「做咩咁得閒約我出黎食早餐?你而家唔係應該煩緊點對付Valarie架咩,時間無多架啦喎?」喺我屋企附近嘅一間茶餐廳入面,坐喺我對面嘅Miki問我。好似都有好一排我無同過Miki面對面咁傾計。從尋日阿油發緊癲果陣驚爆左Miki喺Evans未入黎公司前已經一直預知佢會入黎,再加上佢一直搞咁多嘢又唔係為左自己上位嘅奇怪行為。綜合以上兩件事,我決定喺今日博一鋪,我要揭穿佢嘅底牌,從而再搵佢合作對付Valarie。面對住Miki嘅提問,我反問返佢:「乜你搞咁多嘢唔係想幫Evans喺公司站穩陣腳架咩?而家升職又未必輪到佢,再加上如果畀Valarie上到位嘅話,佢一定唔會對Evans呢個咁大威脅客氣嘅喎,定係連你都無晒計?」面對住我呢一輪問題,Miki聽到有啲愕然,不過佢都係固作冷靜:「你唔係覺得我係衰女人黎架咩?點解你會諗到我咁無私咁對Evans,就當我係想嫁入豪門啦,Evans做廢人又好上進又好佢身家都係豐厚架啦,我點解要勞心勞力幫佢做咁多嘢?你係咪咁天真覺得我會好人到咁呀?」原本我都對自己嘅假設抱有懷疑,不過見佢咁落力去否認,我就知我無估錯。我聽到佢一輪否認之後,忍唔住大笑起黎,估唔到看似奸狡嘅Miki,搞咁多嘢都只係為左一個男人。我邊笑住邊同Miki講:「Miki你真係慘呀,搞咁多嘢出黎諗住可以令阿Evans哥早日由廢太子成為皇帝,點知阿Evans哥根本完全無心工作。佢份人又單純,你喺背後為佢搞左咁多嘢佢都唔領情。直至早排佢都仲係掛住你個friend Laura,理都唔理你。你成日怕佢畀人hurt,偏偏佢又喺無形中hurt得你咁勁。仆你個街真係笑死我啦,枉我一直仲當你係我天敵,但原來你搞咁多嘢都只係做左人地個佛祖兵。」我一路笑得誇張,一路細心觀察住Miki嘅反應。佢由初初故作鎮定,到後尾忍唔住露出左啲哀傷神情。的確,佢一路以黎搞呢個搞果個,可能都係因為知道Evans份人單純,以佢嘅赤子之心,一入到公司一係就畀人呃,一係就畀人害。Miki對住呢班友先下手為強嘅行動本身會好成功,但就算佢搞左幾多嘢Evans都好似唔知咁。我呢個所謂宿敵,其實都只不過係一個想博取白馬王子歡心嘅女人。

 

但一諗到佢同我鬥左咁耐其實只係為左第二個男人,我就怒火中燒。我覺得自己浪費左太多心機喺呢個看似精明,但行為又十分戇居嘅女人身上。Miki對我嘅說話不置可否,佢無話我估啱定估錯,但從佢呢一刻不經意流露出嘅表情,我好肯定佢而家盤算緊我究竟想點。我諗一般男人喺見到眼前呢個深情嘅弱女子都會想保護佢,幫佢一把。但係我一諗到佢之前為左第二個男人,三番四次從中作梗破壞我嘅計劃,我覺得我唔可以原諒佢,見到佢越係為左Evans黯淡,我就覺得越嬲,我繼續恥笑佢:「喂你搞左咁多嘢都係溝唔到Evans,不如我抵諗啲幫你說服佢畀你執一劑呀。佢咁有善心,為慈善同你上床佢應該都制架。再唔係我再抵諗啲,我拎個printer用張A4紙print佢個樣出黎,再拎佢制成面具,我戴住個面具同你搞囉,我當日行一善啦。」Miki聽到呢度終於忍唔住出聲:「你叫得我出黎如果剩係為左奚落我的話,咁我走先。但如果你係有其他嘢想講的話,我唔該你快啲提出。」「挑你而家喺我面前扮到咁冷淡做咩姐,如果換住係Evans肯約你出黎同你單獨約會,你晨早去七仔幫佢買定condom啦。不過我的確係有個提議,你都知我其實同你一樣,都唔係咁想爭上位……」「我知呀,你個痴線佬搞咁多嘢都只不過係因為你人生太無聊,同你覺得全世界都欠左你呀嘛。」我聽完之後不怒反笑:「拿Miki你就唔啱啦,你搞咁多嘢點知都係做人隻兵我都未笑你戇居啦,你而家就黎judge我,咁樣做人唔太好喎。」Miki冷笑住答我:「由頭到尾所有嘢都係你自己假設,我從來都無話過係亦或唔係。」「唔好同我黎呢一套啦Miki,如果你想捧Evans上位的話我贊成同支持,不過你都知而家Evans嘅最大對手係Valarie,而Valarie論資歷喺公司真係贏左Evans,而且其他高層都可能怕畀人話偏私,寧願捧阿Valarie都費事捧阿Evans住…..」「你想我同你一齊對付Valarie?」「唔係呀,我想你同我造愛呀。」

 

Miki習慣左我呢種九唔搭八嘅說話方法,所以佢都無動於中,我繼續講落去:「不過如果Miki姐你肯同我一齊對付Valarie的話,我都無所謂嘅。」「我點知你最後會唔會食我夾棍,自己坐左阿Kate個位?」「我地係講個信字架咋Miki,不過你都知我同Evans都算係朋友,我自己又唔鍾意上位,所以你可以放心嘅。」Miki聽完我講之後諗左一陣,雖然佢至今都無親口承認佢搞咁多嘢係為左Evans,不過佢亦都無否認過。佢隔左陣答我:「咁你想點對付Valarie呀?」之後我將Valarie同Taylor之間發生嘅事講左畀Miki聽,亦都大約講左Valarie同佢前夫出黎食飯件事佢知。我決定等佢幫我手諗下有咩方法可以對付到Miki。臨返公司果陣,Miki問我:「我仲想知道Judy點解突然會好似企左喺你果邊,你同佢之間係咪發生過啲咩?」睇黎Miki都唔知阿油喺佢背後做左幾多嘢,個情況就好似佢同Evans一樣,或者呢啲嘢真係報應黎。我念及呢個諷刺嘅情況,忍唔住笑出黎。Miki見我無端端笑有啲不悅,我見到佢咁即刻話:「無呀我淫笑緊咋嘛,係呀Judy而家係畀我食住呀,因為我喺床上征服左佢呀嘛,如果你唔信我下次預埋你一份囉。」Miki見我唔肯講真話,佢都無再追問落去。





 

喺返到公司之後,我見到Valarie竟然加入左同Daisy Evans一齊食早餐,而且我見佢地談笑風生咁,心裡暗叫不妙,而同我前後腳返黎嘅Miki見狀亦都有啲驚訝,不過同我唔同佢選擇左上前加入佢地嘅話題。Valarie見到我一臉錯愕咁,忍唔住露出左一個勝利嘅笑容。而Daisy喺望向我嘅時候,佢神情有啲微慍,而喺一旁嘅Evans望住我就有啲尷尬咁。隔左一陣Evans走埋黎話:「James呀,唔好意思呀,如果唔係今朝聽Valarie講我都唔知你之前喺公司試過同其他女同事有啲不愉快經歷,而我又從來無關心你……」聽到佢咁講之後,我即刻好緊張咁問佢:「Valarie講左啲咩黎?」Evans一臉尷尬咁答:「無…..佢同我地講你之前畀個叫Sophia嘅女仔hurt得好勁,而且佢仲話聽Sophia講你至今都仲未忘情,仲會成日去借固想親近Sophia。」「痴線啦,Sophia連屋都搬埋,電話都改埋,我仲點搵佢呀,個老女人想作嘢都搵第二樣呀。」Evans聞言即刻安撫我話:「Valarie都唔係有惡意呀,佢話畀我地知,係想我地開解下你架姐。你都知我同你一樣試過好鍾意一個女仔,鍾意到不能自拔架,我明你架喎。不過呢……鍾意還鍾意,你要體諒人架嘛,Valarie話Sophia因為受唔住,而家要睇心理醫生架……我唔係話佢因為畀你搞到要睇心理醫生……不過,佢話佢搬親去邊你都會搵到佢,而且講極都係要搵佢,佢好大壓力。不如咁啦,你都好似我咁,嘗試下放低呢個女仔去搵過另一個呀。」估唔到Valarie竟然會搵Sophia黎老屈我,而最絕係我根本就搵唔到Sophia出黎當面對質,因為我連佢電話都無。難怪Daisy頭先望住我果陣好似好嬲,而我眼前嘅Evans又真係好關心我咁,令我覺得鬧佢又唔係,但解釋又唔知從何而起。我無力地搭一搭佢膊頭,同佢講事實唔係咁之後,就行左返埋位度苦思有咩方法可以去洗刷呢個污名。

 

而喺呢個時候Daisy一臉怒容咁走埋黎,佢質問我:「點解你一直唔同我講你仲鍾意緊Sophia?」我無力地答佢:「因為我根本已經唔鍾意佢,我唔知Valarie喺邊度聽到呢個傳聞返黎,不過根本就唔係真。」Daisy繼續好嬲咁話:「我唔真仲應唔應該信你,我唔覺得Valarie會無端端屈你囉。不過點都好啦,你鍾意邊個其實都唔關我事。」講完之後佢就轉身走左,剩低一面無奈嘅我。我之後whatsapp問左阿油,Judy同阿輝佢地,問佢地知唔知Sophia辭左職之後嘅去向,但佢地個個都話唔知。不過我都信佢地係講真話,因為Sophia喺呢間公司做果陣同呢班友都無零交流,估唔到喺未開始同Miki夾擊Valarie之前,我已經中左佢一招。i得得