[穿越][愛情][校園]重回青春時尋找當年失去的愛情: 虛驚一場

「阿俊你知唔知Alan咩事？」阿明在上課的時候問我。

「唔知喎，做咩？」我想起上星期五在更衣室的事。

「冇啊，佢今日冇返，所以問下你會唔會知？」

「我都唔知啊。」如果阿明不說的話，我也留意不到Alan原來今天沒有上學。

放學之後，我看見小彤正在收拾東西準備離開，所以我打算趁此機會關心她的身體狀況。



「喂，阿俊聽日練波嗰度我有啲嘢同你講⋯⋯」豈料阿明突然上前擋著我的腳步跟我說話。

我看見小彤在阿明擋着我的時候就離開了課室。

「得啦，今晚WhatsApp 再講。」我沒有細心聽阿明跟我說什麼，只想快點收拾東西離開。

我揹著書包奔跑到校門外，發現小彤捂著肚子蹲下，神色痛苦。

「彤彤你冇事呀嘛？」我看見這樣的情況不敢怠慢慢慢扶起她。



「冇事⋯⋯我有啲肚痛姐。」小彤裝作沒有大礙。

「唔通當年嘅小彤係因為患有絕症先同我斷絕聯絡，表面上係去讀書，實質係去醫病？」看到這樣的情景，我開始猜測。

「咁你啱啱又痛到踎低？你係咪有咩病？我帶你去睇醫生啦。」說罷後我就打算帶著小彤到附近的診所。

「等陣⋯⋯」小彤卻突然抓著我的衣角。

「做咩啊？」



小彤紅著臉在我耳邊說了一些話，我聽到了那些話後感到非常尷尬。

「咁我唔知呢啲嘢呀嘛，我又唔會有⋯⋯」我搔著頭有點不好意思說，看來我想得太多。

「你仲講，呀嘶⋯⋯」小彤剛想舉起手想打我卻觸動了身體的痛處。

看到小彤痛楚的樣子，我腦海中忽然浮現出一個主意。

「彤彤不如你去我屋企休息下？我屋企又近啲。」

「不過你屋企冇人咩？會唔會唔係幾方便？」小彤問我。

「我阿媽近排有返工，夜啲先返。」

「咁樣⋯⋯好啦。」小彤思考了一陣子就答應。



在回家的路上，我扶著小彤慢慢地走。

「你望住我做乜？睇路啦。」在路途上不知道小彤為何一直看著我。

「冇啊，估唔到你都幾識照顧人，第時做你老婆嗰個女仔一定好幸福。」小彤不知說真話還是說假話。

「係咩？」我心裡其實非常開心。

「呢度就係你住嘅地方？」小彤指著面前的一幢私人屋苑。

「係啊，我哋搭𨋢上去。」

「呢度就係我屋企啦，你坐喺梳化休息下，我倒杯暖水俾你飲先。」進屋後，我先扶著小彤坐在客廳的梳化，將小彤和我的書包暫時放到我的房間裡，然後就到廚房倒一杯暖水給小彤。



「估唔到小宇屋企雖然唔算好大，但係都幾企理。」小彤喃喃自語。

「你講咩話？」我從廚房出來拿著一杯暖水放在餐桌上。

「冇嘢⋯⋯咦呢度有幅相嘅？」小彤指著放在電視機上的一幅合照。

「係啊。」

「你細個嗰樣都幾鬼馬，你隔離嗰兩個女仔係邊個嚟㗎？」小彤看到我童年的樣子還笑容滿面，不過當她看到我兩旁的女孩子臉色就頓時一沉。

「哦，係我左邊紮住馬尾，嗰個係我嘅青梅竹馬，阿晴，而係我右邊短頭髮，最高嗰個係我家姐。」我向小彤解釋。

我留意到小彤聽到「阿晴」這個名字，反應有點奇怪，眼珠一轉，不知道在想什麼。

「哦，唔見你家姐嘅？」小彤向我家裡周圍看一下。



「我家姐去咗美國讀書，放暑假或者聖誕節嗰啲先會返香港，返嚟就會訓嗰間房。」我指著在角落的一間房間說。

「她既然唔問，我都無必要講啦。」我還以為小彤會好奇關於「阿晴」的事。

「哦，咁隔離嗰間就係你間房？」小彤指著我家姐旁邊的一間房間。

「係啊。」

「原來係咁，哎呀。」小彤說著說著又捂著肚子。

「唔好講啦，飲水先啦。」我將尚有餘溫的水杯遞給小彤。

「唔該。」小彤接過水杯。



「係喎，你書包係咪有嗰啲嘢？我攞俾你？」我想起小彤提過的話。

「唔使啦，你攞嗰書包俾我我自己攞⋯⋯」小彤紅暈滿臉地拒絕我。

「咁好啦。」我進去我的房間將小彤的書包拿出來。

小彤在她的書包翻找了一會，卻突然尷尬地看著我。

「做咩啊？」

「我嗰啲嘢用曬⋯⋯」小彤不知所措。

「咁樣啊，一係我落街買？」雖然我想像到如果其他同學知道了之後肯定會恥笑我，不過為了小彤就不要緊。

「你唔怕？」小彤有點不好意思。

「驚咩？你同我講你要用邊隻得啦。」我拍著胸口自信滿滿地說。

「好啦，我要⋯⋯」小彤臉紅耳赤在我耳邊竊竊私語。