「死啦,聽日就係12月24號,究竟係咩意思呢?」我不斷地問自己。

「喂,阿欣呀?」我決定打電話給小彤的好友阿欣問清楚。

「阿俊?你搵我咩事?」

「我想問呢你知唔知聽日係咩日子?」

「聽日咪平安夜囉。」



「除咗呢樣仲有咩特別?」

「咩呀⋯⋯究竟你想問咩?」

「係咁嘅,小彤佢⋯⋯」我就將小彤問我的問題一五一十告訴給阿欣。

「小彤問你嘅⋯⋯」阿欣思考了幾秒。

「啊!我知啦,乜你咁都唔記得㗎!」



「咁係咩日子?」

「聽日咪小彤生日囉!」

「吓!我咩都冇準備到!」我竟然忘記了小彤生日,禮物和蛋糕也沒有準備。

「有冇搞錯呀你?」

「等我諗下先,禮物可以聽日買,但係蛋糕唔知買唔買得切⋯⋯」我煩惱緊蛋糕的問題可以怎樣解決。



「蛋糕嗰度我可以幫你。」

「真㗎,點解?」

「我屋企有親戚開蛋糕鋪,我可以叫佢哋漏夜幫你,睇下趕唔趕得切。」

如果阿欣可以幫我解決蛋糕的問題,那就真的是十全十美了。

「咁唔該晒你先,下次請翻你食飯!」

翌日中午,我和小彤先去圖書館溫書。

「溫完書我哋去邊?我今日可以晏啲先返屋企。」小彤問我。

「我哋食埋飯之後去尖沙咀海旁睇燈飾好唔好?」



「哦,冇其他啦?」小彤有些失望。

其實我當然有準備了其他東西,可是為了給小彤一個驚喜,我只好忍著不告訴她。

我們之後首先去了一間時裝店。

「呢條裙幾啱你喎,不如你去試下?」我看到一件連身裙十分適合小彤的身材。

「咁貴嘅算啦不如!」小彤見了價錢牌就嚇了一跳想拉著我離開。

「唔緊要啦,今日係你⋯⋯」我差點又說了出口。

「今日係我咩?」小彤一臉疑惑。



「冇嘢,你快啲去試啦。」我推着小彤入試身室。

小彤換了裙子走出來的時候,我彷彿眼前一亮。

「唔該就要呢一條。」我向店內的售貨員說。

「大鑊今次實用晒成個月嘅零用錢。」我在付款的時候心中暗暗計算。

「小宇做咩呀?」

「冇嘢呀⋯⋯」畢竟是小彤的十八歲生日,一個月的零用錢也算值得。

「咁我哋跟住去邊到食飯?」

「呢間啦!」我和小彤去到一間日本菜餐廳。



豈料我和小彤一進去餐廳準備點餐時卻發覺價錢比起普通日式餐廳異常昂貴。

「小宇,呢到啲嘢好貴,不如我哋去第二間食?」

「係喎,我唔記得呢到係尖沙咀添,食嘢緊係貴。」我心中非常慌張,但是今天是小彤生日怎可以令她掃興?

「唔緊要啦,你隨便叫啦。」

「咁好啦。」不過小彤好像也看穿了我的心思,只是叫了一碗麵吃,而我當然叫了最便宜的套餐⋯⋯

「小宇呀?」

「咩事?」此時的我和小彤正走向海旁看燈飾。



「你今日怪怪地咁嘅?」小彤用懷疑的眼神看著我。

「邊有呀?你睇下幾靚!」我指著海旁的燈飾,順便轉移話題。

「係喎,真係好靚。」

維港的夜景加上聖誕燈飾互相輝映,而且身邊有我最重要的人,穿越到這個時空總算是不枉此行。

「唔記得去攞蛋糕添。」我突然想起要去拿蛋糕。

「彤彤你喺度等我一陣!」

「做咩呀?」

「我好快返!」說完這句後我就用最快的速度跑到附近的一間麵包店。

「你係阿欣嘅朋友?」麵包店的老闆問我。

「係呀,蛋糕呢?」

「嗱,蛋糕係度。」麵包店老闆小心翼翼把裝著蛋糕的盒子給我。

我準備把錢交給老闆時,老闆卻遞手示意不用。

「阿欣俾左啦。」

「原來係咁呀,唔該晒!」

我再次回到海旁卻發現她在海旁的長椅睡著了,於是我替她披上外套。

「對唔住,嘈醒左你。」小彤在我披上外套時突然醒來。

「唔緊要,你去左邊呀?呢個咩嚟㗎?」小彤指著我手中的蛋糕盒子。

「你合埋眼先!」小彤閉上雙眼我也趁機把蛋糕拿出來。

「可以開眼啦!」

「楊小彤18歲生日快樂!」眼前的蛋糕上牌子正寫著這樣一句說話。

「乜原來你知㗎?」小彤看到眼前的蛋糕感到驚喜。

「緊係啦!」

「唔怪得啦,今日又送裙又請我食貴野,平時你都唔係咁嘅。」小彤恍然大悟。

「乜嘢呀,你講到我平時對你唔好咁。」

「係啦係啦,你對我最好。」

「你快啲許願先啦。」我把蠟燭點好,小彤就對著蠟燭許願。

小彤把蠟燭吹熄後就切開蛋糕,在吃蛋糕的時候小彤的鼻子沾上了少許忌廉。

「你睇下你食到成個污糟貓咁!」我打算替小彤抺乾淨時,我們兩個卻有一種異樣的感覺,兩個人的嘴唇亦不斷接近。

正當我以為可以親上小彤的時候,她卻一把推開我。
已有 0 人追稿