今日我開始左對公司啲同事進行復仇大計: 第十二節

經過尋日一鬧，我知道Miki的確比我想像中更深不可測。佢除左擅於取得主動權控制大局之外，佢面對我突然其來嘅脫軌行動都一樣可以處之泰然。我初初以為Judy喺尋日畀我同我聲稱係同謀嘅Miki整一整之後，佢會嬲埋Miki。點知Judy非但無表現出異樣，而且佢直頭好似當呢兩日嘅事完全無發生過，好快佢枱面上已經出現左第二隻公仔。我本身打算分化完Valarie同Judy，再集中火力玩殘Judy之後就對付大明。點知因為Miki嘅出現，我到而家都唔能夠完成以上任何一件事…而最大鑊嘅係，Valarie已經兩日無返工，而呢幾日Taylor都係無聽過我電話…正當我受住呢件事困擾之際，Valarie今日終於返工。

 

今朝照常同Daisy食早餐果陣，佢怪我尋日同Miki玩得咁癲差啲整親佢，又怪我同Miki夾計幫Judy都唔預佢。我忍唔住潤佢：「我以為你同Miki咁friend佢乜都會話你知架嘛，仲洗咩我同我講姐。」佢聽到之後呆左一呆，之後就扁咀唔理我。呢個時候，消失左幾日嘅Valarie終於再現身，無見幾日佢個樣憔悴左好多。佢第一時間走埋黎同我同Daisy講：「我知你地諗緊乜，不過我同Taylor果晚之後真係無嘢發生過。」我即刻搶住答：「咩呀Valarie姐，你覺得我地會諗到啲咩呀？我對你絕對有信心，知你唔會畀你未婚夫戴綠帽架喎，就算有都唔係你錯，係人地錯啦。」點知Valarie聽完我咁串佢，佢都係照樣面如死灰，唔理我地自己返埋位。

 

到返齊人嘅時候，大家都好踴躍咁行埋去Valarie身邊去慰問佢，但Valarie照樣都係虛應幾句，咩人都無理。Judy返到黎果陣，即刻七情上面咁走埋去安慰Valarie，點知Valarie當住眾人面，冷冷地回左句：「Judy姐，有心啦。」之後就無再理過Judy，而當住咁多人受到冷待嘅Judy倖倖然咁返返自己個位。突然我收到Miki個whatsapp話：「Valarie姐同我講呢，唔知點解個未婚夫Nathan竟然知道果晚佢飲完野跟左第二個男人走，之後Nathan同Valarie鬧左場大交。Valarie姐話肯定覺得係有人報料喎，雖然佢本身最懷疑係你，但你又唔識Nathan，點樣報料呢？剩返最大嫌疑就係當年同佢一齊識Nathan嘅Judy姐啦…你知啦，Valarie覺得Judy姐一直唔抵得佢姑婚架嘛…」我睇完個whatsapp之後，明白作為Valarie近身嘅Miki應該係第二個有Nathan電話嘅人，Miki根本唔怕畀我知係佢搞鬼，更加唔怕畀我知佢而家係想利用我。Miki深知我最後點都會如佢所願去繼續分化Judy同Valarie，佢明白我根本就唔會去到而家先放棄。雖然我心有不甘畀Miki利用，但有左Miki之後，我就可以唔洗利用Daisy去做啲咩，講真經過呢兩個星期嘅相處，就算Daisy係假意接近我都好，但我都唔想利用佢…





 

一直成朝早我都扮晒按兵不動，剩係專心做野，想必Miki一定會以為我被佢果步嚇疾左。到左lunch果陣，班同事經過呢兩個星期發生嘅事之後，都變得有啲尷尬。Valarie選擇唔同佢地食飯，話自己留喺度叫外賣食。而其他人都只係三三兩兩咁各自去食，睇黎而家我已經唔係畀眾人杯葛批鬥果個。可笑嘅係，呢件事最大嘅功臣可能係Miki而唔係我。

 

當全公司剩返我同Valarie喺度嘅時候，我本身打算襯機去Sophia個位起清Miki個底，但係Sophia個位其實離Valarie都好近下，所以我行埋去其實都好覺眼。為左製造機會，我決定襯Valarie落單得返佢自己一個嘅時候，好好咁招呼下佢。我坐去佢隔離，又開始自言自語：「啲洋人有時真係好衰架，未始婚果陣去物識下其他對象買個保險咋嘛，Facebook都有個open relationship畀人揀啦。即係而家仲係華洋不平等咁，個open relationship剩係畀班高等白人之間專用，當啲洋人同啲港女呀賓妹呀拍拖果陣就一定要專心一意嘅。」Valarie聽到之後，雖然我見佢繼續扮無反應，但好明顯佢已經揸實左拳頭，我知道已經說中左佢痛處。我繼續講：「呀我英文差，唔知呢個字slut，同另外呢個字whore點解呢？」佢都係唔理我。

 





見佢唔理我我就拎部電話出黎，search啲馬爾代夫，即係Valarie同Nathan個蜜月之旅嘅相出黎喺Valarie面前揚黎揚去，一路話：「馬爾代夫真係好靚呀，喺果度啲resort洞房，真係生出黎啲仔女都特別靚呀，如果無得去就陰公豬囉。」我一邊講呢番說話果陣仲要一邊奸笑，終於Valarie忍唔住講左句：「我同Taylor果晚真係乜都無做過，我唔怕你唱我…」我未等佢講完，聽到佢講到個唱字就即刻搶住講：「唱？唱咩呀？唱歌我啱喎，唔啱我又唱下歌你聽呀，你係咪想聽你同你未婚夫果隻飲歌You’re my everything呀？」佢聽完雖然流出左煩厭嘅表情，但佢好似對我嘅言語攻擊都唔多有反應。我當然唔可以輕言放棄，我再次拎起個電話，喺佢面前打1083問佢擺酒間酒店幾號電話，佢聽到之後雖然好奇，不過佢都係忍住想唔理我打算觀察下我究充想做咩。之後我專登行返自己個位，但又用佢都聽到嘅聲量拎公司電話打去間酒店，問：「唔該我想問下呢，我有個朋友過兩個月喺度擺左酒呀，不過而家佢又好似搞唔成咁。我見如果佢cancel左，個場地空左出黎嘅話，我想book返幾圍搞個解穢悼念我朋友果段死去嘅愛情咋嘛，反正有啲佈置又可以用返，係要搞搞個菜單姐。下？你想知我朋友叫咩名幫我check check…」Valarie聽到呢度之後已經衝左過黎cut左我線，未等佢講野我已經搶住講：「咩野姐，我朋友腎虧輝結唔成婚，皆因佢戴左綠帽，條女走左去勾佬。我做兄弟好心幫佢搞餐解穢，等佢唔好咁閉翳…」呀不經不覺原來我竟然押左韻，不過我估Valarie應該唔係幾識欣賞，佢又嬲爆爆咁走返埋自己個位。我見佢始終都無行開，我都係埋到Sophia個位，所以我就放棄左原先計劃，決定繼續招呼下Valarie。

 

我行左過隔離公司問人借Fax機，本身隔離公司啲人平時都會同我打下招呼，所以佢地好順攤就借左畀我。我即刻拎左我今朝寫嘅一封信打算fax畀Valarie，題目係有關離婚人情退款事宜，內容就係話如果佢離婚的話人情可唔可以退返一半。之後我又fax左啲上網搵到嘅解穢菜單畀佢，等佢如果真係搞唔成婚姻轉搞解穢，佢都有兩手準備呀嘛，由於部fax機喺正Valarie個位附近，我好肯定佢會收到。我fax完之後，同隔離公司啲人寒喧完兩句就返返入去，Valarie衝埋黎，用好似想殺人嘅語氣同我講：「我係唔會畀你呢啲賤人睇死，我同Nathan一定結定成婚架，之後會開開心心生活落去，無人會阻到我地架。」聞言後繼續嬉皮笑臉咁答佢：「我都信無人會阻你，Valarie，祝你做個幸福的新娘呀。」講完就唔理佢揚長而去，既然Valarie都係懷疑緊係我定Judy報寸，如果我反常唔拎呢件事借題發揮黎玩佢，反而最似身有屎而變得唔自然，經過我頭先咁玩一玩，我估計Judy又理所當然地變返Valarie心目中嘅頭號疑犯…