因為ex，我決定向全世界嘅女人報仇: Rachel赴約

新一日如常地返工，放工嘅時候Rachel wtsapp我。
「我今晚唔同你食啦」佢話。
「約左人？」
「係呀..琴日咪話個男仔約我，佢約左我今晚食飯」
「哦～好啦～你有帶鎖匙嫁嘛？」我話。
「嗯..有呀」
「咁好啦～小心啲啦，玩得開心啲」
「嗯～」
我打完字就準備開車，但係...食咩好呢..？平時習慣左佢諗食咩，佢對於食好有主見，我跟本唔洗諗要食咩。而我自己都係好多都冇所謂，係真係冇所謂嗰種，而唔係例如佢講完話食日本嘢我就話唔想食生嘢嗰種。我地嘅相處就係咁舒服，一個好有主見，一個好冇所謂。我記起以前同Sophia一齊嘅時候，我地兩個都係啲超級選擇困難症嘅人，往往去到最後就會一齊諗到餓死都未有得食。我都曾經有諗過要改左呢個壞習慣，所以我之後都開始比啲意見，只係Sophia份人本身又好腌尖....。到我好努力諗到要食咩啦，佢又成日ban左我嘅決定。



算啦唔諗了，我揸車返左去屋企樓下，途經三哥就買左個米線返上屋企食。我打開電腦，隨便睇啲YouTube suggest video，然後拎左碗米線入房食。我好似好耐冇試過一個人係屋企，有少少唔習慣，平時都有Rachel係度嘈喧巴閉....又講下邊個邊個演員好靚仔，邊個邊個屋企隻狗一打針就叫到好大聲。唉..而家七點半，佢都應該開始食緊嘢？不過佢都咁大個女啦，唔會有咩事嘅。我繼續係度隨便碌下睇下有咩睇，同時食緊我碗淆肉懶肉生小。咦...？點解今日suggest啲片咁奇怪嘅，我平時都冇睇開呢啲。然後我望一望右上角...個icon係Rachel嚟。...條友用我部電腦冇登出嗎..？我見到啲片都係關於愛情...嗱...唔係我偷睇呀....YouTube suggest我睇嫁..：

「男人喜歡你的五個特徵！」
「看完這條影片，保證你成為最有吸引力的女生！！」
「追男生必勝秘訣！這樣做100%男人會淪陷！」
「跟男生約會懶人包！學懂了就能吸引所有男生！」
..............佢平時究竟係睇幾多呢類型嘅片，竟然成個YouTube都係類似嘅片，然後有少量綜藝節目。佢好想拍拖咩？..我知佢對我有好感，我對佢都有好感，但唔代表要一齊嫁嘛。咁..佢睇呢啲片係因為我呀..定係因為今日約佢出嚟嗰個男仔？唉，我又係度亂諗咩....唔會係我啦，「男生約會懶人包」喎，擺明係今日約佢嗰個男仔。因為我仲有一點好諗唔明，我真係唔知當初佢話嚟我度住係因為佢好人定點。佢做獸醫護士，天生對所有生物都有好強嘅愛心。咁究竟佢係對我好，定係佢同情我，對個個人都係咁好。我有時覺得自己會錯意，因為佢間唔中又會同我好保持距離。老實講，我有時真係睇唔透。可能你話，屌，擺明就鍾意你啦..但有時你太自以為事都會出事。

想當初，賢狗都同過個一個女仔曖昧過。我地中學嘅時候讀男校，但隔離學校有個女仔日日都同賢狗一齊放學，係差在未拖手。嗰陣我地每日上堂都會討論佢地。
「屌！擺明鍾意你啦～唔係人地貪你順路一齊返屋企咩」中同Ａ講。


「真喎，我都係咁話」我講。
「係囉其實都出哂面，人地等你表白炸」中同Ｃ講。
「其實我都覺...係我冇信心..咁如果衰左呢？..」賢狗話。
「屌！」「屌～」「屌！」我地三個一齊屌佢。
「洗唔洗餵埋你呀..人地都送到上門...」中同C講。
「今次我都覺得十拿九穩」我話。
「好啦....我考完試就同佢表白」賢狗話。
最後我地幫佢諗左好多方法，又去旺角買啲MK禮物，又送公仔又剩。去到表白第二日，賢狗成個人頹撚左咁返學。然後我地從佢口中聽返，佢話一直都係當佢朋友，從來都冇諗過同佢拍拖。
「你知唔知最hurt係咩..？」賢狗問。
「你講」中同Ａ講。


「佢話佢由始至終都冇鍾意過我......」賢狗話。
嗰次係我第一次聽「好人卡」嘅概念....完全顛覆左我對女仔鍾意人嘅定義...原來..咁都有得輸？到後來我先發覺，有啲女仔真係可以同你做啲好似拍拖嘅行為，但佢地從來都只係當你「朋友」。

我同Rachel有冇可能一齊我唔想諗，反正對我而家嘅我嚟講，愛情帶比我痛苦多過快樂。既然開始同結束、揚帆同回程嘅結局都係一樣，最後都係孤身一人，但呢個過程會帶比我無盡嘅刺痛。咁如果再有機會，當我再一次企係岸邊，面對汪洋大海，我都唔會再選擇揚帆出海了。

唔種下嗰啲因，就唔需要摘來嗰的苦果

如花 超生了沒有果
如果 過路能重踏過
就當最初 是碎步湖上可不可
不種下甚麼 摘來甚麼
像我沒來過 沒去過