[穿越][愛情][校園]重回青春時尋找當年失去的愛情: 班會活動（下）

我聽到這個問題，心頭頓時浮起了當年的我錯過了小彤的情景，令她對我失望難過，甚至長大後看錯了人，最後更要成為單親媽媽獨力撫養自己的女兒，心裡就如同被千枝針刺在心，臉上就不自覺地流下眼淚。

「小宇，你做咩無啦啦喊呀？」小彤急忙用手將我臉上的淚痕擦去。

「其實我好想同你講我係穿越過嚟，想同你喺埋一齊帶俾你幸福，以後一齊生活落去。」當我想說這番說話時，我猛然想起天使彤跟我說穿越到這個時空的規矩。

「你唔可以同人講你係穿越過嚟，如果唔係我可能就會帶你走。」這句說話是當時天使彤在我一穿越到這個時空時說給我聽。

我只好把這番說話埋在心底。



「係呀彤彤，我應承你我以後都會陪住你係你身邊，你有危險嘅時候我唔會抌低你。我要保護住你等你唔會受到傷害。」

雖然我知道四年後的我就要離開這個時空，但我仍然想許下承諾，而這一次的我更加一定會遵守承諾。

小彤聽到我的說話後，眼泛淚光，而我感覺到我的肩膀上有幾滴水滴將我的衣服滴濕。

「多謝你呀，小宇。」小彤抹乾淨臉上的眼淚小聲地說。

「我同你使乜講多謝，我哋慢慢行返去碼頭啦，好唔好？」



「嗯」

臨近黃昏，在夕陽的照耀下我揹着小彤的身影由兩個身影合而為一。

「小宇呀？」

「嗯，咩事？」

「你覺唔覺得人生有時真係好變幻無常，有好多野如果唔而家去做，以後就未必有機會做。」小彤語重心長說。



我聽到這番說話奇怪着小彤在這個時空才14歲，為何會這麼快想未來人生是如何。

「係呀，不過彤彤你先得個14歲，做乜咁快諗以後嘅嘢呀？」

「冇啊突然之間覺得大個之後有好多野想做已經冇時間去做同埋做完嘅意義已經唔同而家去做嘅意義所以咪想問下。」小彤有感而發。

「唔緊要啦，你要記住我會永遠係你身邊無論係你而家或者大個之後想做乜嘢我都會支持你陪住你去一齊完成佢。」

「真嘅？你唔准講大話㗎，如果講大話點先？」小彤在我耳邊對着我說。

「我講大話嘅話就天打雷劈， 出街比車撞，跟住⋯⋯⋯」小彤用揞住我的嘴不讓我繼續說下去。

「你有意外嘅話，咁以後仲點樣照顧我呀？」小彤有點害怕抱着我。

「我只係想同彤彤你講我唔會講大話，我一定會講得出做得到。」



「嗯我信你啦，你揹我去嗰張長凳度休息下啦。」小彤向我投出信任的眼光，指着海邊的一張長椅。

於是我放低她在長椅上。

「小宇，我想食大魚蛋，不如你幫我去買？」

「好呀。」

五分鐘後，我就買來了一串大魚蛋，我看見小彤嬌柔的身影坐在長椅上，柔順披肩的長髮在海風的吹拂下飄逸，視線看着大海，好像有很多心事。

「彤彤，諗緊咩呀？」我走過去坐下並給她一串大魚蛋呀。

「冇啊只係覺得人生有好多拘束，冇得好似海鷗咁樣無憂無慮自由自在地咁鍾意做自己做嘅嘢。」小彤指着在海邊飛翔着的海鷗說。



小彤的這番話令我想起為何人的生活會這麼多掣肘，不能自由自在跟自己喜歡的事和人生活下去，尤其是經歷過過長大後去拼搏事業的我更有共嗚，令我覺得人生不免有點唏噓。

「係呢，小宇你做咩淨係買一串嘅，你唔食咩？」小彤見到氣氛有點傷感於是轉移話題。

「冇啊我食少少得㗎啦。」

此時小彤將串魚蛋放在我的面前示意我張嘴，餵我食了一粒魚蛋之後自己再食一粒，如此這般一串魚蛋很快就吃完。

「好啦我哋走之前不如我哋自拍一下。」小彤見差不多到集合時間要返碼頭，希望留一張照片作為記念。

「好呀。」我從褲袋拿出手機，之後扶着小彤坐在海邊的欄杆，讓她舉起我的手機準備拍照。

「Yeah !」小彤舉起「V」字的手勢，我也學她舉起「V」字的手勢。

突然之間，小彤好像坐不穩，差點向後跌，我匆忙攬住她的纖腰，而她的頭和我的頭貼在一起，她感覺到我的動作，呆呆地看著我臉蛋紅撲撲的十分可愛。



「喂彤彤你望鏡頭唔好望住我先快啲啦。」我緩解一下這個尷尬的氣氛。

「得啦，邊個得閒望住你，我數三聲就影㗎啦，1、2、3」我和小彤的第一張合照就此誕生，相中的我攬着小彤的纖腰，小彤的頭和我的頭貼着，神情異常親密。

「嗯幾好。」我看到照片之後心感滿足。

小彤看到照片之後，纖手擰着我腰間的軟肉。

「哇痛呀，彤彤你做咩搣我呀？」我感到腰間又有一陣痛楚。

「哼，鬼叫你抽我水啊，呢個係對你嘅懲罰，仲有罰你揹埋我去碼頭呀。」小彤蠻不講理地說，但語氣聽來毫無責怪的感覺。

「車明明係你自己差啲跌落去，我先扶住你⋯⋯」我小聲地反駁着。



「我話係就係，咁你而家揹唔揹我呀?」小彤有點生氣。

「好、好、好，我揹。」我拍着背脊示意她上來。

「小宇咁就乖啦，快啲行啦就夠鐘啦。」小彤笑臉盈盈地爬上來我的背脊，我也揹着她向住碼頭的方向離開。