[8年前]
家姐:「走啊!」一個塊面血肉蒙糊丶成身血嘅人伸直雙手丶跳向家姐。

殭屍......佢塊面就好似喪屍咁丶灰色瞳孔丶腐爛嘅口腔,佢唔係着住古代清朝嘅官服、而係現代人嘅衫(溶溶爛爛充滿血跡嘅白色T恤、牛仔褲黑波鞋)。

佢亦唔係好似電影咁慢慢跳下跳下,而係移動速度非常快嘅怪物。

家姐推開我,佢捉住咗家姐一口咬落去。「家姐!!!」當時嘅我仲好細,嚇到喊咗出嚟。

家姐:「走呀!!!」我隻腳嚇到軟晒。家姐:「走呀!!!」我慢慢開始跑走,因為我真係好驚......





一個掃街丶着住反光背心、拎住把掃把嘅大叔跑過去。佢從掃把嘅頭抆出一把桃木劍,手指公撳落去之後,劍刃發出紅色光。直刺穿過咗隻殭屍[隻殭屍火化成灰]

一個同樣衣着嘅伯伯行過嚟:「阿秋...點呀?」秋叔擰頭:「太遲,個女仔已經......」伯伯:「你盡咗力㗎啦,個女仔好快都會變成殭屍,帶佢返去先」

我匿埋喺後面嘅牆,一直嚇到仲未平復到......

===== ===== ===== =====

[現在]




後來,我開始研究同自學消滅殭屍嘅方法,再喺YouTube睇外國人點樣整武器。

一般嘅方法係用桃木劍擊殺殭屍,而我整咗把桃木太刀,上面印有用朱砂畫嘅符咒。

冇用嘅時候佢可以係一支筆,有用嘅時候可以變成一把太刀;一個可以發出墨斗線嘅手錶。

現時為止暫時狩獵咗16隻,有時會見到一班掃街嘅人。

依家嘅我,仲係一個啱啱升上中六嘅學生哥,朋友數目:0





倩瑜:「你份中文交得未啊?miss叫我嚟收呀」佢叫蔣倩瑜,可能因為成績好好,同我呢啲「放牛學生」總係要唱反調。

「一陣啦」倩瑜:「唉...你係咪冇做呀?我同miss照直講㗎啦」「你咪去囉,唔好煩我」倩瑜嘆咗口氣:「算啦,你快啲做完再俾我啦」講完就行開咗

阿強:「喂,可唔可以唔好咁嘅態度呀」用一個唔耐煩嘅語氣「你收嗲啦」

係呀,學校有好多蔣倩瑜嘅兵,鬼叫佢靚咩,雖然個樣純純地,但我就覺得係扮,如果唔係點收咁多兵。

根據官方粉絲團嘅資料......男同學:「身高162、完美身材,俐落短髮長至肩膊、雪亮嘅大眼丶清純嘅外表...係完美女神!」好多謝呢位同學嘅介紹。

[通識堂]
何sir:「上次份小側大家都進步咗㗎啦,蔣倩瑜依然最高分」派卷排到我個位嘅時候。

何sir:「延亮哥,你真係要加油呀,大家都進步緊,唯獨你,寫一兩句都好呀,你考試都高分㗎,小測點會唔得,下次試吓做啦」每次我都係交白卷,原因好簡單......我唔想做。





何sir:「2b嗰題呢,好多人搞錯咗啊,同你哋講返先,首先呢......」

補眠時間。

待續
已有 0 人追稿