我中出咗副校: 74.成績表

嚟到一學期一度嘅家長日，班主任們唔單只要見學生家長，仲要將佢哋最緊張嘅成績表交出。

去到呢度，當然少不免會有啲麻煩家長啦，只不過我大可以狐假虎威，唔使好似死狗噉服務班客人。

畢竟，副校可以話係連家長都會驚嘅存在嚟㗎喎！

儘管係噉，呢間學校啲家長着緊嘅未必係分數，而係面子。

我拖住疲累嘅身軀，八點半就衝返學校，就已經見到無數身光頸靚嘅家長。



名牌，貴袋，恤衫充斥住整個校園，有啲女人仲要攞住個袋喺度捹下捹下，同奉行精英制度嘅學校非常之夾。

真正嘅有錢人係唔會噉張揚嘅。

因爲家長日主要都係副校喺度講嘢，所以我就好似個花瓶噉坐晌度，乜都唔使做，直至我見返自己班學生。

「Cherry Yu, Please come in.」副校擺起架勢，迎接住Cherry 同佢身邊陌生嘅女人。

唔係講笑，佢哋兩個真係望落唔係好熟，好似中間隔咗幾米噉。



女人同樣係個絕頂嘅美女，只不過佢五官睇落比起Cherry 更加強勢，鼻樑更架起一副鐵框眼鏡，兩人嘅風格係截然不同。

只不過，佢冇好似出面班人扮嗮蟹着靚裙，而係以白T闊褲，一對普通嘅波鞋，相對比較街坊look 嘅形象示人。

但係，街坊裝無阻佢顯露保養得宜嘅身體曲線，而白T 更加有住放大個胸嘅作用。

唔好誤會，我對人妻冇特別癖好，只係習慣觀測身邊嘅女性啫。

「余太，請坐。」去到家長日，副校總會久違地喺學生面前講返廣東話。



佢亮麗嘅成績表上面全部都接近單位數排名，其中喺我嗰科以及PE 都係排第一嘅。

最衰學校嘅全級第一長期被文科生佔據啦，如果唔係嘅話，佢非常之有潛質做嗰個最頂尖嘅學生。

副校一輪嘴喺度講啲咩課堂表現之類嘅，而嗰個女人都好耐心噉聽，只係Cherry 睇落個樣有啲唔耐煩，仲時不時望住我，好似想暗示自己唔想再聽落去。

既然我都冇嘢做咗成朝，我就襯副校開始講到選修科嗰陣主動插嘴。