是陳浩賢!!!!

這時,中年男人和阿軒也剛好跑到樓下,大家四目交接。

「阿軒,收手啦!我同Richard都唔想見到你咁。」陳浩賢勸說。

阿軒示意那兩個戴著面罩的男人先行離開,顯然是怕在大街出現太猖狂。

「軒少,你搞得掂?」年輕男人臨走時問。



阿軒點頭。

「你唔係開緊演唱會咩?」阿軒裝作冷靜問陳浩賢。

「係囉,你做咩喺度啊?」我看著黑捲髮、化了淡妝的他,心情有點莫名其妙。

陳浩賢這時用近乎寵溺的眼神看了我幾秒,然後嚴肅地看著阿軒。

「你知唔知你而家做緊嘅嘢我可以報警拉你?仲有之前你阿媽派人去搞沈絲絲補習社嘅女員工,仲有佢家姐,呢啲全部都有曬人證物證㗎!」



「我家姐?咩意思?」我不明所以問。

「我同Richard查到佢阿媽就係掌控神秘組織嘅女人。當日佢陰差陽錯由搞你變成搞到你家姐入院,阿軒係後來走上去問我鋼琴老師,即係你嘅前老闆先知係佢啊媽搞成咁。之後佢利用報錯仇呢點,同佢阿媽講真正嘅女員工未有事,借神秘組織啲人一直跟蹤你,達成自己嘅目的。」他轉向阿軒說:「我講得有無錯?」

「你都幾犀利,估到七七八八,但我阿媽都係因為你個老師唱佢無人要先會出手做嘢,呢啲叫因果報應,事後我都有問返阿媽攞錢幫絲絲家姐俾醫藥費啦,而家咪乜事都無。」阿軒一副理所當然的樣子說。

「阿軒,你講緊咩啊!!!佢係我家姐嚟㗎,就算佢而家外表真係乜事都無,你知唔知佢而家都因為你阿媽嘅自私,次次出街都提心吊膽㗎,有時訓覺仲會發惡夢大叫㗎!你個兄弟Richard都有受傷㗎!」

「我同你講,我哋係無!可!能!雖然你一直以嚟都對我好好,但我留意到你根本為咗滿足自己,無論煮飯、買禮物、拉BU嘅歌俾我聽,所有對我嘅好都係想我讚你。嗰晚喺我屋企已經俾我見到曬你啲真面目,我完全feel唔到你有諗過我嘅感受,就算我痛到喊咗出嚟,你知唔知啊?」



「我……我……」阿軒支吾以對。