「晴兒、絲絲,你哋快啲過黎啦!」

場內人群全部散去後,Richard在後台大喊,我馬上和姐姐,還有坐在不遠的童姐去看個究竟。

來到後台,只見陳浩賢一臉痛苦地抓著自己的手,Richard幫他倒水沖洗手腕上的紅印。

「你隻手咩事啊?應該唔會係……」

我聯想起那一幕……



「小心!」他說畢便一手把我擁進他的懷抱裡,剛好避過中年男人在我正面撥過來的液體,不然我便變成真人版月影千草。

「唔係掛,你為咗救我俾啲液體彈到手?你頭先成個鐘都忍著痛?」我望一望童姐,刻意不說出阿軒這名字,然後搶走Richard的位置,幫陳浩賢倒水。

「咩啊,演唱會之前你哋發生咩事啊?」姐姐焦急地問,我不敢嚇怕她,只好默不作聲。

「咁你哋要唔要報警?」Richard冷靜地打破沈默。

「要,一定要!我直覺係之前令我受傷嗰批人做嘅,佢哋都係針對阿妹㗎。」姐姐一語中的。



「唔使喇!我唔小心整到咋。」他望了童姐一眼,再打眼色給我。

「係囉係囉,而家call白車送你入院好過啦。」我靈機一觸說。

就這樣,場景由舞台搖身一變成病房,幸而被腐蝕性液體濺中的傷口不大,加上有一直沖水,將傷害減至最低,所以只需要留院觀察三天,但醫生說如果再遲一點求醫就會傷及血管甚至是骨頭。

唉,這次又是我間接導致身邊人受傷,還要是我最喜歡的人。

「嗚嗚嗚……好對唔住你哋啊,我真係累人累物,一次家姐同Richard,一次陳浩賢,都唔知下次係邊個……仲要本身咁開心睇演唱會,而家變咗去醫院。」我在大家面前不斷自責,泣不成聲,心想我這個沈絲絲真是徹頭徹尾的破壞王。



「唔係呀,我唔係咁睇啵~」童姐似乎是安慰著我,續說:「唔係你,我都唔知有人可以咁蠢搞咗咁多大頭佛,仲要今次搞著我個靚仔哥哥,同埋你都幾有自知之明啊!」她掩著嘴笑。

一聽到她這番嘲諷的說話,我更是放聲大哭,她說得沒錯,我就是如此笨拙,不單不懂得保護自己,還傷害了身邊人。

「啊,你個衰童童!」陳浩賢突然按捏她兩邊臉說:「俾免費飛你仲講咁多嘢啊拿~」

「咩啵~我有講錯咩?你頭先演唱會好正啊~~」被捏臉的她反而笑得更甜,真可惡。

我又要被捏!!!

「你係童童啊嘛?」Richard突然望著童姐怒火中燒說,童姐馬上用一副嫌棄的目光說:「你唔係靚仔哥哥,我唔批准你咁叫我,要叫就叫童姐!」

「是Q但,我唔理你!總之你呢個串柒柒、小學雞、臭童同我聽著,唔該你管好你屋企人,佢哋已經搞足我哋兩次,如果唔係同你阿哥老友咗咁多年,我哋都唔會俾咁多機會,再有第三次的話,唔好怪我哋無情講。」Richard居然一口氣把這個目中無人的小學雞代表童姐擊潰。

不知道童姐會如何反擊呢?



「我唔知!我唔識!我睇唔到啵!」哇,年紀輕輕的童姐善用了叻哥馳名的藍屍用語,Richard氣得無法說話。

「唉,一人少句啦,我仲喺醫院想休息下。而家成1點幾,童童你要返屋企喇~有無請司機送你啊?」

「有啊……哼,見係靚仔哥哥,我而家就唔同你哋班蠢材計~」童姐離開前還在陳浩賢耳邊說了一句話,但我聽到的就只有這些:「雖然呢個豬扒姐姐好蠢,但……」

可惡,她又在說我壞話,還說把我當成好朋友,真是的!