「你識佢?」個男人問李小姐。
「嗯....我飛之前就係撞到佢架車....」李小姐話。
「哈哈..小事啦....唔洗咁介意嘅...」我有啲尷尬咁講。呢個時候Nicole行埋嚟。
「做咩啦?」Nicole問我。
「冇,我嚟之前咪話撞到車,就係佢撞到我...」我細細聲同Nicole講。
「我會賠返錢比你..唔好意思呀」個男人話。
「嗯...冇事呀,係喎,我叫呀文~佢係Nicole」我望一望Nicole然後伸左隻手想同個男人握手。
「我叫呀健~佢係..」佢握一握我手。
「我叫Kaman」李小姐話...Kaman話先岩。
「咁我地幫你地影相先~?」呀健話。


「好呀~唔該哂」我比左部手機呀健,然後同Nicole一齊行後幾步。
「最好影到一半個天一半個地啦~唔該哂~」Nicole同呀健講。
「我...盡量..哈哈」呀健話。
「我幫你地影啦,呀健唔識影相」Kaman話。
「頂你...我不知幾勁...」呀健話。
「係呀~幫我影得差炸嘛~」Kaman講笑咁講。我將隻手放係Nicole條腰度,我好鍾意放呢個位,因為佢條腰真係又幼又有彈性。同埋以我地嘅高度,咁樣影都幾靚。

「好,準備~三,二,一。好!仲有冇其他post」Kaman話。我將Nicole另轉面對住我,然後想錫落佢個嘴。
「喂也..唔洗啦..」佢好似有啲怕醜咁推開我。
「傻妹,唔怕啦」我講完就合埋眼錫左落佢度,然後Kaman都好識做,冇數三二一就直接影左幾張。


「哇~好sweet呀」Kaman話。Sweet呀..但我地唔係情侶..
「衰人...」Nicole好怕醜咁打左我心口一下。
「哈哈..咁我幫你地影啦~」我同Kaman同呀健講。
「好呀!唔該哂」呀健話。雖然係我講,但影相呢家嘢,都係交比女人好啲,我將佢地部手機比左Nicole。
「好~三,二,一」Nicole影嘅時候我望住佢部手機,佢真係影得好pro,好似有影開相咁。
「傻妹你有影開相嫁?你影得好靚!!」我問Nicole。
「冇呀~冇專登去學,純粹好鍾意影~我幫你影啲相都好靚嫁!你都未睇」佢話,佢講完我即刻睇一睇,真係影得好靚...唔知點解釋點靚法,但好有feel。
「係喎,影得好好!你咁叻女嘅~」我摸一摸佢個頭,而呀健同Kaman都返返過嚟。
「唔該哂~」呀健話。
「係啦,你地一陣點走?因為好似冇哂車了...」Kaman話。


「下..係喎..死啦我冇Check添..」我話,唔通踩單車出去咩...
「我地本身諗住搭uber出返去,你地想唔想一齊?」呀健話。
「可以呀~」「好」我同Nicole一齊覆佢。
「你地影多陣相先啦~我留個wtsapp比你,我同Kaman行返出去食啲嘢先」呀健話,因為濕地門口有啲小食嘅攤檔係度。佢地走左之後我同Nicole再影多左陣相,然後我攬住佢企左係度享受周圍嘅景色。
「差唔多啦~個天都開始暗,同埋我都廢時要佢地等咁耐~哈哈」我話。
「嗯~行啦」我地行返出去,我send左個Wtsapp比呀健,佢話係其中一檔小食檔等。出到去佢已經call左uber,司機仲有十五分鐘先到。
「我payme你呀~」我同呀健講。
「得啦唔洗啦,Kaman撞到你架車我都有啲唔好意思..」
「咁好啦」
「係呢,你地幾時返香港呀」呀健問我。
「我地應該星期五朝早返..但仲未買機票」我之後同呀健都傾左好多嘢,佢都算nice同健談。我地兩個傾嘅時候,Nicole同Kaman都有講有笑,我好好奇佢地傾緊啲咩。

架車到左之後呀健坐前面,後面由左至右係我、Nicole同Kaman。上到車個車主都好nice咁不停同我地講嘢~仲介紹左好多好食嘅餐廳比我地。
「你們是double dating 嗎?哈哈以前我跟我老婆也試過,後來她說蠻尷尬的,所以最後就沒有跟朋友和他的老婆一齊出去了」司機話。
「哈哈,禾忟剛應識的...因為之道大揸是香港人所以才依始坐車」呀健話。


「哈哈真的假的,這麼有趣」
「你啲普通話咁屎就唔好講啦...」Kaman同呀健講。
「聽得明咪得囉~係喎,我同Kaman都覺得你地兩個好襯~係咪拍左好耐拖啦?個Feel似拍左好耐但又好sweet 咁」呀健話。
「.....」「....」我同Nicole都諗唔到點講,靜左一兩秒..然後我話。
「我地..唔算係拍左好耐炸~」我話。唔算係拍左好耐?...屌..直頭唔算係拍拖呀....
「哦~我同Kaman仲賭你地一定拍左好幾年」呀健又話。

大家都覺得我地好襯,係呀,我都覺得呀,咁又點?有幾襯有咩用?係外人眼中我地係好sweet,冇錯呀,但我地一樣唔係男女朋友。衰啲講,我地跟本都唔知叫做係咩關係,算係情人?唔係。

我只係一個醜陋嘅第三者

做錯事也為你 半生也仿似死
在暗地見面日頭閃避
但我沒法怒 他跟你早結婚
和我步近亦有失身份



為何沒一個秘密地方
黑箱內並無陽光
該不怕有人圍剿 第三者的我
陪著你 時日無多