因為ex，我決定向全世界嘅女人報仇: 決定離婚

返到香港之後我返一返左大屋，我望住我地嘅結婚相，我好迷惘，究竟呢個係咪真係我想要嘅嘢。我望住我地一齊買嘅傢俬，我地曾經好熱戀嘅呢個家，曾經熱情做愛嘅呢張床，而家係我眼中統統都係冇感情嘅死物。我換左件衫，叫司機車我去醫院。

「曉琳..？你返嚟啦？我以為你仲係歐洲」我呀媽問我。
「嗯，我返嚟啦」我話。
「乖...返嚟就好，王生呢..？佢係咪同你一齊返嚟啦？」佢話。我呀媽一直都叫我老公做王生。
「媽.....我有樣嘢一直都好想同你講」
「嗯？做咩啦乖女」
「我......我.....」我講唔出口，我望住媽媽個樣，我好想喊..我忍唔到。如果我講左出口佢一定會叫我離婚...但咁佢嘅醫藥費.....。啲眼淚係我眼框不停咁忍唔住走出嚟，我眼前越嚟越濛.......最後一滴又一滴嘅眼淚滴左落我呀媽張病床。
「乖女做咩喊啦...！」我媽媽捉住我隻手。
「媽......媽.......我...我.....對唔住.......」我真係忍唔到...我一係呀媽面前就好似細路女咁，我嘅谷住左咁耐嘅感情終於一次過爆發哂出嚟。


「冇事啦乖女....冇事」我攬住我呀媽喊到收路到聲。我好耐冇試過係佢面前喊得咁犀利，記得對上一次好似就係細細個呀爸走嘅時候..。今次我都喊左好耐好耐，喊到個人冇哂力咁坐左係地下。我最後都係將所有嘢講哂比我媽媽聽，由老公出軌、打我、到我同呀文嘅故事。由細到大我有咩事都會同佢講，因為單親家庭嘅關係，我地兩個情同姐妹。
「你..點解唔早啲同我講」我媽媽話。
「我怕比唔起你啲醫藥費....我....我連份工都係因為我老公先有..我唔知要點做..媽...對唔住」
「傻女！王生打你咁大件事你緊係同我講！佢敢恰我個女！？仲要學以前個衰佬..上面有另一個女人！」
「可以點算...我真係唔想再同佢一齊，但我真係冇辦法..」我話。
「呀女，我唔一定要住咁貴嘅醫院...仲有我地之前咪儲落左啲錢嘅...。我個女咁叻！點會搵唔到工呢。呀女你聽我講，我係過來人，遇到一個唔好嘅男人真係唔好拖..你唔洗擔心我，我自己搞得掂」佢話。
「媽...」
「得啦你唔洗講，佢打你喎！點仲可以一齊...！」佢話。
「好.....我再睇下啦...」
「媽咪唔識搞啲手續..唔知點幫到你，但你做咩我都會支持你」


「媽......」我又忍唔住喊。
「傻女..唔好再喊啦！再喊唔靚女啦！」佢話。
我係醫院留多左陣就返返屋企，係呢個屋企真係冇咩可以留戀。我坐左係一張大床上面，但一啲都唔及我同呀文訓嗰張細細嘅雙人床暖...。呀文....我又掛住你啦，我已經差唔多半年冇見過你...。你再忍耐多一陣，我好想以一個單身嘅身份去面對你。到時你又係咪會咁愛我？我信你會，因為我都好愛你。

我返香港之後有中學同學約食飯，去到先發現又有朋友派紅色炸彈。
「恭喜你呀！」我話。
「預左你同你老公啦！到時人到禮到呀！」我朋友話。
「哈哈..好呀」我講完先發現唔知點開口同老公講..
「我地咁多個入面最早結婚就係你啦，咁早變做幸福少奶奶～都唔知有幾多人羨慕你咁快上岸」
「哈哈...你而家都搵到個好歸宿呀～」我一啲都唔幸福。


「我條仔變有你咁好～」
「哈哈..」我繼續尷尬笑。嗰晚佢地就一直問我同我老公嘅嘢，但佢地越講我又要扮好幸福咁。返到屋企我沖完涼出房見到我老公....，佢已經好耐冇返屋企。
「你有朋友結婚咩？」
「嗯」我話。
「我同你去」
「你鍾意」
「好，幫我按摩，我今日好攰」佢邊講邊除衫。
「我都好攰」
「快啲，我冇心情同你講笑」佢有少少嬲咁話。
「我都唔係同你講笑」
「哦？你而家開始反抗啦喎，有仔？」
「關你咩事，你會關心我嫁咩？」我話。
「哼，你鍾意點就點啦，我出去」
「哦」我話。



婚禮嗰一日佢真係同我左我去，我地兩個繼續係人地面前扮恩愛。我望住我中學同學同佢老公恩愛嘅樣，我再望一望自己老公...。我渴望嘅婚姻唔係應該好似佢地咁咩？點解最後會變成而家咁樣，我寧願唔要。
「喂～高曉琳，過嚟影相呀～叫埋你老公」我中學同學叫。
「嗯，好呀」我講完我老公都跟住我過嚟，影相嘅時候佢攬住我條腰。係呢一刻我真正發現，佢攬住我嘅時候我只有嘔心嘅感覺，一啲開心同心動都冇。我受夠啦，唔想再係人地面前扮幸福，好辛苦。

我決定左，我要離婚