「真係估你唔到喎,明明你以前一次過chur 五支煙㗎。」佢笑口噬噬咁講。

係囉,宜家啲𡃁妹話自己一次過食到兩支煙就已經好勁喇喎,真係井底之蛙。

「欸,一次過點真係食得嗮五支煙呀,呢啲係排場嚟嘅啫。」

「邊係喎,你環保大使嚟㗎嘛,每支煙都食到渣都冇得剩先抌嘅!」唔係講笑,中三嗰時唔知邊個miss 塞咗班會個環保大使嘅職銜比我呢個飛仔。

「是但啦,食五支煙都係爲咗show 我個絕技嘅啫!」



講到呢到,腦海即刻自動回放住廿幾年前嘅畫面。

「你一次過又嚟五支煙呀?」我哋圍埋喺後樓梯到。

「喂!同學,你喺後樓梯到做咩呀?快啲擰翻轉面,對住我!」呢把聲一聽就知係訓導,佢又嚟捕住我哋班爛仔喇。

呢個時候,衆人唱起賭神嘅音樂。

「各位觀衆,五——條——煙!」我緩緩擰轉身,只不過手上嘅已經唔係煙仔,而係五張煙士牌!



「劉文榮,你哋宜家啫係聚賭啦!係咪要寫悔過書呀?」

「你咁樣講就唔啱喇,一個賭局只會有4張煙士牌,而唔係5張,所以我哋唔係賭緊錢喇。同埋,事關小弟呢就係學校數學學會嘅會長,今日又有學會聚會,講及呢個機率嘅問題喇喎,所以我就隨身攜帶住作爲教學用具嘅兩副啤牌喇。你睇?」我隊咗兩盒啤牌比條友,再塞埋真嘅會議議程比佢睇。

訓導頓時變得冇嘢好講,因爲我真係數學學會嘅會長。

「哈哈哈,諗返起都覺得嗰時我哋好柒呀!」我續道。

「咁又係嘅,但嗰時我哋真心覺得大佬你好型㗎!」佢誠懇嘅眼神仿似同當年佢求我收佢做𡃁嗰個敬佩嘅眼神重疊。



「算啦,我宜家都唔係你哋大佬囉。要認嘅就認呀偉,佢最有錢,跟佢搵食實有着數。」昔日看似無畏無懼嘅大佬一早已經變翻嗰個蛇𠺌,比人食住嘅懦弱小男人。

「係呢,啱啱聽你提起老婆喎,你哋一定好恩愛啦,咁聽佢支笛。」我將話題轉移去另一到。

「哈哈,都喺嘅,不過我最聽嘅係我個女支笛。你睇下,佢幾得意!」佢開咗部電話,熒幕上面係一個笑得好開心嘅細路女,眼神仲冧過望住佢當年嗰條女。

「又真係幾可愛㗎喎!」

「咁你呢?老婆點樣㗎!」死喇,早知我就唔揀呢個topic 啦。

咁啱得咁橋,其餘兩個都翻咗嚟喇,而佢哋一知道我哋講緊啲乜,又開始逼問我。

「誒誒誒......其實我宜家係單身。」

「咁又係嘅,睇你個樣就知你仲未定落嚟啦!唔緊要嘅,男人50歲結婚都仲得嘅!玩多幾年先定落嚟都好啊!」



「車!結婚有咩咁緊要喎,我同條女拍拖拍咗十幾年都未結婚,結婚係愛情嘅墳墓嚟㗎嘛!」見呀健着到咁不羈,就知道佢唔係一個鍾意綁住自己嘅人。

「哈!計我話喎,結完婚都可以好自由嘅,睇我就知啦!平時幾多女埋身!」有錢佬出去沾花惹草都好正常嘅。

「唉!呀輝!睇你個樣已經知道你已經徹底成爲一個老婆奴喇。我地一齊爲你默哀翻幾秒鐘。」

其實過咗咁多年先見得翻佢哋,大家仲可以有講有笑,都算係幾唔錯呀!

「咦!班花嚟咗喇喎!」隔離檯忽然間指住門口。

哦,一個以前畀我食檸檬嘅一條女。
已有 0 人追稿