今日我開始左對公司啲同事進行復仇大計: 第五十一節
「James我check到Valarie聽日下晝book左車，喺機場接佢未婚夫啲親戚返酒店呀。」阿油喺返到屋企之後就開始搵料，睇黎Miki咁樣嚇一嚇佢佢真係爽手左好多。「阿油，唔錯呀，都話我睇好你架啦。係呢，你知唔知道果班親戚係咩人黎？」「好似係條鬼佬個妹同個aunt呀，你知啦，鬼佬姑姐姨媽都係叫aunt，就連無親戚關係又係aunt，我都唔知係佢貴親呀。不過我搵到果個妹個facebook，二十幾歲咋，仲要相當狂放架。嘩睇佢平時喺college同朋友party啲相，真係好似睇緊鬼佬四仔咁呀……」「嘩阿油哥，你頭先先跪喺地下誓神劈願要Miki原諒你，而家你轉過頭就睇鬼妹，我肯定你條毒男一定又一路睇人 facebook，一邊喺腦海將人地強姦啦。你打完飛機有無洗手架毒撚，一諗起同你啲咁污糟嘅人講電話我就想作嘔啦。喂唔講咁多啦，我要消毒下自己隻耳仔先，你拿拿臨send啲嘢畀我安排下啦。」阿油可能已經習慣左畀我侮辱，佢無視我頭先嘅冷嘲熱諷，好緊張咁問我：「你會幫我同Miki講我咁本事架呵？你記住幫我講多兩句好話呀，我靠晒你架啦。」「我會幫你如實上報架啦油哥，當然啦，見你而家咁本事，你意淫鬼妹單嘢我就會幫你隱瞞嘅。好啦，再同你講落去我驚中毒呀，搵到啲咩再話我知啦。」一收左線之後，我心入面已經有全盤計劃，首先我第一樣嘢要做嘅，就係打去取消book車先。
我嘅計劃雖然係即興且唔算周詳，不過我相信我今次搵黎嘅幫手應該會發揮得好好。因為今次將會係由脫胎換骨左嘅Taylor去行動，喺搵左Taylor簡單商量過之後，我地嘅第一步將會係搵過第二架車去接佢地兩個先。Taylor喺諗左一陣之後同我講話：「我心目中有一個人選，呢個人雖然係我嘅朋友，但由於佢可以話係馬路上嘅一個傳奇，所以要搵請到佢出山都唔係咁容易。」「請問你呢位朋友有咩咁傳奇呢？」「佢外號叫做貨van界鬼叫愁，因為佢出左名揸車唔守規矩，而且仲成日對啲客座地起價，但偏偏因為佢手車夠快而且把口又成日夠叻，搞到班客開開心心，所以佢可以話係客似雲來。呢個咁玩世不恭又深不可測嘅男人，就係公路浪子阿炳啦。」「是Q但啦，你覺得佢得就得啦，咁你快啲叫阿炳準備好聽日準時去接佢地先啦。」「不過有個問題，阿炳佢本身唔識講英文，我驚第一步已經會穿煲喎……」「唔識英文仲好，去到第二步由你出手果陣，你就會明點解我咁講架啦。係呢Taylor哥，作為一個職業食軟飯專家，你覺得鬼妹難唔難到你呢？」Taylor聽到我呢個問題之後只係笑一笑，之後話：「James，我唔係話想誇口自己讚自己，不過任何有女性性器官嘅人類，我Taylor都有信心可以食住佢呀。」「有你Taylor哥呢一句我就放心啦，今次我擺明益你呀，兩個西女人，後生又有中年嘅又有，睇你本事啦。」
由於今次我唔需要親自出手，只係遙控成件事。所以我安坐喺家中度等佢地報告畀我，好快果位公路浪子阿炳就打左畀我，佢一黎就先講左堆粗口投訴話因為唔識講英文，果兩個西女人搞左好耐先上車，到發洩完之後佢先問我應該放但佢地喺邊好。我搞得咁多嘢就當然唔係想送佢地返酒店啦，我問一問阿炳：「炳哥呀，你平時喺邊區度玩開咁呀？」阿炳聽到我個問題之後呆左一呆，之後答：「無呀，都係喺屯門一帶度蒲開，你下次去開果頭飲嘢即管撻我個朵，nuts錢都即刻唔洗畀呀。」「阿炳哥，多謝你先，不過你放低佢地喺果頭，同順便同Taylor講你會放低佢地喺果度啦。」直覺話畀我聽，阿炳去開果啲地方附近啲人應該都唔係好講英文，到時佢地之應該會叫天不應，叫地不聞。過左唔係好耐，我就收到Taylor畀我嘅whatsapp。佢成功喺果兩位西女人最無助嘅時候，以熱心路人嘅身份英雄救美，成功搭上左佢地，而可能喺外國住慣，果兩位西女人以為香港人真係會咁熱心助人。喺相信左同阿炳係因為語言不通而發生左誤會而畀佢放低喺個佢地完全唔識嘅地方之後，佢地又再一次上左第二架賊車，即係Taylor架車。我叫Taylor唔洗咁急車呢兩位西女人返酒店，佢而家應該要展現好客之道，車人地去食下嘢再順手聯絡下感情先。過左大約兩個鐘之後，Taylor send左幅相畀我，從佢地嘅表情睇黎，出乎意料地畀Taylor搞掂左果個應該唔係後生鬼妹，而係Valaire老公果個aunt。
又無幾耐，我接到Valarie個電話，佢一黎就向我咆哮問道：「你收埋左佢地喺邊呀？」「我收埋左果啲龍珠你就當然唔會咁易搵到啦，容不易你一陣叫左條神龍出黎，向佢許願畀你升職，我咪前功盡廢。」「你唔洗同我詐傻呀，租車公司話係個男人打去cancel左架車，仲唔係你，你再唔交返佢地出黎我就報警。」我聽到之後忍唔住大笑：「咩租車公司呀阿嬋，你係咪老到慒左呀？一打黎問我收埋佢地喺邊，佢地係咩黎先得架。仲話要報警喎，快啲去報啦咁，同阿sir講我收埋左啲龍珠，唔畀你召喚神龍救地球啦。」Valarie可能估唔到我嘅反應會係咁，佢聽完遲疑左一陣就收左線。呢個時候我見Taylor都起碼搞掂左其中一個西女人，雖然唔係我心目中以為佢會搞果個，不過可能佢已經將職業化為興趣，愛上左搞老女人啦。Taylor喺隔左無耐就送左兩個西女人返酒店，Valarie見到Taylor當然無比驚訝啦，不過最令佢驚訝嘅竟然係果位較年長嘅西女人唔肯落車，話要同Taylor喺香港周圍去玩下先再返黎搵佢地。就係咁， Taylor成功俘虜左Valarie身邊嘅其中一個人，復仇者聯盟嘅第一仗可以話係成功左嘅。