[穿越][愛情][校園]重回青春時尋找當年失去的愛情: 一場賭博

翌日，我和小彤就遞交了報名表報名參加男女混合班際接力的項目，而聽阿晴說她做了工作人員。

「阿俊你要加油幫我哋班攞個第一翻嚟。」小息的時候阿晴在課室走廊對我說。

「嗯，我會努力。」我口裡雖然這樣說著，心中卻沒有太大的信心。

「阿晴！」突然有個人過來找阿晴。

「乜又係你，都叫你唔好煩住我。」



「我有嘢想搵你，點解你又係度嘅？」來的人正是Michael 。

「佢點解唔可以係度？」阿晴又再一次挽着我的手臂。

「你！」Michael 怒視着我。

「人哋搵你可能真係有事，你聽下佢講咩先啦。」我掙開阿晴挽著的手。

「阿晴啊我想同你講我參加左班際接力，你運動會嗰日⋯⋯。」Michael 帶著懇求的眼光看著阿晴。



「你又有參加？」我驚訝地打斷他說。

「吓你都有？咁就啱啦阿晴你睇下我到時點贏佢。」Michael 拍著胸口說。

「車冇人想知你贏唔贏⋯⋯」阿晴小聲地說。

「哼，阿晴你唔係驚佢輸下話？」Michael 冷笑著。

「邊個會驚？？」阿晴反駁。



「既然你唔驚，不如我哋賭一鋪。」Michael突然提議。

「你想賭咩？」

「如果阿俊輸比我，你就要同我食飯。」Michael陰險地笑著。

「咁如果你輸呢？」

「雖然呢件事唔會發生，不過如果我輸嘅話，我唔會再煩住你。」Michael 自信滿滿地說。

「好呀，你最好遵守承諾。」

「喂，阿晴你唔怕我真係會輸？」我偷偷地跟阿晴說。

「唔驚啦，我信你。」



就這樣我只好肩負多一個責任去參加比賽。

在到運動會舉辦之前的一段時間，我和小彤以及班上的另外兩位同學到運動場練習，想不到小彤跑步也算快，我和另外兩位同學也追不上她。

「喂⋯⋯等我一陣。」我喘着氣說。

「你哋咁慢點贏啊？」小彤跟我和另外兩位同學說。

「估唔到你咳⋯⋯跑得咁快⋯⋯」

「緊係啦我平時放假都有做運動呀嘛，唔好講啦繼續練啦。」小彤說完後又準備回到起跑線。

運動會當天，我一大早就和阿明去吃早餐。



「喂你今日參加左咩項目？」我問阿明

「我參加左200米。」

「吓聽講200米好多勁人參加。」

「唉冇計啦，100、400我又麻麻地，我又唔志在上頒獎台嘅。」

「食飽啲陣間加油。」我鼓勵著阿明。

「係呢聽阿欣講你同小彤一齊報班際接力喎。」
阿明用肩膀撞我。

「係啊，想參加下嘛。」



「你以前都唔參加運動會嘅。」阿明奸笑著。

「咪笑我啦你。」

班際接力就在下午的時間舉行，我和小彤以及另外兩位同學吃完午餐就匆忙回到運動場先行熱身。

「陣間我就跑第一棒，你哋兩個跑第二同第三棒，阿俊你就跑第四棒。」小彤正在分配我們接力的區域。

「我去個廁所先。」我感到非常緊張令我的肚子也有點痛。

「你快啲返嚟啊，仲有15分鐘就要集合㗎啦。」小彤叮囑我。

我去廁所如廁完後打算出來時卻仍然感到有些緊張。

「唉如果輸左，小彤一定好失望。」我想起我們在運動會之前總共練了十次有多。



「睇阿晴嘅表現都唔多鍾意Michael ，輸咗佢肯定喊出嚟。」我心中記起阿晴和Michael的賭博。

「喂驚到腳震啊？驚咪唔好參加搵後備頂上囉，不過我就會當阿晴輸咗㗎啦。」突然另一個廁格裡走出一個人正是Michael 。

「我邊有話驚？」

「咁就好，我跑第四棒，希望陣間見到你，同埋睇住你點樣成為我手下敗將。」Michael 說完後就得意洋洋走出去。

「唉點算好呢？跑步唔係我嘅強項，同埋聽隔離班啲人講Michael好似係田徑校隊嚟，又參加過學界，可以點贏佢呢？」

「你喺度諗咩呀？」一把動聽柔弱的聲音打斷了我的思緒。

「天使彤，竟然係你？好耐冇見。」來人正是久別重逢的天使彤。

「你諗緊咩呀？」

我說出我的煩惱給天使彤，突然她拋了一瓶裝著不知名液體的小瓶給我。

「飲左佢啦。」

「咩嚟㗎？」

「飲左佢你就贏到㗎啦，相信我。」

「好。」從我和天使彤生死之交的關係，我相信她不會害我。

喝完之後，感覺我的身體充滿着力量，視野也突然十分清晰。

「舒服好多。咦，天使彤呢？」天使彤轉眼間又消失了。

「最後一次集合，請參加左班際接力嘅同學到A看台前面嘅跑道集合。」我看看手錶原來我已經去了廁所十分鐘。

「大鑊！小彤佢哋肯定好心急。」我匆忙地跑向A看台前的跑道。