一講起老蘭,已經好多年冇去過。呢幾年比Sophia佔據哂我嘅生活,就算連幾個朋友約飲酒,只要入面有一個女性朋友曾經鍾意過我,我都唔會可以去。佢就會呷住醋咁話:「你點知人地係咪仲鍾意你喎!哼,唔理呀,佢唔嚟你先準去。」咁唔通你同d fd講,呀邊個邊個唔去我先可以去呀...所以最後好多時候都去唔成。慢慢人地約飲酒嘅時候就唔會諗起我,因為大家都知道,我女朋友唔比。呀,係ex先岩。

老實講咁多年冇去,唔知而家會係點。係咪仲係一大班男人係入面好似打rugby咁逼嚟逼去,定係個場同玩法已經唔同。曾經有fd同我講過,我地呢啲年齡落到去邊個邊個場唔岩玩嫁啦,入面全部零零後。然後我計一計數...完來零零後最大已經都20歲。但係香港,落club嘅選擇本身就唔多,加上我都係純粹搵個地方發洩下。

11點半賢狗已經係中環等緊我,佢身邊仲有兩個我未見過嘅女仔,同一個佢溝緊嘅女仔。我諗佢係驚我落到去食白果先帶幾個女仔嚟...傻啦,佢邊有咁好心,佢純粹想借個機會溝其中一個。
「Hello我係Nicole~」高少少嗰個女仔對住我笑一笑,樣中上。
「叫我妍妍得啦!」妍妍生得矮少少,係偏可愛嘅一類,有酒粒。
賢狗帶親嚟飲酒嘅女都唔會差,身邊有唔少fd都係靠佢介紹去識女仔嘅。但有時真係唔知呢條契弟係邊度識埋咁多女,高矮肥瘦,佢統統都有。
「我地應該有見過啦?我係Judy呀~」賢嫂(雖然未係)同我打招呼。
「咁人齊就行啦,佢地話想飲D酒先,你ok?」賢狗問我。


「是但啦,做咩問我。」
「你係主角呀嘛今晚!」
「係喎,聽呀賢講話你失戀。」Judy邊行邊講。
「咪聽佢亂講嘢啦!有機會再講..」
「人地都未有酒,點講呀哈哈。」Nicole笑住講。

我地五個人去左間吧先,叫左幾支大酒加d mixer,開始玩下酒game。
「聽杖,五呀!」「十!」「對呀!五呀!飲啦!」「屌...」
十五二十係其中一個我最叻嘅酒game,好少有女仔可以同我猜係羸多輸少。呢隻game好多人話你運氣搭夠就得,但猜得熟嘅人就明,每個人出枚都會有個pattern會捉到路。加上酒量越屎嘅人好快反應唔切,叫五出十。Nicole係少有同我猜到可以大戰三百回合嘅女仔,佢酒量都唔差,睇佢個款應該有飲開。妍妍就開始係咁輸,就算之後轉左玩大話骰佢都係咁輸。賢狗同Judy就係執邊兩個人自己玩「五枚」,我明知佢想溝女,都唔會去阻住佢。
「我想去一去廁所呀...」妍妍塊面開始紅。


「去呀去呀~」我答。
「係喎,你唔係話你失戀咩。搞咩呀,講嚟聽下?」Nicole呢個時候突然間講。賢狗同judy都停左手,控埋嚟食花生。
「唉屌..」我飲一飲左啖酒,「我比人戴綠帽。」然後放低個杯。有時唔知點解,有心事你未必會想叫齊一大班你識嘅人去講,更何況係比人戴帽咁柒嘅事。反而如果有一個你同佢三唔識七,但佢唔介意慢慢聽你分享你嘅故事嘅人,你選擇同佢講哂內心嘅說話係好舒服嘅一件事。所以點解咁多人失戀講心事好易同異性發生關係就係咁解,因為你會得到佢嘅同情,同時你需要慰藉。
「下...Sorry呀,我唔係有心咁問。」Nicole有D唔好意思咁講
「唔緊要呀,都過左去。只不過,冇諗過咁突然姐。」我答。
「但你地一齊左幾耐?」
「岩岩過左第4年。」
「嘩...咁都真係幾hurt,我都聽過有個fd一齊左5年比個男仔戴帽。」Nicole講。
「或者咁講啦,我自己本身好接受唔到出軌同講大話。如果佢一早同我講佢鍾意左第二個,我唔會好似而家咁嬲咁憎佢。」
「屌!今日同你落嚟就係想你開心姐~我地唔好講d衰嘢,唔提條八婆!」賢狗話。


「岩呀!我地一陣轉場落去玩陣?」Judy提議。
「我係咪錯過左D咩呀?」妍妍返返佢個位。
「Judy話轉場玩喎~你OK?」賢狗問。
「OK呀!行啦~」
「你真係OK..?睇你好似好醉喎。」我問。
「冇事呀,唔好睇少我呀,無為掃大家興啦!」
「好啦,行啦。」
————————————————————————
「你得唔得嫁?睇落好似好醉咁喎。」我問Sophia。
「傻啦!睇少我呀,我不知幾飲得!」佢答。
「B,你咪話想同我去一次Club嘅?不如而家轉場?」我問半醉嘅佢。
「好呀嘻嘻,想同你去好耐,但你唔準亂摸人呀!」
「痴線!有個咁靚女嘅女朋友仲去摸其他人咩!咁仆街會比雷劈嫁!」我笑言。
「你話嫁!同埋入到去唔準望其他女仔呀!」佢谷起左塊面,扮嬲咁講。
「係係係,知道知道。」我笑住答佢。



「哈哈哈,你識唔識跳嫁,你睇下人地,要跟住節奏嫁嘛!」我話。
「咩呀,明明我就跟住節奏,你係唔跟炸!醉啦醉啦,又話千杯不醉,嘻嘻。」
「咁你要唔要執我屍呀靚女。」我問。
「執你個頭呀!邊有人咁講嫁!哈哈」佢笑得好開心。
———————————————————————
「呀文?」「喂...」

你可知道 對我做過 什麼最殘忍
就是你 狠狠把我 一夜之間 變成了大人