廟街有殭屍（已在各大書局上架）: 第四十六章

牠一躍來到地面，笑了笑，其他殭屍對牠甚是害怕，像動物看見更猛獸的可怕，紛紛退後，本來塞得水洩不通的街道頓時騰出許多空位來。
 
本來激戰得喘不過氣來，忽然靜如止水，有點違和感。
 
牠拉一拉自己的領呔，說：「我哋又見啦。」
 
「今次唔着唐裝啦？」我問。
 
牠拉開黑色的西裝外衣，內裏還是唐裝，西外中內，格調古怪，不倫不類。
 




這一次終於認真看清牠的面目，雖然牠滿身皺皮，但跟其他的殭屍不一樣，牠除了眼睛是黃色外，沒有其他地方像殭屍，沒有殭屍的面色蒼白，反而如一個普通人有血色。
 
「師兄啲Taste幾有趣，係咪啱啱出省城，使唔使我幫你執執佢。」我問。
 
「啱，講多啲嘢，我怕你之後無得再講咁多。」牠說。
 
「啱嗰個係你，你上次殺死小君條數都未計。」我說。
 
「係你哋嚟搵我，怨得邊個。」牠嘲笑說。
 




「明明佢只係一個普通人。」我說。
 
「可以報仇呀，我無所謂，反正我接到命令，今日長洲一定要有一個人死，而家長洲已經再無活人，所以嗰個只會係你。」牠脫下西裝和領吠。
 
「或者你計漏咗，死嗰個係你。」
 
我疾劍刺去，牠往後一退，一退便是數丈外，輕鬆逃過我的劍。我應勢而上，偷吃身步，右掌擊出黃符，左手向下猛斬，牠又是一退，用手抓住我的右腕。
 
「太慢。」牠說。
 




我掙脫開，回身一掃，牠用利甲一擋，我左撥右刺幾下，劍勢雖快，每下都差點中劍，但牠躲避更快。
 
「哈哈。唔錯，但比起你個靚女南門一族都仲係差得多。」牠笑着說。
 
「咁你無理由殺小強都要佢出手嘛。」
 
牠怒目而視，說：「你真係好多嘢講。」
 
「Ok啦，對住啲就死嘅人，我都想同佢講多啲嘢，驚無機會。」
 
「我就睇下你係咪仲咁嘴硬。」
 
忽然，眼前又再出現母親的影子。
 
「阿辰。」




 
「媽媽⋯⋯」我搖搖頭：「唔係⋯⋯妳唔係真。」
 
「阿辰，你唔係我哋個仔，喺我哋家庭入面只係一個外人。」
 
「唔係⋯⋯」
 
「你係外人⋯⋯」
 
我抱頭大叫，一下拍打自己的頭，眼前幻覺又散，出現的是牠的身影，正嘲笑不已。
 
「所以話，人類係低等。」牠說。
 
我持劍前衝，牠轉身避開我的突刺，一手抓住劍，我竟然完全發不上力。
 




「你哋啲所謂墨氣呢？唔係話可以克制我哋咩？」
 
丁點都移動不了，我是被牠完全壓制住。
 
「好啦，小把戲玩完，死啦。」牠說。
 
我左手欲揮拳解困，卻被牠一手捉住雙手，啪的一聲，牠往外一拗，我感到雙手關節位發熱，如火炙劇痛，扭曲成彎，顯然已斷。
 
「已經係廢人一個，你無救啦。」
 
牠露出獠牙，想往我的頸咬去，我嚇得後退，牠一躍來到我身後，速度快得驚人，完全是人類的眼球不能捕捉的，從後捉住我。
 
「認命，加入我哋。」說罷便往我的頸一噬。