,就知我啲攝影技術都唔錯㗎啦!」

 「關你攝影技術咩事啫,靚女點影都係靚㗎啦!」上次真正用相機拍照也是上年動漫節的事了。 

「提翻你,溝女就梗係影景㗎喇,影景同影人好唔同㗎,你都係好好惡補下先好喺條女面前影。」



 「得喇!呢啲就攪得掂㗎喇,係咁,拜拜!」我拿着手上的紙紮相機,獨自走在陰森的街道上。 
已有 0 人追稿