今日我開始左對公司啲同事進行復仇大計: 第十六節

喺交代完楊偉明大作戰之後，我係時候同大家交代返我尋日提到嘅公司重大人事變動。星期一Sam姐上黎開早會果陣，同我地宣佈阿Kate會喺月內辭職，而佢懸空嘅位置佢會考慮喺我地公司揀，又或者喺總公司調過黎，而且佢亦暗示除左Valarie同Judy，其他人都有機會跳級提拔。而當開完會嘅時候，Valarie留低左同Sam姐傾左陣…當大家以為佢係急不及待想自薦嘅時候，佢竟然同Sam姐講佢就黎結婚，因為有計劃想生BB，所以唔想負咁大責任而退出…雖然佢咁講好合理，但我硬係覺得Kate辭職同Valarie退出都似係有人刻意安排，而最合理嘅懷疑對象當然係Miki啦。雖然我都係其中一個被考慮升職對象，但基於我呢一刻已經將全副心思放左喺對付公司同事身上，我根本無諗過要去特別表現自己博上位。相反，如果見到有人博上位，我將會用全力去搞破壞。喺無左Valarie呢個對手之後，Judy其實係最大機會升職果個，但我自己個人覺得Miki搞咁多野，佢應該都係等呢一刻去博上位…但作為呢間office入面最正義最公道嘅人，我係唔會畀呢兩個奸詐女人有機會升職架！而喺星期一處理完大明呢條友之後，我今日第一樣要做嘅事就係查探下Kate辭職嘅真相…

 

自從果晚同Daisy食完飯之後，我就刻意避開佢，佢平時whatsapp我我都係回應得有啲冷淡。但喺今日嘅早餐時間，佢同我講：「如果你想爭取阿Kate個位我會全力支持你架，男人係應該有啲事業心。」雖然我無意爭奪阿Kate個位，不過為左查明真相，我即時提出叫Daisy幫我約阿Kate食晚飯，而由於阿Kate同Daisy一向都有兩句，所以當Daisy同佢講我臨尾想請佢食餐飯，佢都欣然接受。

 

至於大明今日無返到工，就連打電話返黎請假都無，經過尋日喺玩到興起果刻畀人嚇到賴尿，相信呢個心理陰影應該有排佢受，唔好話造愛，我相信短期內佢連打飛機都唔敢。雖然解決左大明，但我無要求阿油即時交返晒佢手上我果啲所謂把柄出黎。相反，我越黎越相信阿油果日其實係大我，而我亦打算繼續利用呢段互相利用嘅關係，呢一刻我無謂亦無必要去同佢反面。至於Miki，喺尋晚發生左楊偉明行動之後，佢到今日都一直無搵過我，而由尋日聽到阿Kate辭職呢個傳聞之後，佢唔止無表現自己博上位之外。我留意到佢成日又唔出聲，又成日諗野諗到出晒神咁。所以我決定主動出擊，我send左個message話：「Miki姐，他朝升左職上左位之後唔好唔記得細佬。」點知佢連覆都唔覆我…為左一探佢虛實，喺lunch果陣我走左埋佢個位度做啲野想引佢注意。





 

我首先襯佢行開果陣，將佢個筆筒入面啲筆全部拎走，換晒我朝早喺樓下買果盒百力滋落佢筆筒。而另一方面，我將一部將聲量調較到好微弱，但只要一靜都仲可以隱約聽到嘅念佛機收埋喺佢個位附近堆雜物度。經我實地測試之後，我相信Miki陣間應該會以為自己係幻聽。點知到佢返返埋位，一直到放工佢都無對呢兩樣野無反應。佢成個下晝就係坐喺自己個位發呆，由於佢乜都無做過所以佢掂都無掂過個筆筒，佢自然唔知佢啲筆變晒百力滋啦，至於部念佛機佢一樣係置若罔聞，我都唔知佢真係聽唔到定佢心不在焉到咁…臨放工之際Daisy叫埋Miki夜晚同我地一齊同Kate食飯，出乎意料地佢連呢啲大好收風機會都婉拒。

 

夜晚果餐飯，本身我仲好興緻勃勃想探究阿Kate辭職嘅原因。不過除左佢不斷扯開話題令我同Daisy無乜機會問點解之外，呢一刻我成個腦海都係充斥住Miki悶悶不落嘅神態，我越諗就越唔明，呢一刻明明係佢大顯身手嘅大好時機，但點解佢仲會憂心忡忡？Kate向我地透露，黎緊我地其中一個董事嘅仔由於喺外國返到黎香港都仲係無所事事，所以佢老豆想安排佢入黎我地公司頂住HR個位先。但當然喺公司站穩陣腳之後，佢應該會坐正阿Kate個位，但由於Sam姐極力反對之下，阿Kate個位就變左公開畀大家競爭。而呢位傳聞中嘅太子級人馬本身今個星期就開始返工，不過基於佢暪住佢老豆飛左去美國同啲朋友玩，所以都未知佢幾時會玩夠返黎正式開工…

 





食完飯之後，我無畀Daisy拒絕就拉左佢上的士送佢返屋企。喺車上面，我好認真咁同佢講：「我其實唔志在升唔升職，對我黎講喺呢間公司有啲野遠比我嘅事業重要。」Daisy聽到之後不斷追問我究竟係咩更加重要，但我直到送到佢返屋企我都係無畀到答案佢。