開翻個電腦,我就見到成千個email已經等住我喇。

ICT panel, IT team, Internal affairs team, 裏面啲嘢全部都要我做,怪唔得知呢排甩多咗咁多頭髮喇。
 

我做到深夜,就嗌咗個真外賣:豆腐火腩飯,再喺雪櫃攞翻罐汽水,開埋個電視睇場波。 

我就咁望住除咗我之外得一個人嘅五百尺單位,慶幸自己可以有錢獨佔呢五百尺空間,又可憐自己點解人到中年都只可以孤單咁生活落去。 

睇住自己,呢個又大肚腩,地中海又越嚟越嚴重嘅中佬身軀,唔通我呢世都溝唔到女喇?




星期一,我拖住疲倦嘅身軀隔硬逼咗入部巴士到。喺返工呢段繁忙時間,巴士總係逼到好似沙甸魚罐頭咁,大家就咁聞住對方嘅臭汗味。

去到落車嗰陣,我件恤衫已經充斥住麻甩佬嘅味道喇。
 我望一望錶,發覺就嚟八點半喇。

死得!今次要快啲衝去學校,費時遲到俾副校鬧。
 

好彩,我都係趕得切去校務處拍咭,不過個人就已經攰到喘嗮氣咁囉。

唉!人越老真係身體機能都冇咁好喇。



校務處嗰個恐怖嘅女人見我死死吓咁嘅樣就講咗句話:「劉sir 今日有啲遲喎!小心俾啲學生見到你咁嘅樣呀!副校唔中意㗎!」
 

點解呢間學校啲規則可以咁嚴㗎。點解啲傳統女校係鍾意啲咁嘅作風㗎!

我放低個袋,就即刻衝去班房上班務堂。

入到去5Z班班房,我就已經見到陳副校好滋悠咁坐咗喺班房到用緊電腦。

唉!佢一向都唔中意啲老師遲過佢入班房㗎!
 我唯有無聲無息咁入去課室,希望佢察覺唔到啦。



 「劉sir,你今日有啲遲喎!你死得喇!」班上面嗰個煩膠學生 Stephanie竟然唔知定係專登咁大大聲講,擺明係想玩死我啫。 

「劉sir, 你嚟咗喇?有啲嘢想問你。」副校帶住副睇電腦先會帶嘅阿婆眼鏡,擰過嚟望住我。

佢今日着住件黑色貼身裙,一坐喺到就唧嗮啲肥肉出嚟,簡直係核突到死。
 

「劉sir, 我尋日email叫你做嗰份report 做咗未?」

吓,唔係呀話?星期日仲要人做嘢?我星期日點解要check email 呀?‘

 
已有 0 人追稿