求神畀我出一次Pool，點知畀埋個偶像男朋友我: 8

Richard看著姐姐，阿軒看著我，我不知道看哪裡。

陳浩賢見狀便對我說：「平時你同家姐食唔夠咩，我哋又唔會食咗你，一齊坐啦～」

同時，姐姐也向我報以懇求的眼神。

「好啦好啦，我講笑咋嘛，個個咁認真都有嘅。」我只好打趣地說。

最後，我和阿軒並排靠坐在沙發邊，陳浩賢則坐在對面。



「食咩好呢？」陳浩賢望著餐牌喃喃細語。

「我諗好喇。」我想了一秒便說。

來到西餐廳，當然要選卡邦尼意粉了。

材料不太複雜，最少機會出錯。

「你哋揀咩啊？」阿軒朝向我問。



「卡邦尼意粉！」我和陳浩賢同時應聲說。

「通常餐廳最唔伏都係呢個。」陳浩賢解釋。

沒想到我和堂堂男神對於西餐的想法居然一樣。

阿軒說：「咁我都跟你哋啦。」

「啊，我突然想轉墨汁帶子意粉喇，好似好味啲。」雖然價錢貴一些，但為了表現自己跟他們口味不一樣，我唯有屈就一下。



結果，阿軒跟我一起轉點墨汁意粉，只有陳浩賢一人點卡邦尼意粉。

「好好味！個汁唔會太乾身，煙肉同溫泉蛋都好match！」浩賢說。

眼看他吃得津津有味，我和阿軒卻默默吃著又貴又乾的墨汁意粉，害我心裏不禁咒罵著他們。

「係呢，你有無聽過呢首歌啊？Richard介紹我聽。」突然，阿軒把手機遞給我看，是BU的《愚人節》。

原來Richard就是介紹給姐姐聽的那個人。

「咦，尋晚先聽完，BU寫㗎嘛，幾好聽啊！」

「我平時少聽Rap，但佢啲歌曲風係幾特別，嗰首處女作《夏娃》都唔錯，auto-tune得嚟又唔會太難入耳。」看來阿軒在討論音樂時便會變得多話。

「係啊係啊，佢好有才華，填詞作曲主唱都係佢一條龍。」一找到知音，我也變得積極起來。



這時，我瞧到對面的陳浩賢只顧滑手機，看來「男神」並不把別人的作品放在眼內。

「係啵，你哋讀音樂，不如用你哋角度講下呢首歌啦。」我故意這樣問，為的就是看這個「男神」是何方神聖。

這果然挑起了陳浩賢的興趣，一同加入討論，令我這個音樂門外漢有點難以消化，但也獲益匪淺。

「咁其實呢首歌講緊咩？」我提出了最讓我疑惑的問題。

「呃，每人對一首歌嘅詮釋都好唔同。」阿軒應。

「與其去諗寫詞人講緊咩，不如用心感受，可能更有驚喜。」浩賢附和道。

「哈哈，藝術家果然都係一樣，講咗等於無講咁，不過有趣嘅。」



這頓飯過後，我突然覺得阿軒並沒有很奇怪，浩賢也沒有想像中難相處，但他們都不像是我出Pool的對象。

「喂，你哋三個好似幾friend咁喇啵！」Richard走過來說。

「ok啦～」我逞強地說。

「係囉，ok啦～」浩賢模仿我的語氣說，阿軒只顧偷笑。

「行啦咁～」姐姐興奮地挽著我的手離開餐廳。

望著姐姐甜絲絲的樣子，我總覺得她今天過得特別開心，我卻是有點不是味兒。