【穿越/愛情】《我同鍾意咗十一年嘅人表白，佢竟然跳海死咗》: 八十二（續）

我深呼吸了一口氣，用作紓緩過份躍動的心跳。
「親愛嘅胡皓晴小姐，今日將會係我哋嘅大日子。」
我刻意地用響亮的聲音讀出，攝影師反應不大，反而是吸引了其他本來在忙碌中的人都望了過來。
「因為今日既係你嘅結婚日，同時，亦都係我嘅失戀日。」
我說出了這句，刻意再偷看了攝影師一眼，確定他並無異樣之後，我心中肯定，他並未有讀過卷軸中的內容。
既然如此，那就完全地正中我的下懷了。
 
「我失戀，係因為我即將要失去一個鍾意咗足足十一年嘅女仔，亦都即係你。
可能你一直以來都會估到少少我對你有好感，但我相信你唔會知道嘅係，其實喺我哋未曾對話之前，我已經鍾意咗你。
而你，只係用一個笑容，就俘虜咗我十一年，聽落都幾著數啊可？」


我一邊說著，一邊留意到新娘房和攝影師也沒有太大的反應，反而一些認識阿晴許久的人，包括蕭揚和九公似乎都察覺到我所念的內容有點不妥，所以愈多愈人都停下了手上工作，暗暗地留意著我所讀出的內容。
 
「我相信你唔知道嘅嘢仲有好多，因為我從來都無對你講過。
同樣地，我估我自己亦都錯過咗好多你嘅心意，因為你亦無同我講過。
呢十一年嚟，我哋就係咁，你追我躲，又或者一齊將心意收收埋埋，結果去到今時今日，大家從來都無機會聽到對方最心底嘅心意。
我諗起，當你正式拍拖嘅一刻，我曾經好嬲，好嬲你點解要背叛我哋之間嘅感情。
雖然我哋一直以來咩都無確認過，但我以為我哋嘅關係係大家都心照不宣嘅，我亦都以為大家總有一日會開口向對方表白，然後幸福咁一齊。
所以當你拍拖嘅時候，我真係有一種被背叛嘅感覺。
但到最近我諗明白咗，原來我哋嘅關係之間無背叛者，因為我哋兩個所背叛嘅，係自己嘅感受，自己嘅幸福。」
以我此時的聲量，我相信新娘房中的阿晴一定能夠聽清楚我的一字一句。


可是裡面尚未有什麼反應，我便視為她仍然在聆聽，所以我就繼續說下去了。
 
「我哋一直以來，其實都無去坦白咁面對過自己嘅幸福同感受。
我明知自己最需要嘅係你，所有曾經有過嘅幸福嘅時刻都有你，甚至我嘅青春都充滿你，但偏偏我就將你推向俾其他人，仲同自己講『只要你幸福，我就可以幸福』。
然後我發現，我唔敢坦白去面對自己心意嘅原因，就係因為我怕，我怕自己俾唔到幸福你。
要承擔一個人嘅幸福並唔容易，更何況係一個我一世人最重視嘅人。
所以，我真係怕，我怕我呢一個咁普通，咁幼稚去追求緊夢想嘅人，俾唔到最好嘅幸福你，所以我先期望由其他人去俾幸福你。
但係，當我當我失去咗你之後，我發現原來比起好多遙不可及嘅夢想，其實我一直以嚟最重視嘅，係近在身邊嘅你。
雖然呢個領悟嚟得好遲，但我好清楚自己，好想好想，親自成為俾幸福你嘅人。
因為，我先係嗰一個識得安慰你、氹你、解開到你啲字謎嘅人。


因為，我先係嗰一個會還你清白、幫你趕走瘋狂追求者、而且衷心想你幸福嘅人。
因為，我係嗰一個會因為你一個笑容而鍾意你十一年嘅人。
因為，我相信自己需要有你，我先可以幸福。
 
當然，我知道，唔敢相信自己可以為對方帶嚟幸福嘅人，唔止我一個。
因為你都係。
但係，胡皓晴，我想話你聽，即使你咩都唔做，你都可以令我幸福。
有你嘅回憶，就係幸福。
有你嘅時刻，都係幸福。
我知，可能你會介意你嘅家庭背景，但我想講，即使我唔算有錢，但我可以陪你去探你媽媽，去關心佢，愛佢。
比起物質，我相信佢更希望填滿佢嘅係嚟自你嘅關心同愛。
而我，好願意同你一齊去面對所有你有嘅壓力同擔心，因為，只要同你一齊，我就可以幸福。
而你，永遠都無可能成為我夢想嘅阻礙。
因為，你就係我嘅夢想。
 


呢十一年嚟，我哋都各自收埋對對方嘅心意，將擔心、問題、困難、矛盾俾哂自己一個面對。
所以我自己好難過，而你自己堅持得好辛苦。
既然我哋各自都想對方幸福，既然各自都堅持得咁辛苦，點解就唔好好哋信任對方可以分擔自己嘅重擔呢？
好多嘢，一個人面對嘅時候總係覺得好難，但係一齊面對，一齊解決嘅時候，可能就會輕鬆好多。
所以，即使我有夢想，我會想有你同我一齊去追。
即使你有家庭嘅背景同擔心，我都會同你一齊去分擔。
無錯，係一齊。
 
十一年啦，我哋從相遇、認識、成為好朋友、直到見證你拍拖，到今日結婚，喺入面我哋有快樂，亦都有遺憾。
而嚟到今日，我相信，又係一個為呢一個階段落一個定義嘅時候。
到底跟住落嚟我哋會幸福定係會遺憾呢？
我都唔知，因為未來，依然係喺我哋嘅手入面。
咁即係話，幸福抑或遺憾，決定權仍然喺我哋度。
阿晴，我知道喺今日呢個時候講呢啲嘢好唔合適。
但係，我覺得今日嘅我哋都要成長啦，係時候要去面對真實嘅自己。


不如咁啊，俾一個機會我哋自己，去面對自己嘅感情，去相信自己可以成為對方嘅幸福啊，好嗎？
 
當然，我知道，今日係你嘅結婚日子。
所以，我其實唔係想要你逃婚或者做啲咩嘅決定。
我只係唔想你違背自己嘅意願去步入人生一個重要嘅階段。
所以，我想俾你明白埋我一直以來嘅諗法。
若然，你相信你將會幸福嘅話，我會衷心嘅祝福你。
但係，如果你仲有一點猶豫嘅話，我想你再俾自己諗清楚。
 
阿晴，無論如何，我只係想你知道，你係一個值得被愛嘅人。
你嘅善良，你嘅遷就，你對身邊人嘅關心，每一樣嘢，我哋都好珍惜。
無講論你嘅背景同成長係點，都唔可以抹殺呢一點。
 
而到最後，我有四句說話想同你講。
呢四句說話，我一直以嚟都無講，但今日既然決定要坦白咁面對自己，我決定講埋。


阿晴，好多謝你一直以嚟嘅照顧、陪伴同埋愛護，而且我相信，你暗地裡亦都為我考慮咗好多嘢。
阿晴，好多謝你出現喺我嘅人生入面，可以遇上你，我已經覺得係一種幸福。
阿晴，好多謝你成為咗我鍾意嘅人咁耐，即使你唔知，但我覺得鍾意你嘅嗰一個我，總係會特別有衝勁，特別想為你而更加努力。
 
阿晴，我愛你，希望我哋一齊都可以擁有真正嘅幸福。」