Rachel 係夜晚都post左佢同佢同事食飯嘅相,原來佢地慶祝生日,我仲以為Rachel為左避開我而唔同我食飯。咁都好啲,起碼佢唔係有心避開我,姐係我仲有機會追返佢返嚟!第二朝我都係同琴日一樣,keep住同佢講嘢,繼續關心佢。就算佢唔覆我或者hea覆我都唔緊要,我照同佢講嘢。連續呢幾日都係咁:
「唔好飲凍野啦傻妹,你嚟M呀」
「收工未呀傻妹~?」
「今日多唔多嘢做呀?」
「出門記得帶遮呀!今日會落雨」
「唔好太夜返呀,小心啲~」
「我食飯先啦~愛你」
一句又一句我地平時嘅對話,我都會繼續講。

「嗯」


「好」
「知道」
「好呀」
「我會」
「好啦」
「Ok」呢啲回覆我都睇到習慣哂。我刻意冇去提返一啲令佢唔開心嘅嘢,只係慢慢關心佢,每一日都搵佢。我feel到佢其實開始心軟,因為由一開始佢隔幾個鐘先覆我一兩個單字,變到後尾間唔中秒覆,多左幾隻字。再去到而家佢已經會主動搵我,關心返我,我講知佢已經冇再嬲我。佢掛住我,呢樣嘢我可以肯定。因為,我都好掛住佢...

我地咁樣嘅狀態過左一個禮拜。今日,我終於忍唔住,我知道佢都冷靜得七七八八。再唔搵佢,就會由冷靜變到冷淡、冷戰。我唔想冇左佢...,所以我決定要諗辦法氹返佢。我請左一日假,就係為左搞場大龍鳳氹返凝凝。我早幾日已經訂左好兩塊識閃嘅led燈牌再加燈串,老土但有效。我今朝就係去左拎,然後中午再去拎花同買餸諗住煮佢鍾意嘅嘢比佢食。返到屋企我放低哂啲嘢,準備開始煮飯仔。我之前未試過煮呢樣嘢,所以有少少驚fail...。我跟住食譜咁買哂啲材料同調味料,將部ipad放係煮房位望住嚟做。我望一望鐘,仲有時間..!佢未收工。好...!呀文...你得嘅....死就死啦。好..乾蔥.....花椒油....睇下先..一茶匙嘅糖..一茶匙鹽.....。先斬雞.....屌..佢又唔教埋點斬。冷靜...好,我上左youtube search「斬雞」,終於比我跟住做到!臭雞,今次仲唔斬撚死你!為左Rachel,我忍。好...之後中火煮熟啲雞先.......。我一直跟住個教學做,應該唔會有啲咩錯...。但我發現我比想像中煮得慢左好多,可能真係平時冇成日煮飯,我啲動作好生硬。我再望一望鐘,仆街..過得咁快嘅。我嗱嗱臨煮埋啲嘢然後將佢地放哂入個飯盒度。本身我諗住叫佢上嚟我屋企我煮比佢食..,但係諗到如果佢唔上嚟我就哂氣,所以都係煮外賣比佢食。

我搞掂哂啲嘢,佢都岩岩放工。我wtsapp試探下佢..


「凝凝!放工啦?」
「嗯,放左啦」佢話。
「好啦,你..返屋企食飯?」
「係呀,同左呀媽講」
「好..」我話。
「做咩?」佢問。..仲洗問,緊係想同你食啦,但今日既然我要去佢樓下,咁佢係屋企食就照住劇本咁去。
「冇呀~你返到屋企同我講啦,小心啲呀」
「嗯,你都小心」
「好~」我講完就將啲嘢入哂袋,然後等佢同我講佢返左屋企。過多半個鐘,佢終於返到。我將啲嘢放哂入我架車度,然後將led燈同花放係車尾箱,再揸去佢屋企樓下。揸到佢樓下我拎住兩個大嘅led燈牌行去佢幢樓下面,路過嘅人都望住我...,但我氹女又點會怕柒。我終於去到佢窗口下面,我將led燈打開,然後打比Rachel.....



「嘟.....嘟..........嘟.....嘟.......喂..?」佢聽!
「喂...?凝凝」
「做咩呀?」佢有少少cool。
「你...得唔得閒..」我問。
「做咩?」
「冇呀,我驚阻住你」
「你講呀..」
「你係房?」
「係呀,做咩姐..?」佢話。
「你望出窗外面~」我講完就見到佢窗口有個影慢慢行過去,然後我見到佢個頭。我先揮一揮手比佢見到我,然後我話:
「凝凝,對唔住」

「我愛你,好愛好愛」

就這樣 愛你 愛你 愛你 隨時都要一起


我喜歡 愛你 外套 味道 還有你的懷裡
把我們衣服鈕扣互扣 那就不用分離
美好愛情 我就愛這樣貼近 因為你