【青春純愛+靈異】收音機裡的情人: 第三十三章：芝士牛肉丼

此時，我才意識到自己就像大鄉里出城般，什麼也不太清楚。

這畢竟還是我第一次出國旅行呢。

「係呀，我見你嗰日諗嗰個畫面有晴空塔，咪諗住陪你一齊嚟呢度畢業旅行囉，不過我功力有啲唔夠，啱啱用咗好多精力帶你過嚟，所以個樣而家先搞成咁。」虧她還在這裏笑着。

「你仲係度笑！萬一你虛脫暈低，我擔當唔起㗎！」爲了我一時的快樂，她竟然犧牲得如此多。

「唔緊要啦，係喎，帶翻個耳筒，扮係同個耳筒講嘢，講嘢細聲啲，日本人唔鍾意啲人嘈㗎。」我此時才看見背囊雖然輕便，其實內裏一早有昕昕準備的衣服，日用品，耳筒還有錢包，鎖匙，護照等重要物品，真貼心。



「咁我啲錢呢？」我此時才想起如此重要的錢財。

「你呢兩千蚊喺度呀。我早幾日問阿文借㗎。」她手上的是一疊日元，而我也立刻把日元放到錢包裏，免得其他人看到這些紙幣在空中漂移。

正所謂財不可外露嘛！

「咁你使唔使唞吓先？搞到你咁辛苦我會好心痛㗎……」明明她看似如此疲累，卻精心的爲我打點一切。

「唞唔到㗎喇，要練功同埋要啲時間，啲元氣先會恢復。」她輕鬆的說道。



「你睇吓whatsapp 先啦，不過記住熄data 先喎，漫遊好貴㗎。」原來昕昕代我通知了母親，跟她說我這兩天會與其他兄弟到長洲旅行。

就在一分鐘前，妙姐也傳來了一個pdf 檔案，而昕昕也爲我下載到電話裏頭。

pdf 裏正是我們這兩日的行程。

原來她一直默默的爲我準備一切！

「吓？你一個人做嗮噉多嘢呀？你要同我講先得㗎嘛，做咩將所有嘢攬嗮上身啫！」虧我這個廢物還在埋怨她不肯見人。



「你夠幫我做咗咁多嘢啦，我做都係應該啫。唔好嘥時間喇，我哋快啲跟住個行程去啦！」她的神情比我還雀躍。

「呀！咪住！咁難得喺晴空塔隔離，梗係影咗相先啦！」我把電話換爲自拍模式，才意識到我沒法把昕昕也拍攝在內。

「你朝頭早影唔到我㗎！我叫人幫你影啦！」

「咔嚓——」那熱心的日本人幫我拍着單人照。

雖然高塔依舊屹立在背景，可是身旁的不再是盛開的櫻花樹，更沒有了昕昕，照片又有何意義？

「大個仔，自己一個去日本喇！你以後就可以攞呢張相留念！」她燦爛的笑着。

我們跟着行程先急步走到淺草，來到淺草寺著名的雷門拍照，在仲見世通街走着，再走到阿美橫町，之後再走到龐大的上野地鐵站裏面。

反正自己既不會買手信，亦不會像水貨客般瘋狂購買藥妝，而自己只有一個人，能吃的東西很有限，所以便不太消費，變相那二千元港幣換來的接近三萬日幣根本在這些地方毫無用武之地。



結果，我也只可以不停用電話拍下週邊的景色，和看着昕昕的神情。

她緊挽着我手臂，像個孩子般好奇的看着週邊的景物，看上去就像比我更興奮般。

那倒是的，除了女優外，我根本對日本毫無認識，怎會像普通香港人般如此期待着到日本旅遊呢。

也許我這些窮小子就算有錢了也不會懂得怎樣享受吧。

上野站基本上就是由一個個商場，不同的商店組成，基本上也沒什麼好逛的。

「你個人咁無聊㗎！唔通除咗AV 之外你冇興趣㗎喇？」她嫌棄着我如此快的掠過每一個景點。

「嘻嘻！我嘅興趣咪係你囉！」我裝作風趣的說。



「好衰㗎！咁我唔喺度，你咪乜興趣都無？」她嫌棄着說。

「都係㗎！」徒步行幾個小時後，我也開始感到些許餓。

「不如我去食個飯先啦！」我提議。

「都好呀，你想去邊度食？」老實說，我一向對食物沒多要求，所以便隨便到一家連鎖牛肉飯店解決生理需要。

「this, this, this」我用着差勁的英語勉強向店員溝通，在旁邊的昕昕卻莫名的竊笑。

「做咩呀？」我疑惑的看着她。

「唔話你知等你心思思！」雖然她處事成熟，卻常常把自己孩子氣的一面顯露出來。

說時遲那時快，一碗熱騰騰的芝士牛肉丼被送到桌前。



飯香充斥着整個店鋪，半融的芝士完美的融合着牛肉，熱氣亦隨即湧上，把我的眼鏡弄得滿是蒸氣。

此時，昕昕笑得完全不能自理，像是在恥笑人似的。

「有咩噉好笑呀？」我不耐煩的說道。

「你知唔知，喺日本呢，佢哋會叫啲毒男做芝士牛肉丼㗎！我而家終於都知點解喇！」她繼續捧腹大笑。

雖則我可不是個瀟灑俊俏，風流倜儻的美男子，但自己的模樣也不算太像個毒男吧！

鼻樑前架着的眼鏡更爲我加添了點書卷氣呢！

「唉！我真係冇嘢講呀！你慢慢食啦！」她此時掩着眼，仿似陶大宇般恥笑着，可我只感覺到她那股傻氣，所以也感到心中甜絲絲的。



吃畢飯，我們便乘着地鐵到下一站：秋葉原。

「其實你明明可以帶住我瞬間轉移，點解要搭地鐵嘅？」我疑惑的問。

「咁搭車都係體驗嚟㗎嘛！唔通好似旅行團走馬燈咁去嗮啲景點影下相就算喇？」她認真的說。

可能我真的不懂如何旅行吧。

「仲有，可以畀我唞吓，唔使用噉多元氣，哈哈！」

「唔好玩喇，人地搭車唔講嘢㗎！」她挑逗的拍着我胸口。