[穿越][愛情][校園]重回青春時尋找當年失去的愛情: 穿越的機會

「你係邊個?係彤彤嗎?」突然我頭痛欲裂，我懷疑我是喝醉之後出現幻覺。

於是我伸出我的右手，嘗試觸摸小彤的臉龐。

「你做乜嘢?我唔係你口中講嗰位彤彤呀!」穿著白衣的女子一下拍開我的右手，叉著腰有點憤怒。

「你唔係彤彤咩?」我揉一揉眼睛打算看得更清楚。

「咦，唔好意思，你好似我認識嘅一個女仔。」我看得更清楚發現這位穿著白衣的女子真的不是小彤，純粹只是人有相似。



「咁你係邊個?」我有點失落坐回公園的長椅上。

「我係嚟幫你嘅人，你唔需要知道我嘅身份，我淨係想問你一樣嘢。」白衣女子平靜地說。

「問咩?」我答。

「你係咪仲係好鐘意你口中講嗰位彤彤?」白衣女子表情有點得意洋洋。

「係......唔係，你點知架?」我感到有點驚訝。



這是我已經埋藏在心裡十多年的心事，即使我在入了大學之後，還是出來工作的時候都只是拍了兩次拖。

「你係咪忘記唔到你中學暗戀嗰個女仔?」每當我兩個前度與我分手時都會問我這句說話。

「對唔住。」我每次分手都只能夠說這句話去回答。

我從銀包拿起一張我與小彤中學時的合照，心裡不禁升起一絲惆悵。

「好啦，見你咁慘，咁我而家俾個機會你返到中學初初識小彤個陣去改變你同小彤之間嘅關係，好唔好?」白衣女子問。



「哈哈!」我苦笑了一聲「你當而家拍電視劇可以穿越過去嘅時空咩?唔好玩我啦!」我顯然不信白衣女子的說話，打算繼續喝我的啤酒。

突然一陣怪風吹來，我手中的啤酒罐被吹到在地上，我看見白衣女子的神情有點憤怒，背上長了一雙翅膀，緩慢地向我飛過來。

「你點解有咁嘅力量架?唔好過嚟呀!」我驚慌地說。

「咁你要唔要呢個機會?唔要嘅話，我走啦!去幫其他人好過。」白衣女子說完後打算離開。

「唔好走住!」我阻止白衣女子離開，白衣女子停下了。

「好，我決定要呢個機會。」我考慮了一會兒說。

「咁就得啦，我而家帶你回到過去啦。」白衣女子突然嫣然一笑，收回背上的一雙翅膀。

「啊，我唔記得同你講有個規矩就係係你dse放榜後一日，我就會帶你返嚟2020年嘅時空。」白衣女子向我說。



「吓，我唔係可以唔理而家嘅嘢，回到過去一齊同彤彤生活落去咩?」我有點失落。

「唔係，為左唔好影響現實嘅時空太多,我唔可以俾你留係過去嘅時空太耐，但若然你對小彤愛嘅力量夠大，小彤感到幸福，就足以改變過去令現實出現變化。」白衣女子解釋。

「哦，咁好啦!」我說。

「啊，我仲有一樣嘢想問，當年究竟發生咩事令彤彤唔再理我?」我突然記起小彤臨走前的一句話，可能就是因為那件事令我和小彤越走越遠。

「你回到過去重新同小彤經歷一次咪知囉!我只可以講係發生係放榜之前，你一定會經歷到，到時就會知架啦。」白衣女子解釋。

「好啦，講左咁耐，都未問你叫咩名。」

「我......我......」白衣女子好像有難言之隱。



「唔緊要啦，我見你著到成個天使咁又同彤彤有啲似，我就叫你天使彤啦!」

「好啦!唔好講啦我哋開始啦。」天使彤好像有點臉紅。

天使彤從懷中拿出一個水晶球，並把手放在水晶球上。

「你將你雙手放係水晶球上面啦。」天使彤說。

我將雙手放在水晶球上，手指不經意碰到天使彤白滑的手。

天使彤默不作聲，但我看到天使彤臉上浮起一絲紅暈。

突然水晶球發出一道強光將我和天使彤包裹在內，強光亦使我不能睜開眼睛。

幾十秒後，公園地上只剩下幾罐啤酒，而阿俊和天使彤都消失得無影無蹤。