「凝凝,我約左啲大學同學食飯呀~Eric佢地」我話。
「好呀,幾時?」
「下個禮拜五,你得唔得呀?我諗住順便派埋帖」
「可以呀!我都好似好耐冇見過佢地」佢話。
「係呀,我同佢地講聲先」

到左下個星期五,我一放工就接左Rachel 一齊去旺角食飯,老實講我有少少緊張,始終咁耐冇見過呀婷。我唔知會唔會好尷尬,話哂我地曾經經歷過啲唔開心嘅事。我都唔知Rachel見到呀婷會係點,我冇特別同佢講呀婷會係度,但我曾經同Rachel講我嘅過去。我拖住佢隻手,兩個人行緊去間餐廳。
「我地早少少上去攞位?」我望一望錶,仲有十五分鐘,然後問Rachel。
「可以呀~」佢多數都冇咩所謂,我地等緊𨋢上去。
「你記唔記得呢,當初我第一次見你,一打開𨋢門你就幫我鬧Sophia」我笑住同佢講。


「緊係記得啦..!我嗰陣完全冇諗過自己會咁...,而家諗返起超尷尬」
「哈哈,嗰陣真係嚇親我」
「你會唔會覺得我好惡嫁...!」佢問我。
「嗰陣真係覺得嫁..,不過都覺得你好好」
「係咪嫁...」
「你嗰陣係咪已經鍾意我啦?」我笑住問,然後行入𨋢。
「鍾意你嗰頭呀..!我睇唔過眼炸」
「哈哈係啦係啦」
「衰人..!又恰我,嫁左比你咪成日比你恰!」佢話。
「邊捨得恰你~」



叮~一開門,.....呀婷..?屌...又咁岩嘅。
「Hi..」我同呀婷打招呼。
「Hi...好耐冇見啦」佢笑一笑,但feel到佢都有少少尷尬。
「佢係Rachel呀..」我介紹Rachel比佢識。
「Hello,我叫呀婷」呀婷同Rachel講。
「哦...你好..」Rachel好似有少少唔開心。
「err..你攞左位啦?」我問呀婷。
「嗯,我攞左啦」
「好..」我講完氣氛又再靜左落嚟。


「我落去接一接人先..」呀婷話。
「好呀」我話。呀婷落左去之後我feel到氣氛有啲唔好。
「佢就係呀婷..?」Rachel問。
「嗯...」
「當初我岩岩識你你講嗰個呀婷?」
「係呀」
「你唔同我講佢嚟嘅」佢有少少嬲。
「我..我本身想講」
「但你冇」
「凝凝...」
「你至少都同我講聲呀...」佢話。
「係...,Sorry...我應該講」
「算啦,你鍾意講先講啦」佢發晦氣。
「凝凝....」我想氹佢嘅時候,Chloe同佢男朋友岩岩上到嚟。然後大家陸陸續續都到,最後嚟嘅係呀婷同佢男朋友。佢男朋友個樣都唔算差,個感覺幾nice。不過唔知點解對住佢硬係熟唔到嗰種。可能因為我地係襟兄弟...,講笑。Rachel成餐飯都有少少嬲,但我都冇時間氹佢。成班人係度,我唯有靠派帖嗰陣當氹佢。
「係喎..咁耐冇見大家,我有禮物送比你地」我話。


「哇,你十年都唔送一次嘢,唔方好嘢啦」Eric話。
「好,一人一封」我起身派帖比大家。
「哇!~」大家哄動左一陣。我派比呀婷嘅時候尷尷尬尬笑左一笑,佢都對住我笑一笑,feel到係祝福我。
「由今日起,你地要叫佢呀嫂啦~」我望一望Rachel,然後同大家講。死啦,Rachel好似真係嬲..,佢勉強笑左笑就收返笑容。
「恭喜哂~!」

食完飯之後我揸車同佢一齊返屋企。
「仲嬲緊呀...?」我停左係紅綠燈前面。
「我冇諗過你會唔講」
「我唔係有心嫁...」我話。
「咁係點..?」
「我唔知點開口..」
「咁遲啲有咩你都瞞住我,因為唔知點開口?」佢望住我對眼講。我有少少心虛,突然間諗起Nicole。
「唔係呀...」我逃避左佢眼神,扮專心揸車。
「算啦」


「凝凝..」
「我唔想同你講嘢住..」
「...」每次佢話我唔想同我講嘢係真係唔想,我可以做嘅嘢就只有等。我冇諗過佢會嬲咁耐,佢應該係嬲我呃住佢冇同佢講。對唔住...我連Nicole呢單嘢都呃左你...,我係錯嗰個,更加唔會怪佢嬲我。返到屋企佢都係冇講嘢,只係靜靜地沖涼。我想幫佢吹頭佢都唔比,唉..點解我會唔同佢講。我返上床碌手機,賢狗無啦啦搵我。

「喂屌!!我岩岩見到Nicole」原來佢九點幾就搵左我,但我冇覆到。
「下...真咩?」我覆佢已經係十一點。
「我肯定係佢!係銅鑼灣ikea,佢隔離仲有個男人。但我唔知係唔係男朋友定咩,佢地又冇拖手」佢覆我。
「屌...!你肯定?」
「肯撚定!」
「...咁撚癲,咁你有冇叫佢」
「屌,我想追上去嘅時候幾個肥婆行過,頂撚住左條路」佢話。
「....好」....Nicole..?個男人應該係佢條仔。唔掛得當初就咁走左去...,或者我根本唔重要,定係佢報復我。有少少興幸我揀左Rachel..同興幸自己瞞住佢,唔係我真係會失去哂兩個。但陰謀論咁諗,如果Nicole同Rachel講我地嘅嘢咪仆街..?應該唔會嘅....,唉,又好撚煩。Rachel吹完頭入左房粒聲都冇出就訓左,我唯有熄燈,同佢一齊訓。

呢一晚,我地兩個人同床,背對住背,各自有自己嘅諗法。Rachel因為我冇講呀婷嘅嘢而嬲,我因為賢狗講左Nicole嘅嘢而煩。呀婷,Rachel,Nicole,我。好似所有嘢冥冥中自有安排,我唔知我嘅命運會係點。但而家只可以繼續向前行,好好愛Rachel。



得不到多麼好當得到不知怎算好
奢侈的一聲天荒地老 如何能抵擋當中誘惑 誰更好

一起會鬧情緒 分開了為何依偎生命裡
誰是我最愛的應該一個應該三個應該數到像流水
數數到盡頭終此一生之旅 尚有幾多新伴侶