故事一：殭屍之城: 三：中秋佳節－獵殭編

［八記紙紥］
「健哥，照舊」健哥：「又係燒俾你家姐呢～準備好咗啦，我去拎俾你」

所有大時大節我都會去家姐個墳陪佢。今日係中秋，所以去咗平時去開嗰間紙紥鋪買嘢俾家姐。

健哥：「見你熟客，計你八折啦」「我想要2盒 thx」健哥拎多一盒出嚟

［家姐墳頭］
「又嚟啦家姐，我最近生活都仲可以～你嗰邊又點呀？」「我燒四個月餅過你，分開食啊～如果唔係食肥你啊」





「係呢～下面有冇睇中邊個鬼仔啊？有睇啱就上馬啦～俾其他鬼妺搶先就冇㗎啦」

「唔啱咪...你嚟探下我囉......我唔會嚇親㗎喎......」

賞下月丶吹下水，時間都差唔多，係時候落山。

打咗殭屍咁耐，唔多唔少有時間中都會見到「嗰啲嘢」依家咪有兩隻跟住我囉～

「夠啦～再跟出市區㗎啦，今日中秋，人氣咁旺，你哋唔驚咩？」嗰兩隻靈體停低咗。





今日周圍都好多人，幾個小朋友拎住燈籠追逐、亦有情侶過佢哋嘅「情人節」。

返屋企嘅路上，一把女聲叫住我：「魏延亮！」係蔣倩瑜、身邊有一個小妹妹。

點解會見到你「你好」蔣倩瑜：「一個人嘅？中秋喎」你理得我

「你個女呀？」蔣倩瑜：「去死啦！我表妹嚟㗎！家雯叫人吖～」家雯：「哥哥～」

嗯，hi。正當我想返屋企。蔣倩瑜：「你走嗱？」「唔」





蔣倩瑜：「不如晏啲先啦，當陪我湊女」你要人陪嘅，打個電話成班兵啦！

家雯：「表姐，我想要燈籠」蔣倩瑜：「表姐冇帶銀包喎」 家雯：「唔...」你唔好喊呀。

蔣倩瑜：「可唔可以幫我買住先呀？翻學校還返俾你啦」好呀，我去八記紙紥買俾你。

最後，我都係去文具店買咗個兔仔嘅燈籠俾佢。

家雯：「我依家想要螢光棒」想點呀...蔣倩瑜：「下...」

===== ===== ===== =====

［回憶］
細個嘅時候......「家姐！我要燈籠！我要燈籠！」家姐：「得啦！得啦！唔好扭計啦，家姐去買」





冇幾耐，家姐買咗俾我，我見到其他小朋友玩螢光棒，我又想要，但又唔敢再開口，所以就喊咗出嚟。

家姐知道咗，然後又去買螢光棒俾我

===== ===== ===== =====

蔣倩瑜：「家雯呀，唔可以咁㗎，個燈籠買咗返嚟都未玩過」我默默咁去買咗筒螢光棒。

蔣倩瑜：「咁會縱壞佢㗎」家雯拎咗筒螢光棒之後好開心「yeas！！！」

待續