因為ex，我決定向全世界嘅女人報仇: 巴黎

我要跟公司去幾個國家嘅分office，一齊嘅仲有幾個同事。上機前我先知原來一去就至少要去半年，我開頭以為去幾個月，冇諗過要去咁耐..但始終我應承左。我而家諗返，可能係個男人專登叫我過嚟，我唔知佢有咩詭計但我除左聽佢話都冇嘢可以做到。

我地第一站係巴黎，去到歐洲其實我都冇咩心情玩。我忽然間諗起同呀文去旅行真係好開心，就算係台灣呢個去左咁多次嘅地方，我都唔會覺得悶或者厭，但係今次真係得返我自己。到步第一日夜晚，我地要開個會，我返到房換左套衫就落左去另一個同事間房開。我地今次計埋我total有五個人，總共三個男人兩個女人。我一入房就見到帶住佢地嘅男人，叫Kenson，佢係公司算係幾senior。另外兩個坐左係梳化嘅男人叫王子同Jackel，仲有個坐另一邊梳化，細細粒嘅女仔叫Winkle。我唔算係佢地嘅一份子，大家對我嘅印象都純粹係覺得我係老細派嚟睇住佢地。
「你嚟啦？坐呀，好，我地開始啦咁」Kenson同我講。我坐左係Winkie隔離，望住佢笑一笑。佢好似好客氣，當正我係老細咁尷尷尬尬。
「好，我諗你地都知我地今次嚟要做啲咩嫁啦，我地先講左同分Office.........」Kenson開始左個會，而我坐左係度聽，但個心就諗起呀文。我唔係佢身邊，佢一定好唔開心。我個腦開始諗有咩方法可以令我脫離到而家嘅生活，慢慢就開始發呆，冇專心聽到。
「我覺得可以試下同法國呢邊Office傾下個合作位，Nicole你可唔可以幫我問清楚老細個requirement？」Jackel話。
「Nicole..？」Kenson望住我講。
「係！..Sorry呀我岩岩有少少攰」我話，平時我好少會咁唔專心，但一諗起呀文我個人就好難集中。
「唔緊要，可能Jet-lag未慣，岩岩Jackel話...」Kenson補充返比我聽。
「嗯，我可以幫你地問一問」我話。之後個會我都冇太用心去聽，佢地講左多一陣我地就返左房。我平時都好少同佢地傾計，但佢地好似私底下都算Friend。



第二朝起身我地要去一去分Office開會，佢地有司機係我地酒店樓下接我地。去到佢地Office有個少少嘅Welcoming party比我地，然後就開會到Lunchtime。佢地嗰邊Office嘅culture冇好明確嘅 "Lunchtime"，只要你肚餓，唔係開緊會就可以隨便去食嘢。我同Kenson佢地一行五個人一齊出去食飯，我拎住手機諗住check下google map，點知突然間有個人係我後面跑過，佢搶左我部手機！！....
「Hey...！」我大叫，但我地幾個都呆左係原地，可能因為我地都冇試過比人搶嘢。我就咁望住個條友走..附近嘅人都冇諗住幫我地。
「你冇嘢呀嘛...？」王子問我。
「冇....唉..我部手機....」我好唔開心..最主要係因為我同呀文嘅回憶係哂入面，冇左部手機我就冇哂啲相。同埋我冇左呀文嘅contact....唉。
「小心啲呀..呢度都多扒手」Kenson話。
「嗯..」
「洗唔洗我地同你買返部手機先..？我地仲有排先返香港」Winkie問我。
「唔緊要呀我地食嘢先啦，我放左工自己去得啦」我話。
「咁好啦...」Winkie話。


「嗯，行啦，去食嘢」

我放左工之後，Winkie話都係唔放心我自己一個，所以陪埋我去買。我地早少少走左，因為啲鋪關得有啲早。
「係喎～你點識到老細嘅？」Winkie好有興趣咁問。
「冇呀，當初我大學嘅時候做intern識到佢嫁，本身都冇諗過同佢一齊」我話。
「哈哈，你就好啦～我地公司不知幾多女仔羨慕你」
「係咩，哈哈..」我明好多人會羨慕，但呢段婚姻我真係不堪回首，如果可以我寧願唔要。我而家成個腦都只係有呀文，一心淨係諗住我點先拎得返同呀文嘅聯絡方法..。唉，咁我呢幾個月點搵到佢....。呢段路我同Winkie傾左陣計，傾落先發現原來佢同我嘅背景好似，慢慢我就同佢熟左。

時間過得好快，眨吓眼我就係法國過左兩個月，呢兩個月我冇一日唔想搵呀文。我冇佢ig，只係有佢電話號碼，但唔見手機之後我連唯一可以搵佢嘅辦法都冇埋，我試過亂search佢ig名又試過搵埋Facebook，但都冇結果。今晚又係孤獨嘅一晚，我自己一個係酒店房。無聊咁坐左係張床，我諗起呀文帶左我去四季酒店，嗰次係我第一次去....。呀文，你過成點呀....，你會唔會已經有第二個，定係都等緊我...。比多少少時間我，你一定要堅持住。呀文，我好想好想見你了.....



想見你 只想見你 未來過去 我只想見你
穿越了 千個萬個 時間線裡 人海裡相依