唔怕話你知，我老婆係貞子: 第六章：成家立室

話咁快我同貞子拍左拖已經一年，雙方亦視對方為終身伴侶，所以決定左結婚。
係婚禮上好多朋友先得知我有左對象一年，更讚我大膽娶既對象竟然係貞子。
可能對我黎講，一個唔殺人既貞子，唔單止一啲都唔可怕，仲有小小可愛添。
係婚禮當日，我並無覺得貞子著上婚紗而特別美麗，可能係我睇慣左佢平日著白色衫既原因。
但當日係我第一次見佢化妝既樣，原來化起妝上黎都幾靚，甚至可以話唔差過眾人成日攞出黎做例子既angelababy。
婚後既日子都過得幾美滿，好快我同貞子就有左愛情結晶品，係個女仔黎，改左名叫小貞。
貞子自從拍左《貞子vs伽椰子》呢套戲之後，因為由錄影帶方式轉變為互聯網方式傳播，所以佢而家既人氣非常之高，幾乎世界各地都無人唔識佢。
好多人搵佢拍戲、拍廣告、做時裝代理人等等，亦都因為佢咁忙，所以我決定左辭左份工專心係屋企照顧小貞。
誓死都估唔到自己老婆會變成明星既一日。
初頭都好驚對於全職爸爸呢個職位自己做唔黎，但隨著日子漸漸過去，由初頭做野揦手唔成勢到而家做到有板有眼。




睇住小貞一日一日咁長大，便覺得好有成功感，相比起過往係工作上既拼搏，係小貞身上尋獲成功感更為容易。
在擁有著天使面孔的小朋友面前，尋獲快樂亦都好簡單，只要望住佢地天真可愛既笑臉，你自然已經感到滿足。
係陪伴小貞玩遊戲既期間，我仿佛搵返失去多年既兒時樂趣，好多係大人眼中所謂既低能遊戲，我卻與小貞玩得津津樂道。
學習其他興趣亦成為我的消閒活動，其中我學識左剪髮。
仲記得我第一次幫小貞剪髮既時候，佢問我。
小貞：【爹地，點解媽咪頭髮咁長，都唔洗剪頭髮既？】
我：【哦~咁係因為媽咪工作關係要留住把長髪呀。】
小貞：【咁我大個左，我都要留！】
小貞因為成日好鐘意伸手去摸貞子把長髮，所以先咁講。
我微微一笑無回應佢，反而係度唸無左一把長髪既貞子仲算唔算係貞子呢？




貞子亦明白陪伴家人既重要性，所以即使幾受民眾歡迎都好亦會抽時間出黎，一齊享受家庭樂趣。
就係咁，我地一家三口過上幸福快樂既日子。