因為ex，我決定向全世界嘅女人報仇: 我信你

第二日我一開眼就見到Rachel托住個頭係隔離望住我甜笑。佢望我嘅眼神同以前好唔一樣，我係佢眼入面望到我。佢好幸福，笑得好甜，好似岩岩拍拖嘅細路女咁可愛。好耐冇試過有女仔比到呢種feel我...之前拍拖嘅女仔多數都拍過幾次拖，佢地都唔會有一種好開心好願望成真嘅感覺。但係Rachel而家比我嘅感覺，就係我feel到佢真係好渴望可以同我一齊，然後琴日終於成功左咁。

我撥一撥佢嘅頭髮，笑一笑，然後錫左落佢度。我心入面暗暗發誓...今次，我一定要好好愛一個人。由被遺棄、想報復、放蹤自己、沉船、再被遺棄....我夠啦...一啲都唔好玩。邊個同我講話做player好正...，我發現，我根本做唔到player。我冇辦法同冇感覺嘅女仔做愛，我更加冇辦法做到啲咩所謂嘅「fwb」、「sp」、有性冇愛....。因為我自己知自己係一個重情嘅人，我玩唔起。好似同Nicole咁..或者我係一個player，我唔上心，而家就唔洗咁痛。今次終於有個我感受到佢全心全意愛我嘅人，我又點會捨得放手。

「呀文～你想我點叫你呀？」Rachel笑住望住我，佢今日真係好開心。
「下？叫呀文咪得囉～」
「唔得～我地一齊左，點可以仲咁叫喎～我要有個獨家嘅叫法！」
「哈哈，咁你想點叫都得」我話。
「唔.....叫文文啦！」
「好女仔喎～好似叫到我成個女仔咁」


「咁呀...咁...我又唔想叫b,bb呢啲咁老土...」佢話。
「隨便啦～你最叫我都鍾意」我又錫左佢一啖。
「就叫文仔啦！以後你就係我嘅文仔～」
「哈哈，好呀～你鍾意就好」
「緊係鍾意啦！你係我嫁喎！」佢撓實我手臂，好似驚我會走咁。
「傻妹，咁我叫你凝凝啦～」
「嗯！！」佢笑住咁將個人再挨近我少少。講真，我真係越嚟越鍾意佢，佢好小鳥依人。再加上佢而家乖乖女嘅性格，我都唔擔心佢會出軌。
「係喎～咁..我地要計今日定琴日..？」佢又問我。
「嗯？」
「咁..要知道邊一日先係紀念日嫁嘛，我地琴晚一齊嘅，但過左12點...」佢話。


「傻妹！計琴日啦，我都算係琴日就確認左同你一齊」
「嗯！文仔～我地以後要開開心心，好冇？」佢望住我。
「好！凝凝，我地一定會開心！」我地四目相對，呢一刻，我個心終於都放左Nicole入雪櫃冷藏。我決定左，要好好對Rachel...就當係最後一次信一個人。如果....touch wood...我地真係分手...我諗我真係唔會再信人。唉，邊有人一拍拖就諗分手，痴線..。

我起左身，首先將衣櫃入面Nicole著過嘅衫放入一個袋入面，再將個袋放到衣櫃最底嗰格。然後刷牙洗面，一切照舊，但今日唔同嘅係，我終於拖住Rachel隻手一齊去食早餐。
「文仔～你發唔發覺平時我同你食早餐嘅時候，我成日都借啲意拎你啲沙嗲牛食」
「我知呀，做咩咁講嘅？」
「其實我麻麻地鍾意食嫁..但係想同你有多啲互動，哈哈」
「傻瓜！我緊係知你有目的啦，你成日都借啲意想同我close！不過我真係唔知你麻麻地，咁以後唔洗拎我啲沙嗲牛啦！」我笑住講。
「借你個頭！講到我好似倒追你咁........。雖然真係.....」


「唔重要啦，重要嘅係，我地一齊左」
「咁又係～但我明明就feel到你都鍾意我...我想知點解你唔表白...係咪都係因為Nicole？」佢問。
「撇除Nicole呢個因素...嗰陣我好驚你對我好係因為你好人。因為我知你好有愛心，我好驚你對我純粹係出於朋友嘅關心...。同埋我有少少自私..我好驚表白失敗左之後會影響到我地嘅關係...我想你一直係我身邊...所以就索性維持住咁樣嘅關係....」
「哦.....乜我嗰陣對你似朋友咩...」
「我冇100%肯定都唔敢踏出嗰一步，其實係太驚失去你」我話。
「嘻嘻～放心，你以後都唔會失去我」佢話。
「好～我信你」

呢一句「我信你」唔係純粹講比佢聽，而係真係咁覺得。我一直都覺得佢好比到安全感我，同Nicole好唔同嘅係，Nicole 嗰種若即若離嘅感覺好唔踏實。但我同Rachel一齊，係真係好有信心。

我信，我地兩個會有好結果

當一切也跌倒了
是你令我再次找到心跳



當一切也失去了
沒有預料　至少都可擁抱你哭笑