平安夜嗰日我同Rachel都要返工,但我一早同老細講定我早啲搞掂啲嘢早少少走。Lunchtime 嘅時候我已經去定買禮物,我本身決定左買個手袋比佢,因為佢嗰個都殘殘地但又唔捨得換。我知佢鍾意啲簡單啲嘅款,但我唔係好sure想買咩顏色比佢,所以都係跟返佢舊嗰個袋,買左深藍色。反正就算佢唔鍾意,我都keep左單可以退或者換。返到公司我將佢個袋放返入背囊,然後再wtsapp佢confirm佢今日放工時間。
「凝凝,你今晚係咪收6?」我問。印象中佢好小會ot。
「係呀~」佢秒覆我,應該都食緊飯。
「今日食咩呀衰妹!」
「同tiffany食米線呀~佢話想食」
「Haha 好啦。係喎,我今晚可能要遲少少收...我諗7點幾」我扮遲放工呃佢。
「好呀唔緊要呀,我等你放工啦!」
「唔洗啦,唔想你等」
「唔緊要啦,我可以行下dondondonki等你~哈哈」佢話。
「好啦,咁我盡快」我繼續扮好自然咁。



我5點15就出左公司,預鬆少少去太子接佢放工。我路過見到間麵包舖,順便買左個cake比佢,氹下佢開心。行到佢診所附近嘅時候,我搵左個佢唔會見到我嘅位,但我又可以睇到佢出左嚟未。如果你有試過接人放工,每一個出入嘅女人你都會留意..有時好驚自己睇過龍。等咗10分鐘終於見到佢出嚟,我慢慢行去佢後面。
「咁岩呀靚女~」我係佢後面攬住佢同佢講。
「哇!你嚇死我啦!..呼...我心諗邊個咁大膽日光日白非禮我...」佢彈起左下。
「哈哈~surprise~」
「衰人.....咦!你買左cheesecake 嘅!!!」佢見到我拎住。
「係呀,上車食啦~」我話。然後同佢係車入面食cake,再揸左去尖沙咀。
「下我地唔係返屋企咩?」佢問。
「我想去尖沙咀買啲嘢先」
「好啦~」



我將架車泊左係酒店附近嘅街泊位,我驚佢發現我個surprise ,所以之後先泊返入酒店。我拖住佢去扮周圍行,然後行行下突然間轉入酒店lobby。
「下做咩入呢度嘅?」佢問。
「我想去廁所...」
「好啦....。下做咩行呢邊嘅?」佢再問,我冇理佢。
「checkin 唔該~」我比左張身分證個front desk。
「下...?」Rachel 呆左咁望住我。
「兩位嘅?麻煩都要小姐嘅證件」個staff話。
「你拎張身分證比佢吖~」我話。
「下...點解嘅....?....」佢仲係呆呆地。


「哈哈傻妹,快啲啦唔好要人等」
「..哦!..」佢仲係好唔敢相信嘅樣。
「平安夜呀嘛~緊係要慶祝下啦」我話。
「你幾時book嫁...」
「好早book左啦!」我話。我地checkin完之後就一齊上房,我專登比左張房卡佢去開門。佢一開門..
「哇!好靚呀!!!」佢好開心。
「哈哈,你鍾意就好」我話。
「好鍾意呀....!勁靚囉...望住個海」
「傻妹~Surprise ~」
「嘻嘻我愛你呀!!」佢擰轉身過嚟抱住我。
「我都愛你~」我笑住抱實佢。
「咦係喎..咁我咪要拎啲衫換...」
「我一早幫你拎左啦,放左係架車入面,仲有啲護膚洗面嗰啲」我話。
「咁好嘅!!你拎左邊件衫呀?」
「我求其拎嫁炸...我見你平時著咩就拎咩哈哈。係啦,既然你而家都知啦,我落去泊返架車去停車場先,你係度等我啦」


「我陪你落去啦,我唔想自己係度~」佢話。
「好~行啦」

我相信,呢個聖誕有Rachel陪我過,我一定可以好開心好幸福。記得以前同Sophia拍拖,頭嗰一兩次慶祝都算好開心。但之後就算我有哂surprise ,佢都好似唔係好驚訝又或者唔係真係好開心咁。有時我以為係我啲驚喜唔夠好,但慢慢我發現,佢好似覺得可有可無咁。或者拍左一兩年之後佢個心已經唔係我度...但點解當時嘅我仲咁蠢咁為佢做咁多嘢。我突然間慶幸我踢爆左佢,如果我冇發現佢同呀明有路,我應該一世都做緊傻仔養埋人地條女。我細細個曾經好天真咁覺得只要對女仔夠好,佢地就自自然然會留係我身邊。但大個啲就發現,拍拖真係可以好複雜。我而家拖住Rachel係身邊,我已經好知足了,唔會再要求啲咩。

因為冇嘢係理所當然嘅