【穿越/愛情】《我同鍾意咗十一年嘅人表白，佢竟然跳海死咗》: 最終番外篇（三）

「可以自由為穿越者開眼同埋用假原因解釋，又可以調配見習天使出現時間咁巧合嘅人，就只有我上司。」天使笑著把答案說出。
「所以你係話我成功救到阿晴，係因為上帝幫我？」我驚訝地說。
 
「啱咗一半。」天使伸出手指搖了搖，「天堂批准阿晴將穿越機會換俾你嘅第二個原因，係因為我上司想見證一下，人喺面對遺憾之後，將會有咩嘅反應。」
聽了這個答案，我一時間因為過於驚訝而回應不了。
「所以我上司除咗批准阿晴將穿越時空嘅機會俾你之外，亦刻意安排香姨、撒拉斐爾、仲有見習天使基斯拿嘅出現，目的係想佢哋可以令你無意中發現我同阿晴嘅安排，然後俾你喺完全知道真相之後，決定到底會繼續選擇跟隨阿晴心意咁揀放棄記憶重新開始，定係搵出另一個有可能嘅未來。而結果，你確實成功喺背負遺憾之下，為自己打開翻希望嘅大門。」天使加許的對著我笑說。
這時候，我心裡既是慶幸自己作對了決定，同時也不禁笑著埋怨道：「其實你上司唔係咩都知嘅咩，咁洗咩搵我嚟試呢。」
天使漫不在意地笑舉起一根手指說：「所謂人有自由意志，所以先有Doctor Strange所講嘅無限可能性，我上司的確知道所有可能性嘅發展，但最後邊一個結果會出現，其實都全在你嘅決定之中。」
 
聽完天使的話後，我既是明白了整場穿越的底蘊，但同時也像明白了甚麼。


即使確實有命運、有滿天神佛，可是自己的路，還是握在自己的手上。
就像我跟阿晴的關係，若不是當天選擇了放手一搏，即使箇中有巧妙的安排，美滿的結局也決不會臨到我身上。
所以，其實要期待美好的命運或是上天保估之前，其實更值得先讓自己準備好迎難以上，為自己的前途負起責任的決心。
 
「點啊，咩都明哂啦？」天使饒有趣味地看著我，似乎等著我繼續發問。
既然他擺出這副資態，我也不跟他客氣地發問了：「咁你之前話過要完成哂成個穿越旅程呢件事呢？點解到而家我仲未洗穿越翻去第一個同阿晴相識嘅載點到嘅？」
天使滿意地點點頭，應該是代表我問對了問題，然後說：「你上次昏迷一年加輕微失憶，係因為你強行穿越到一個重複載點嘅結果。當然你亦估得啱，因為載點同你曾經走過嘅兩次歷史只有少許相同，所以後果算係輕微。但其實亦因為呢次強行嘅穿越，令你嘅體質出現咗變異，簡單嚟講，就係你永遠無可能再穿越，亦都所以你嘅穿越之旅需要強行終止。」
天使的解釋非常合理，這就解釋了這一年來我相安無事的原因。
 
「當然呢件事有好有壞，好嘅，就係因為你被迫強行終止穿越之旅，所以未能夠令穿越嘅過程完成，亦因為咁，穿越嘅記憶將會繼續留係你個腦度，唔會消失；但唔好嘅係，因為你永遠失去穿越嘅權利，所以即使你意外死亡，你都無機會享受穿越回味過去嘅機會啦。」


天使的補充不但完全解答了我內心的疑問，也同時讓我感恩這趟美好的旅程可以永遠留在腦中。
至於意外死後不能穿越的問題，嗯，唯有以後走路時小心留意一點吧。
 
「好啦，我見你心入面都無咩問題啦，咁我要走去做嘢啦。」天使站了起來，伸展一下。
「係喎，你又話而家無做天使啦，咁你仲要做咩啊？」我好奇地問。
「我上司話我咁鍾意管埋啲情情塔塔嘢，所以要我穿越古今中外，撮合一萬對情侶幸福美滿咁白頭到老，我就可以變翻做天使喎。所以而家我又要周圍去幫人拉紅線啦。」天使無奈地笑說。
「聽落都幾有意義啊，幾啱你做啊。」我笑著說。
「比起陪死人穿越，我都鍾意而家做嘅嘢多啲。」天使點了點頭，然後說：「而我可以做呢份新工，全靠有阿晴同你俾到呢個經歷我，所以其實今次我出現，最主要嘅目的，係想送份嚟自天堂嘅禮物俾你哋。」
「禮物？」我驚訝地說，同時心裡快速地運轉著，到底天堂有甚麼禮物呢？
難道是金莎朱古力？


 
只見天使走到熟睡中的阿晴身邊，輕輕用手按在她的頭上，然後閉上了眼。
不到片刻，天使重新張開了眼，走到我的身邊，把背上的雙翼展開，竟似是準備要離去。
「份禮物呢？」我疑惑地問。
「送咗啦。」天使笑了笑說：「啱啱我已經將阿晴舊歷史同新歷史嘅回憶送翻哂俾佢，就當係俾你哋嘅小小禮物啦。始終我都相信，即使回憶帶有遺憾，但只要善用，遺憾亦可以成為映襯美好將來嘅綠葉。」
 
就在天使說話的時候，我感到肩膀上有一陣涼意。
我小心地轉頭過去，只見仍在熟睡中的阿晴竟然從眼角中流出了一行淚水。
也許此刻在睡夢中的她，正重溫著那些她遺忘卻實際經過過的畫面。
由死亡，到一心讓我得到幸福的佈局設計，再到最後重生的結果。
我猜不到阿晴正在腦海中經歷的是哪一幕的回憶。
因為每一幕，我都覺得值得感動落淚。
 
我看著天使，而天使則意味深遠地笑著看我。
「你要記得，以後你都無機會穿越㗎啦，所以，唔好再俾機會自己遺憾啦。即使有，都記得要儘快彌補啊！」天使雙翼拍動，準備離去。


「知道。」我滿懷感激地向天使點頭，突然又想起了一事，問道：「係喎，每個天使都有名，我一直未知你叫咩名添！」
「我叫丘比特。」天使留下了最後的一個笑容，然後就振翔飛翔而去了。
 
聽著天使的名字，我突然又明白多了為何他一直在意我與阿晴的關係。
也許，愛神丘比特不是天生的命運而令他成為愛神，而是他選擇了讓愛情成為他命運的主題。
就在我還在目送著天使遠去的背影時，旁邊的阿晴傳來了一聲呵欠聲。
「醒啦？」我看見她眼角還有殘留的淚光，不禁笑著替她擦淚。
 
「我啱啱發咗一個好真嘅夢啊，好似真實發生過，但又好似一個夢。」阿晴半醒半呆地對我說。
「關於咩㗎？」我笑著問她。
「有死神、天使、仲有我死咗，然後你又穿越時空救翻我喎。」阿晴將夢境娓娓道來。
「如果我話，你講嘅都係真係發生過嘅呢？」我仍然笑著說。
「嗯.....雖然好難相信，但唔知點解，連我自己都覺得自己好似經歷過呢啲事咁，但係......邊有可能呢？」阿晴疑惑地搔著頭，一臉不解。
「唔發夢，又邊可能夢想成真呢？」我笑著說，「世上有好多嘢都係估唔到嘅。」
「咪住先，你咁講，唔通個夢係真嘅？你真係穿越過時空救我？我真係死過？」阿晴驚訝地說。


 
「我最近將我哋嘅故事寫咗做一個劇本，不如你聽下，睇下你有冇印象？」我輕輕用手抱住了阿晴，讓她更靠近我一點。
阿晴「嗯」的一聲表示同意，聽話地挨近了一點。
在說故事之前，我沒有放過她靠近的好時機，輕輕在她唇上香了一口。
阿晴輕笑著拍了我一記，卻沒有讓柔軟的唇離開。
 
「好啦，再錫就講唔到故事啦。」我在長吻中含糊不清地說著。
「明明係你錫人先嘅。」阿晴在我唇上輕輕咬了一口，這才鬆開口來。
 
於是，我開始說起了我們的故事。
一個從觀塘碼頭而起的故事。
一個因為表白而跳海，因為死亡而令愛情重生的故事。
這是一個美麗的故事，至少阿晴一邊聽，一邊不住地笑住落淚。
而這個故事的唯一缺憾，就是還未有一個結局。
 


因為結局，還在我與阿晴的手中。
未來，將由我們合力選擇出無數可能中的美滿結局。