今日我開始左對公司啲同事進行復仇大計: 第九十九節

得到Evans嘅幫助，佢成功幫我號召左一班社運人士，為數有過百人。佢地之所以肯幫手，除左因為佢地畀面Evans之外，都係因為佢地多次被打手抹黑。其中一位社運少女同我講話，明明佢係同男朋友一齊參加社運示威，但點知好快佢就畀人喺網上抹黑為免費民主雞，令佢聲明狼籍，呢個名傳開去之後，仲連佢隔離屋個血氣方剛中學生，喺搭lift果陣都同佢講話：「姐姐其實我都撐普選架，你可唔可以同我共渡春宵獎勵下我？」而另一位仲係讀緊大學嘅社運仔亦同我講，話佢明明成日畀人話係買唔起樓嘅窮鬼，因為仇富先會上街做憤青；但轉過頭又畀打手話佢係收左外國勢力錢嘅打手。佢覺得好疑惑，因為佢唔知班打手究竟係覺得佢有錢定係無錢。不過點都好，我發覺班打手無論係對付班社運人士又抑或係對付我同我身邊人都好，其實都係不外乎兩招：就係抹黑人別有用心同私生活不檢點。由於抹黑人都係我嘅強項，所以喺對付Valarie同佢旗下班打手嘅時候，我都一樣有以彼之道還彼之身。就好似當Evans幫我搵黎一班社運仔，我向佢地解釋今次點解要佢地幫手之時。我除左畀左我地精心拍嘅紀錄片畀佢地睇，以展示Valarie係打手嘅工頭之餘。我仲大肆抹黑Valarie，同佢地講話：「呢個女人好恐怖架，而家佢同返畀佢玩到出過家嘅醫生前夫結婚，表面上好似係破鏡重圓，其實唔係咁簡單架。呢個女人曾經同過一個西人犯罪分子去到談婚論嫁嘅地步，不過佢又突然之間同返呢個醫生前夫一齊。其實背後涉及一個驚天黑幕，果個西人犯罪分子可能係想利用呢個正直醫生去危害香港醫療界，Valarie只係表面上同個西人分左手，但實際上佢只係要接近個醫生。我懷疑佢地可以係想偷運人體器官呀，又或者係想拎啲化武原材料。」多啲Valarie果件西人前未婚夫生得蟑頭鼠目，一睇就知唔係好人。當我出示左果條友嘅相之後，班熱血社運人士好似都有啲相信我嘅說法，再加上佢地大部分都受過打手抹黑，新仇舊恨之下，大家都好願意幫手。

 

我除左喺網上預告左快將上傳揭露網上打手工頭Valarie真面目嘅紀錄片之外，亦透露會搞個首映會，至於場地同時間我就話會到時先公布。由於上一段紀錄片喺網上都有不少迴響，所以不少網民都對我今次搞到神神秘秘咁相當好奇。至於點解我要咁神秘，原因好簡單，因為首映會其實係喺Valarie結婚果日，而場地就係喺佢婚宴附近。一眾社運人士都好幫手，喺事前都好保密無漏到口風。去到當日，我地等Valarie開始入席之時先去到擺檔。唔洗幾耐，四周就圍左一堆好事之徙，再加上果班社運人士大力支持，所以一時間我地都幾有氣勢。唔洗幾耐就有班傳媒聞風而至，大家都好期待呢套新片有咩猛料爆。由於唔想畀人告話我係非法集會，所以我向傳媒聲稱今次只係我個人嘅街頭藝術表現，至於所有黎參加嘅人都與我無關，大家都只係觀眾。當我見周圍都企滿晒人之時，我就開始播片。當Valarie同班打手密談嘅片段播出之時，在場人士都嘩然。而我亦都喺呢個時候不厭其煩地同在場人士講，話Valarie而家喺附近擺緊酒，希望大家都要冷靜克制，就算佢係社會害蟲都好，都唔可以過下打擾佢地。當然我知道只要講左呢句之後，Valarie可以會即時多左好多賓客，最起碼班傳媒應該都會去一睹佢芳容，我希望呢班人過去果陣做人情啦。但唔洗班傳媒自己動手，著住裙掛嘅Valarie已經帶左一班賓客殺到黎。不過睇佢後面班人嘅表情，大多數都似係食花生多過想幫手。我其實都幾肯定Valarie已經係第二次嫁畀呢條友，果啲影下佢地童年同相識經過嘅片，啲賓客同睇過一次啦，點計都係我段爆料片段好睇啲。正當Valarie想衝上前同我理論之時，我就喺一眾傳媒大叫：「呢個女人要殺我滅口呀。」之後就跳上的士落荒而逃，而身邊班社運人士亦都好合拍地幫我攔住Valarie，等佢連同我對質嘅時間都無。

 

第二日Valarie呢位新娘子上左好多份報紙，有份仲寫到話「新娘子率打手兵團踩場圖毀證供」，就係咁網民就由本身一面們話阿秀同我個妹係公廁後，變到於網上追殺Valarie。有個咁嘅結果，我相信我都算對開心骨場工作團隊同阿秀有個交代。正當我急不及侍去搵阿秀講呢個好消息之時，我以為件事完左之後佢可以開心返，點知佢都係唔肯見我，而且佢仲透過Robin同我講話以後都唔想見到我。我試圖透過莊神去向阿秀道歉，點知連莊神都向我表示，the damage is done，佢話佢只係最叻觀察人類行為。但唔代表佢有能力去修補人類傷口，莊神好話重心長同我講話：「你係一個唔合格嘅人類行為觀察者，因為由頭到尾你只係最在意自己，你觀察到嘅只係他人嘅表明行為，你無真心去理解佢地嘅內在。你除左因為唔成熟嘅行為而深深傷害左阿秀，你仲傷害左Jasmine，不過呢啲都係你地兩個嘅私事，我唔會過問。不過相信我，你無聽我話去留心觀察身邊嘅人，惡果好快會出現。」我一向都唔抵得莊神好似成日看透世事，覺得佢好多時都係咁啱講中。但可惜今次莊神真係不幸言中，我嘅惡果好快就出現。正當我覺得就算得唔到阿秀原諒，但都叫做幫隻game除去左一個大敵之時，可惜其他人唔係咁諗。Taylor同阿油佢地兩個喺經過呢件事之後，亦都產生左自己嘅諗法。原本呢個勢成水火嘅人，為左自己嘅利益，竟然第一次連成一線。佢地喺Valarie事件過左一排之後，搵左我出黎傾。





 

Taylor同阿油見到我都一臉不好意思，我從佢地嘅表情都已經估到佢地想做啲咩。Taylor率先開聲話：「Valarie係我同你嘅共同敵人，我相信佢搞我地隻game都係因為針對我地兩個，我都好感激你出面搞掂左呢件事。不過講真，因為呢件事你又得罪左好多我地惹唔起嘅勢力，你都知我放左好多錢喺呢隻game度架啦，我真係好想隻game可以成功架。你都明啦，我唔想再畀人搞呀。」阿油無正眼望我，但佢不住點頭表示認同。我無出聲，因為我知道我呢一刻對佢地黎講根本係可有可無，而且仲係一個負累。錢係Taylor出，負責寫隻game果個係阿油。佢地再喺出面請條友返黎營運根本都唔難。估唔到我同我偶像Steve Jobs一樣，都有機會畀人踢出自己創辦嘅公司。我無出聲怪責佢地，因為連我自己都覺得佢地嘅憂慮係正常，如果畀著係我，我都一樣會下呢個決定。但唔知點解，我依然忍唔住流淚，我覺得好委屈，因為我為隻game付出咁多，點知佢地依然係一個唔該就踢走我。我唔知我辛苦左咁耐，究竟係為乜。原本我覺得呢隻game只係我嘅踏腳石，我嘅小器簿王國會喺呢隻game成功之後慢慢開展，但而家一切都已成泡影。我雖然好傷心，不過我都無打算賴死，我默默地同Taylor同阿油握完手之後，就轉身離開。我呢一刻真係去到無路可走，我唔知邊個喺呢一刻會向我伸出援手。我有諗過厚顏地去搵Jasmine尋找依靠，但好快我就打消左呢個念頭。因為去到呢一刻，我都依然係好掛住一個人，一個已經一排音訊全無嘅人。我抹乾眼淚，打電話去問莊神問Miki嘅下落，原本我以為莊神會搞一輪先肯答我，點知佢今次竟然好乾脆咁畀左個地址我，仲幫我買埋機票。就係咁，我喺畀踢出自己公司後唔夠二十四小時，就上左一架飛往美國加洲嘅飛機，出發去尋找我人生中嘅最後希望－Miki。