因為ex，我決定向全世界嘅女人報仇: 被你感動

我坐左係張床上面，個腦一片空白。我有少少慶幸自己拒絕左Nicole，但我又應該點樣同Rachel解釋我同佢又攬又錫....。唉，如果佢知道左一定好嬲，可能分手都似....。我對Rachel嘅感覺已經越嚟越深，就算我個心仍然鍾意Nicole，但我始終為左Rachel而冇同Nicole做到。Rachel係我心目中就好似一個一直扶持住我嘅人，我冇可能放棄佢。佢陪我捱過最低潮，更加唔介意我個心有另一個人。就算呢一刻我個心好亂，但有一點我好清楚，就係我唔會想Rachel唔開心。

我坐左係床諗緊嘢嘅時候，突然間手機響。
「喂？」
「喂？B！我搞掂啦！嘻嘻～你可以過嚟啦，我send個location比你吖」
「嗯，好呀」
「B？你唔開心呀..？」佢話。....女人真係好敏感。
「唔係呀～我而家換衫，乖乖地等我啦～」
「好啦～你慢慢啦，我係床上面等緊你喔..」佢話。
「哈哈，傻妹」我話。聽佢咁講完我個人開心返少少，果然Rachel係我嘅開心果。唉，我都係唔好諗咁多嘢先，好好咁同佢一齊過埋今日先。我換左件衫就搭車去佢send比我嘅location，今次冇揸車去，就當慳返啲泊車錢，始終近排都洗大左唔少。我行入酒店先發覺佢要拍卡先可以上去..然後我發現個傻妹應該都唔記得左呢件事。


「我上唔到嚟呀..要拍卡先上得」我wtsapp Rachel。
「哈哈...係喎！死啦好蠢添..！你等等我」佢話。然後我坐左係lobby等佢，順便send 左個wtsapp比Nicole：

「Nicole...多謝你今日上嚟想同我慶祝，我想等自己冷靜下，再諗一諗先再同你傾。我需要啲時間消化，一時三刻比唔到答案你。我過一排再搵你出嚟好冇？」我岩岩打完段message就聽到Rachel叫我。
「咁專心嘅～做緊咩呀」佢行緊過嚟問。
「冇呀，覆緊wtsapp姐～我地上去啦」我話。
「嗯！」佢笑住咁撓住我隻手行。
「傻妹..」我錫左落佢塊面度。
「嘻嘻～你上到去要合埋眼，我叫你開眼先準開眼呀」
「係～」我講完，電梯已經去到我地住嗰層。我地係條走廊拖住手行，去到門口佢就叫我合埋眼。


我合埋眼，佢拖住我隻手帶我行。突然間..我個腦又諗起Nicole錫我嗰一幕...。屌..！點解我拖住Rachel都諗到Nicole。我一步一步慢慢行上去，行左幾步再擰轉左少少。
「可以開眼啦～」Rachel細細聲係我耳仔邊講。
我打開眼，第一眼見到維港。然後佢佈置左啲led燈同氣球係房，而家岩岩入夜，led燈令到成間房好浪漫。我望間房嘅另一邊，佢將我地嘅相曬左好多張即影即有，掛哂出嚟。我行左埋去，仔細睇每一張相。我地第一次見面打邊爐，係海旁飲酒。有張佢係我地平時食早餐嘅鋪頭偷影我，有張係我地屋企，我記得我同佢講佢嗰日好靚，我好想影低佢。一張我地係寵物公園嘅自拍....，一張我買嘢飲接佢收工嘅自拍...一張又一張屬於我地兩個嘅回憶係我眼前....。成間房都係相...好多好多...甚至乎有好多相我根本唔知佢有影到。我一步一步..慢慢咁睇清楚。每一張相都帶我回想起我地嘅經歷，一幕又一幕嘅片段係我腦海入面浮現。我地雖然唔係一齊左好耐，但好似已經經歷左好多嘢咁。由我地相識、相處、相伴、相愛，統統用相片記載住。我越睇就越眼濕濕.....我個心好比佢觸動到。我諗返起我地決定左一齊嗰一日，諗起當初我地一齊嘅原因。...終於..眼淚忍唔住滴左出嚟。除左係佢感動到我...更加係我滿滿嘅內疚.....我...我一個鐘前先同另一個女人錫......。Rachel....我對你唔住......求下你原諒我....。呢句暫時都只係我嘅內心對白...我冇勇氣去面對，我承受唔起冇左佢嘅風險。但我覺得點都要話比佢知...只不過我唔知道應該幾時講。
「係咪好靚呢！我整左好耐嫁......B..？做咩喊啦...！」佢留意到我喊。
「冇事...冇事....太感動姐..！多謝你呀凝凝」
「嘻嘻！生日快樂～」佢好開心咁對住我笑。
「傻妹.....我愛你..！好愛好愛」我話。
「我都愛你」佢行埋嚟撓住我條頸錫我。
係呢一刻我真真正正感受到佢對我嘅愛..，我曾經以為Nicole先係我最愛，但望住Rachel對我做嘅所有嘢，我冇辦法否認我對佢嘅愛。我而家真係好幸福，好想一世都同佢一齊過。有種感覺好似同佢一齊，就會一直都好開心咁。但係..我都係要解決同Rachel坦白嘅問題。



我唔敢失去佢