[穿越][愛情][校園]重回青春時尋找當年失去的愛情: 初見未來岳母大人?
這個女人眉目間有著小彤的感覺，衣着雖然高貴，但是不知道為何會給人一種親切感。
「係呀，我返嚟啦，佢係我嘅同學叫阿俊。」小彤指着我說。
「auntie ，你好，我叫張俊宇，係小彤嘅同學。」我介紹著自己。
「auntie，小彤今日係長洲班會活動嗰陣受傷，所以我揹佢返嚟。」我解釋我在這裡出現的原因。
「阿女你做咩唔打電話同我講啊我搵架車去接你呀嘛。」小彤媽媽有點責備著小彤沒有通知她自己受傷。
「媽咪，咁我諗住唔洗咁大陣象呀嘛，都係扭親少少姐⋯⋯」小彤小聲反駁着。
「你睇下你隻腳腫晒，仲話扭親少少。」
「auntie，唔關小彤事，係我冇好好睇住小彤所以佢先受傷。」我見小彤媽媽好像責備着小彤，便幫她解圍，而且小彤的受傷我也有責任。
「阿俊你唔使咁講既，我知個女有時會有啲大頭蝦，我都未多謝你送小彤返嚟，都唔早啦，不如留低食餐飯，當報答你送小彤返嚟。」小彤媽媽看著手錶上的時間，笑着邀請我留下來吃飯。
「auntie，咁樣會唔會唔係幾好呀，好似有啲打攪你哋咁。」我有點猶疑。
「點會啊，多個人多雙筷姐，唔好講喇，快啲入嚟，你揹住小彤唔攰咩？」小彤媽媽說完後走進屋裡。
「快啲入去啦，我媽咪都叫你唔駛客氣，定係你係唔想係度食飯呀？」小彤在我背上有點失望問我。
「緊係唔係啦，點會唔想？」我摸著小彤的頭說。
「算你啦。」小彤扭著我的耳朵說。
於是我也用手機發了一個訊息給我阿媽，讓她今晚不用煮我飯。
我揹着小彤進去她的家裡，一進去她的屋裡，我發現原來也是如普通家庭一樣，不是特別華麗。
我揹着小彤並輕輕地將她放在梳化上，並坐在她旁邊。
「阿女你隻腳咁腫，有冇係出面買跌打酒返嚟？」小彤的家裡沒有跌打酒，於是小彤媽媽見到小彤的腳腫起，準備出外購買。
「auntie，我頭先同小彤係出面返嚟個陣已經買左。」我從袋子裏拿出一枝跌打酒。
「阿俊你真係細心，咁你幫阿女搽埋啦，我要準備去煮飯。」小彤阿媽向我打眼色。
「auntie咁樣會唔會唔係幾好呀？」我怕幫小彤搽跌打酒在她腳踝上的動作會過於親密。
「點會呀，啱啱我都見你直程揹埋阿女返黎囉，况且我見阿女個樣都幾開心又唔介意。」小彤阿媽好像知道我在小彤心目中的位置偷笑着。
「媽咪呀，你講咩呀？」小彤害羞得另一隻腳跺一跺地上。
「冇呀，我要去煮飯喇，阿俊你快啲幫阿女搽啦。」小彤媽媽說完這句後就進入去廚房煮飯了。
「咁⋯⋯⋯」我拿着跌打酒不知所措。
「算啦我自己攞嚟搽，畀我。」小彤伸出手打算拿我手中的跌打酒。
突然之間我捉着小彤的腳踝，她的身體雖然尚未發育完成，但她白淨的玉腿也令我心神恍惚了一陣。
「得啦，唔好郁啦，我幫你搽。」
「小宇你⋯⋯」小彤好像對我這個反應感到驚訝，但隨即流露出滿足的笑容。「好。」
我坐在小彤旁邊細心地替小彤搽跌打酒，過程中她也有時忍不住痛。
「啊，好痛。」小彤面有難色。
「忍一忍喇，一係彤彤你咬住我膊頭先。」我伸一伸我的肩膀到她面前。
「你會唔會好痛㗎？」小彤好像有點不好意思。
「唔會呀。」說完後我就用力揉一揉小彤的腳踝。
「啊⋯⋯」小彤慘叫一聲後一下咬着我的肩膀。
我忍着肩膀上所受的痛楚，很快就替小彤揉完腳踝。
「對唔住呀，小宇，我係咪咬到你好痛？」小彤看着我肩膀上紅紅的牙印有點擔心。
「唔緊要啦，彤彤，只要可以畀你忍到痛就得。」我心想其實都頗為痛楚。
「好啦，你哋兩個洗埋手過嚟食飯啦，已經煮好飯啦。」小彤阿媽站着廚房門口的旁邊笑容滿面。
「好。」我和小彤不知道是不是讓她的媽媽看見剛才的情景有點尷尬。
五分鐘後，我們洗好手就準備開飯了。
「阿俊啊，你成績好唔好呀？」小彤阿媽在吃飯時候問我。
「幾好，差過小彤少少。」我說完後視線看着小彤見她只顧低頭扒飯，不敢看向我。
「咁都幾好啊，阿俊呀你覺得我個女點？」小彤阿媽頓然問我。
我看見小彤停下了扒飯，靜靜地低頭等待着我的回答。
「係，我覺得小彤係幾靚女，又善解人意溫柔體貼，有時都幾可愛。」我想起之前與小彤去看電影和剛剛搽跌打酒的反應就覺得搞笑。
小彤聽完後面紅耳赤，不禁在飯桌底下搣了我的大腿一下。
「彤彤你做咩搣我啊？」我稱讚你也不行？
「哼」小彤不理會我的問題，繼續吃飯。
「阿俊，咁你之後要對阿女好啲，得閒多啲一齊出街，最緊要唔好影響學業就得。」
「媽咪你講咩呀，我同小宇又唔係你諗嗰種關係⋯⋯」小彤臉蛋紅撲撲的又跺一跺腳。
我聽得一頭霧水，她們口中所講「嗰種關係」是甚麼意思？
「得啦，唔通你係我嗰女我會唔知你諗咩，你從來都冇帶個男仔返嚟屋企嘅，動作又未試過咁close」小彤阿媽彷彿明白了一切偷笑着。
「阿媽啊，你唔好再講啦⋯⋯」小彤害羞地跺一跺腳。
突然小彤的家門前又傳來兩把男聲。
「阿媽」、「老婆」那兩把男聲對着小彤阿媽說。
「我哋返嚟喇，有飯食未啊？」