【奇珍異獸：愛情飲食系列】: 001 陪我行咗一次彌敦道嘅Annika（下）

Annika問我其實目的地係邊度，我只係答佢好快就會到。佢仍然係嗰種只要你答咗佢，佢就唔會追問嘅個性，真係 i’m lovin it。好在六年前嘅我，都唔係省油嘅燈，我好醒目咁望咗佢對腳一嘢，好彩嘅係佢著緊一對黑色高筒converse，而且條鞋帶仲好白吓。如果佢對鞋有踭，我諗我已經可以講定拜拜。好采，我無咁就咁補銷。行到去美都（當年都仲未翻新），佢望一望我就問句：「就係呢度？」。憑佢嘅語氣，我真係分唔撚到唔到佢係潤緊我，定係佢覺得呢度有啲特色、有啲得意。我當時九唔搭八咁講咗句：「歐錦棠都成日喺呢度食嘢」，佢應返我話：「你都幾搞笑。」之後就行得快過咁走咗入去。咦，我心諗，咁即係OK啦吓話，咁自動波。當時嘅我心情緊係忐忑到不得了，我又唔知佢係讚緊我定係彈緊我，但我知道我15、16都無乜作用。事旦啦，唔通我而家用縮沙嘅心態覺得佢句句窒住我咩。我當年運功使出我最大的自我，用最有自信嘅一面面對。屌，我緊係當全宇宙都讚揚緊我啦，唔係仲點食呀餐飯。

我嘗試極速咁立咗一眼。望左兩望之後終於係云云咁多隔離檯之中搵到個阿伯比較四正，而且有頭髮既；就同Annika講：「佢食緊嗰個焗排骨飯就最係呢度出名架喇」。我當下覺得Annika嘅眼神根本就喺度訴說我係一個好地道地嘅蔡瀾。

「好似好好食咁。你發板丫，我食咩都無所謂。」Annika笑起上嚟，對眼都真係跟住識得笑。
呢個moment，我就覺得我已經贏咗佢男朋友（我當時唔知點解有呢個諗法，而家都唔知當時自己點解會咁諗）。

山長水遠都肯行，而且停落嚟嘅時候只不過係噝一間好唔起眼嘅冰室食一個甩頭髮阿伯都食嘅焗排骨飯。雖然個個都話overpriced，但講真，喺冰室食餐飯又駛到幾多錢。衰啲講，有心有力嘅男仔好可能已經為第一次出街諗食乜已做晒功課。而我？我只係想用我自己想要對待對方嗰一面直接攤出嚟俾對方睇。咁樣嘅話，可以好多囡囡都會覺得我係無心肝，但係真性情唔好咩？
我真心認為覺得食咩都無所謂既女仔其實好可愛，呢一秒我覺得Annika做我好神，真係當之無愧。焗排骨飯送到嚟，我頭先心入面嘅自我懷疑都係時候暫時停一停。一如以往，佢地將放喺鐵盤度焗嘅排骨飯用匙羹『畢』晒出黎好似一pat嘢咁嘔晒出個碟度，以賣相黎講，我真心嗰句「以男仔角度嚟睇，都覺得好核突」。頂，我一心覺得呢度個懷舊feel唔錯，又覺得有啲隱世，又覺得得Annika應該未嚟過，而我忽略咗最重要嗰part：個焗飯好食唔好睇。



我用眼尾少少地咁望咗望Annika，佢望住個飯唔知我望緊佢。我心裡面覺得今次真係仆街騎尾香之際，Annika竟然對住嗰碟飯索咗一嘢之後話好香。痴線㗎，我喺心入面搭咗幾轉過山車喇。呢剎那，我覺得佢係無敵嘅。連我食咗咁多次，都偶爾仲係會比堆飯個賣相嚇親（今次阿叔算係整得好企理，當然碟飯仍然是狗食，亂鳩咁『畢』出嚟），但我個女神竟然不顧賣相咁話個飯好香。當時，我真係覺得Annika已經成功超出我唔覺意之吓set出嚟嘅試煉。

呢一晚，我送Annika去到佢屋企附近嘅地鐵站，佢同我講：「送到呢度好喇廢事比屋企人見到。」我叫佢返到去send個message俾我，唔駛五分鐘我就收到佢話「到咗喇」。之後嗰日我完全覺得自己得米，不過我同Annika都仍然互相無send過任何message俾對方（原來六年前嘅我係咁冷靜，咁放心，咁隨緣）。我唔想諗嗰晚其實係咪踩親佢條尾而自己不自知，更加唔想諗係咪自己美化咗成個約會。

隔咗一晚，我幫Awesome去拎相，去開附近我又去咗美都。唔知係咪因為有啲掛住Annika，所以我自己叫咗果個賣相真係好惡頂嘅焗排骨飯嚟食。我內心嘅OS係「其實阿哥你都可以砌靚啲先拎出嚟」，搞到兜飯咁核突，我點溝女。當然，呢度無人會理你內心既悲嗚，況且呢啲嘢我根本無講出口。忽然我覺得，兜飯其實咪好似我囉，我無修飾咁帶咗Annika嚟食飯，事後諗吓去邊食嘢都無。所以埋單前，我send咗個message俾Annika，問佢做緊咩……