我與小彤一出到校門之外,就商量吃什麼東西好。

「是但一間茶餐廳都冇所謂啦。」我說。

「唔洗同我慳錢bo。」小彤笑道。

「唔係,係我想食茶餐廳呀。」我說。

「嗯,好啦,我知附近商場有間茶餐廳幾好食,不如去試下啦。」小彤想了一會說。



「好呀,唔好講咁多,行動最實際。」我急忙說,因為我都肚餓了。

我與小彤之後來到了一間餐廳。

「呀,我突然記起一件事,你記唔記得聽日要選班長?」小彤一邊食一邊問。

「吓,係咩?」我有點驚愕,可能因為我剛剛才來到這個時空,所以很多記憶還未記起。

「哼,你咩都唔記得,咁你記唔記得我琴日放學問你嘅嘢?」小彤說到這突然低頭而且臉有點紅。



「我真係唔記得。」我不停地撓著頭,嘗試記起小彤昨天說過的事。

「吓,你真係唔記得架,算啦,咁你應唔應承我一齊選男女班長,你琴日話返屋企之後會考慮下架?」小彤聽到我忘記她所講的事神情有點失落,

「點解係一齊選嘅?」我問

「琴日李sir話如果有同學選想班長既話,除左選個陣要拉下票,就係要自己搵埋partner一齊選,方便之後互相合作。」小彤解釋

「咁樣呀......」我聽到思考了一會。



在我思考期間,我突然聽到了一把熟悉的聲音在隔離桌子發出。

「阿軒,我哋聽日不如一齊做partner,我唔想俾楊小彤做班長,見到佢就覺得乞人憎。」那個聲音說。

我頓時那把聲音發出的位置看過去,原來是我們班的其中一位女同學黎楓芷正說服我們班另一位男同學阿軒一起競選班長,亦令我回想起當年有關於黎楓芷和小彤一起競爭班長的往事。

黎楓芷,她是我們學校中一時的全級第一,也有一定的美貌,不過後來隨著小彤轉到我們學校,在很多人眼中她的美貌不及小彤,當然在我心裡也是同樣的看法,而且連成績也被小彤超過,所以黎楓芷一直都視小彤為中學時期的競爭對手,甚至到中學畢業也一直針對著她,所以我也對她沒有太大好感。


「阿俊,你同我一齊做班長好唔好?」我記得當年的小彤也央求我一起搭擋競選班長。

但是當年的我卻因為我的毒X性格,所以沒有答應小彤,甚至最終支持了黎楓芷和她的搭擋擔任班長的職位。

「小彤,唔好唔理我啦。」我記得小彤之後有一陣子非常生氣,無論我怎樣找話題,她還是不理睬我。



「小彤,唔好嬲啦,我支持黎楓芷做班長,係因為我由中一開始已經知道黎楓芷有返咁上下的能力。」我急忙解釋

「咁你即係唔信我啦?」我看見小彤眼泛淚光

「唔係呀,唔係呀,我哋係好朋友,我點會唔信你,最多你以後要選咩,我都支持你。」我急忙哄著小彤

「真係?勾手指尾啦。」小彤破涕為笑,並伸出她的尾指。

「得啦,唔好成日喊啦,成個細路女咁。」我也伸出我的尾指去勾著她的尾指

「哼,你話邊個細路女話。」小彤扭著我的耳朵說

「冇、冇、冇」我求饒道





「哈哈,楊小彤你搵個毒X同你一齊選班長,我話俾你聽楊小彤,你聽日一定係我手下敗將。」黎楓芷的聲音將我拉回現實原來她已經站在我們旁邊。

「我哋一定會嬴你,小彤我應承你聽日我哋一齊競選。」因為想起當年的事,我突然有點不服氣大聲地說。

她們也許猜不到我有如此大的反應和決定,臉上均露出錯愕之色。

「好,敬酒唔飲飲罰酒,聽日你哋一定輸硬,阿軒我哋走。」黎楓芷說完後就拉著那位叫阿軒的同學走了。

「多謝你呀,阿俊,咁我哋快啲食完嘢返屋企諗下聽日點拉票。」小彤嫣然一笑後,隨即吃完手上的東西。

「你睇下你食得咁快,成個污糟貓咁啦。」我指著小彤的臉上笑著說。

「唔好郁,我幫你抺。」我拿出一包紙巾,細心地幫小彤擦去嘴角的污漬。

也許小彤看見我如此細心和有點親密的行為,隨即面紅耳赤。



「我走先啦,你慢慢食。」小彤急忙拿起書包離開了。

「喂,你未埋單呀,喂......」

「呢個大頭哈真係......,又話請我食飯。」我拿著銀包唯一的一百元結賬後也回家了。

「究竟聽日點拉票好呢?」我一邊回家一邊在想。
已有 0 人追稿