今日除左係放完年假之後第一個情人節,我同大家一樣,都好期待想知今年各女同事嘅收花情況。我今日返到公司第一件事係交帶樓下看更,陣間有咩人送花上黎果陣,叫看更打左畀我先准放人上黎。初初我向看更蕭伯,本身佢都係一臉睬我都硬膠嘅不屑態度,但好快佢就畀我本喺新年地攤喺深水埗用十蚊買返黎嘅鍾麗緹咸濕寫真(連VCD)打動左。本身好似成日訓極都唔醒嘅蕭伯喺見到本寫真集立刻精神一振,我喺佢眼中見到果種年輕小伙子第一次上咸網嘅亢奮同活力,如果唔係喺公眾場所我諗蕭伯已經即刻除低左條褲拎本寫真自我慰藉一番。蕭伯收到呢份禮物之後立刻當左我係佢知己,平時眼尾都唔稍下我嘅佢,喺更亭都行出黎,好熱情咁搭住我膊頭同我講:「哥仔睇你唔出咁識食,如果你畀埋而家果啲咩靚模寫真我我就真係唔撚睬你啦,鍾麗緹呢啲先係女人黎架嘛,剩係睇下個封面我都已經硬晒呀。話時話,你公司果個馬小姐(Kate)其實同鍾麗緹都有啲似樣喎,嘩陣間見到佢我驚我都忍唔住會硬呀。」由於我見枯木逢春嘅蕭伯越講越興奮,為免佢將無處發洩嘅獸慾轉嫁到我身上,所以我交代完就即刻上樓。

 

講返我自己同Daisy果筆先,由於我認為呢一刻未肯可以認真發展嘅時候,所以所有送花呀燭光晚餐呀我全部都唔無安排到。我只係去左某名店買左條scarf(因為佢怕涷),寫左張卡同買左盒靚靚地嘅朱古力畀佢就算。我襯佢未返黎之前放左喺佢個位度,我唔知佢收到之後會有咩反應,不過我希望佢最小知道我係在意佢。返到上公司果陣,我以為我會係最早返果個,點知阿文員輝仲早過我。我返到去果陣見佢好慌忙咁喺Judy個位行開左,我估死性不改嘅佢一定又喺Judy加位唔知加左咩料啦。見到佢我即時靈機一觸,我決定將阿輝加入到去我今日嘅行動裡面。阿輝見到係我之後鬆左一口氣,但另一方面佢又好似好驚一直捉住佢把柄又未有所行動嘅我唔知會做乜。我喺唔理佢應唔應承之下,要佢今日做我助手,由於佢面對我根本無反抗嘅餘地,佢唯有應承。

 

雖然呢一刻Judy其實同阿輝一樣有把柄畀我揸住,我要收服佢可以話係易如反掌。不過可能係我呢排成日畀Miki佔住上風,令我心理上有小小唔平衡。為左令我增強返啲自信以面對同Miki嘅最後決戰,我想借今日情人節再好好咁同Judy玩下。其實我一早準備左幾扎唔同嘅嘢預備今日畀Judy,容許我先賣個關子保持下神秘先。由於放完個長假返黎,再加上今日適逢情人節,各個女同事都特別神采飛揚,就連早排頹左一排嘅Valarie都容光煥發。而我最關心嘅Judy係第一個返到黎嘅女同事,雖然佢而家應該畀我手上嘅罪證搞到提心吊膽,不過作為一個天生嘅港女,喺情人節到要成為公司嘅大贏家可以話係佢嘅天性黎。佢應該好努力咁執過自己黎,今日嘅佢打扮得比平時更美豔,佢件恤衫領口位開得相當之低。我一見到佢忍唔住走埋同佢講:「喂阿姑中國城執左好耐架啦喎,你果組啲囡囡都應該從晒良上晒岸架啦。」可能已經預計到我一定會對佢冷嘲熱諷,佢只係望住我強擠左一下微笑就唔再理我。而第二個返到嘅係畀蕭伯讚話十足鍾麗緹咁款嘅阿Kate,佢雖然打扮得唔算有咩特別,但佢一入到黎就拎住支豆漿。我問佢做咩今日咁好會突然想飲豆漿,佢話係樓下看更蕭伯請佢飲架,我一聽到之後真係唔識反應,我心入面雖然有一絲慚愧,不過我都係決定由佢喺唔知情之下享受左呢支豆漿。之後其他同事陸逐返到其實都無乜特別,係有兩樣野我比較在意,今日Miki同阿油一齊請左假,Miki係放自己啲annual,而阿油就係請病假。而另一樣野我好在意嘅就係Daisy返到黎之際,佢手上已經拎住一扎花……





 

喺Daisy入到黎果刻我同佢四目交投,佢好似有嘢想同我講,但見到佢手上拎住扎花,果刻我真係有種異樣嘅傷感。喺佢行埋黎果陣,我選擇逃避佢……而相反Evans一見到佢就走埋去同佢傾計,而佢亦都當眾送左包朱古力畀Evans,但其實公司所有人佢都有送朱古力,除左喺佢幾次行埋黎想畀野我果陣我都專登行開左。無幾耐佢應該係發現到我放喺佢枱面上嘅嘢,但我依然一直避開佢,避避下佢應該嬲左我。我見佢將應該係畀我嘅一袋野放返入袋入面,之後再將佢拎返黎果扎花掉左去垃圾桶之後就埋頭工作,呢個舉動令全場嘅人都注意到,但就無人敢去問佢發生咩事。而喺呢個時候,蕭伯打畀我話有幾扎花係送上黎畀Judy同其他同事嘅,我示意叫阿輝幫我出去一次過簽收晒啲花先。阿輝雖然好唔情願,不過佢都唯有死死氣地出去,喺搞左一輪之後阿輝打黎話有啲花店職員堅持要親手送去收花嘅人手上,我就同佢講其他人可以照送上黎,但我就要佢抽起晒所有送畀Judy嘅花。唔知佢用左咩方法之後佢成功拎到晒所有送畀Judy嘅花同禮物,我指示佢拎晒啲花同禮物上面嘅卡出黎,之後再掉晒啲花同禮物去後巷垃圾桶。阿Kate,Valarie同果個唔知叫Katy定Kathy嘅女同事好快每人都收到花,Judy見到自己一扎花都未收到顯得有啲焦慮同黑面,而Daisy喺再收到花之後,佢都係同樣地將啲花睇都唔睇就掉去垃圾桶,佢喺掉完之後啤一啤我,之後又繼續做嘢。我雖然好想即刻去買扎花畀佢補鑊,不過我覺得而家唔係適當時間。喺食晏之後所有阿Kate請我地所有人出去食開年飯,而阿輝因為畀我交帶而進行計劃嘅第二部份,佢託詞話唔係咁舒服無出到去食。喺成餐飯Daisy都無同我講過嘢,相反佢就痴住Evans不停咁講嘢,而我亦都有啲鬥氣地完全無理過佢。

 

喺食完飯返黎之後,Judy發現到佢枱面上面有幾扎嘢喺度,滿心歡喜嘅佢即刻行埋去睇下係乜黎,點知佢一行到埋去見到嘅花唔係咩玫瑰。相反佢見到枱面三扎嘢分別係菊花,劍蘭同一扎西蘭花。佢一見到之後即刻望住我,我只係笑而不語,佢發現呢幾扎嘢上面有幾張卡,佢一打開之後發現將卡嘅下款全部都已經畀人用塗改液塗晒,但係上款同埋內文就係完整。其他女同事見到佢枱上面幾扎嘢都覺得好有趣,紛紛行埋去湊熱鬧。Judy心知係我搞鬼,不過佢又唔可以發嬲,佢好用力咁忍住自己果道怒火,將枱面幾扎嘢掉晒入垃圾桶就返埋位。而Valarie一改平時會同Judy扮friend嘅態度,佢好用力咁恥笑收到呢幾扎垃圾嘢嘅Judy。而我當然有走埋去加把口啦:「喂棵西蘭花返去滾一滾咪食得囉,你洗咩咁浪費呀,你咁浪費咁無衣食點儲錢買姑婆屋呀。」Judy雖然好嬲,不過佢始終都係唔敢發作。Evans好快過黎幫佢打圓場,大家就即刻散去,相信聽日個清潔阿姐上到黎見到我地個垃圾桶應該會以為自己去左花墟。

 





喺放工之際,Daisy襯無人留意之際走左埋我個位,好大力咁掉左佢本身想送畀我果袋嘢落我度,之後就唔理我走左。而我打開個袋一睇,入面係佢手製嘅朱古力……