今日一返到公司,突然唔見左Miki。而且我見到Sam姐、Kate姐、仲有Evans都一臉神色凝重,正當我想問Evans係咪發生左啲咩事之際,佢欲言又止咁,話現階段咩都唔講得住。正當我想發作鬧佢之時,我突然之間諗起Miki之前話過咩會做嘢,但叫我唔好阻止佢。我心覺不妙,即刻打畀佢,但可惜打左好多次畀佢都無人聽電話。我雖然唔知道發生左啲咩事,不過以佢嘅性格,佢肯定係唔知為Evans做左啲驚天動地嘅犧牲啦,仲唔畀我知得,唉。接住落黎,大家都好似心知喺Miki身上發生左啲事,但公司入面無人敢就Miki嘅突然失蹤過問半句,除左阿油。阿油好開心咁話:「咁咪好囉,佢自己都知醜走人,唔洗我日日見住佢篤眼篤鼻。其實我都算係咁啦,畀佢玩得咁勁都剩係對佢單單打打,呢個女人真係正賤人黎架 。」一邊嘅文員輝即刻搭咀話:「係啦,呢啲死港女覺得自己生得靚,就當我地呢啲人係狗咁。佢如果唔好彩出生喺大佬,睇死佢咪又係要去骨場雞場度做,有幾咁巴閉姐。到時咪又係畀我地呢班公子大爺上到去,畀幾舊水佢咩都做齊啦。」我無心情同呢兩個loser講嘢,不過聽到佢地咁講,又一次令我覺得咩最毒婦人心真係得啖笑,講惡毒呢班死毒男真係最惡毒。今朝唔知點解,就連Daisy都故意逃避我咁,我直覺上佢都係其中一個知情人士,不過我無向佢探聽。因為我相信要講佢自然會講,呢啲嘢我係迫唔到佢。由於直覺上覺得Miki身陷險境,但又被蒙在鼓裡咩都做唔到令我非常焦燥。我完全專心唔到去做嘢,我成朝都只係不停喺度猜想究竟係發生左啲咩事。可能我嘅擔心同焦燥真係擺晒上面啦,成朝都無人夠膽行埋我個位度同我傾計。而每當我望向Evans之際,佢都擺出一副歉疚嘅表情,感覺上佢好似做左啲好對唔住我嘅事,但佢又唔可以講出口同我交代。去到臨食晏果陣,我終於忍唔住請左半日事假,我喺連向Daisy交代半聲都無嘅情況下,打算踩上門搵Miki。

但其實既然Miki而家係有心避開我,我又點有可能會搵到佢呀。我嘗試過去問莊神佢究竟知唔知發生咩事,但佢只係講左句:「身為人類行為觀察者,如果你有咩想知道,你好應該自己觀察出黎,你問我我都唔會答你 架。」喺呢一刻,我突然覺得好無助,我身邊嘅人好似無一個會幫到我手咁,我一向慣左獨來獨往,唔鍾意靠人,但呢刻嘅孤立無援感覺真係令我覺得有啲傷心。我相信Miki呢一刻應該同我有同感,雖然唔知佢發生左啲咩事,但我相信佢而家都應該喺度孤軍作戰緊,佢連向我求助都唔得,又仲可以搵到啲咩人幫手呢。呢個時候,阿秀妹妹突然打左畀我,問我:「James哥,聽聞你而家好苦惱喎。」我呢一刻連同任何人講嘢嘅心情都欠奉,我只係想求其敷衍佢幾句盡早收線,但阿秀妹妹突然講左句話:「John叔叔叫我向你轉告一句說話,佢叫你唔好高估自己咩都攬晒上身,佢話人地下定決心做嘅嘢,已經係有相當程度嘅覺悟,所以佢叫你都係唔好諗咁多去自尋苦惱,同叫你唔好越界去干涉人地嘅行為喎,佢話你要做嘅嘢係觀察別人嘅行為,而唔係干涉。」我聽到呢度真係忍唔住講左幾句粗口,莊神你自己鍾意故弄玄虛扮高手呢啲就留返自己擔當啦,仲教壞埋啲小妹妹,我同阿秀講:「雖然莊神係畀左啲錢你父母,不過就唔代表你要咩都聽晒佢話架。佢平時如果成日騷擾你,你可以即管報警架,你唔洗屈服喺佢嘅淫威之下架喎。唔洗驚,到時我一定會出庭幫你頂證佢架。」佢只係喺度傻笑唔識應我,不過由於我心情真係太過差,所以我無同佢講落去就收左線。我而家幾乎肯定Miki一定係做左啲不可挽回嘅事去幫Evans。而根據目前形勢去睇,當大家都心知Evans無做過啲咩功積去上位。如果Evans呢一刻揭發到公司同事啲咩,班大嘅一定會對佢另眼相看。再加上如果而家Evans咁有心要上位去得到Daisy嘅歡心,如果畀佢知道左Miki曾經做過啲咩去損害公司,佢未必會念舊情放過Miki一馬。相反,佢份人又咁有原則,就算報Miki串都可以係大義滅情,唔會違背佢嘅正義,一念及此,我就明白莊神借阿秀把口同我講果番說話嘅意思。