我娶左個台妹做我老婆啊！: Chapter 27

入到去，我同嘉欣首先向同事們打聲招呼。至於裡面有咩內裡乾坤？答案就係林林總總既顯示屏，同事們基本都會並排而坐，分別負責停機位編配、行李輸送帶編配、停機坪及保安工作。前排既既同事主要就負責Airside同Apron既工作，中心前方設有大型顯示屏，比同事清楚掌握行李處理系統、天氣雷達圖、禁區圖影像等資訊。換句話講，基本上一定要對睇住個天做人，以及要識隨機應變。至於我地⋯⋯亦都要時時刻刻要同呢到既同事有緊密聯系，以便一旦發生事故，大家都能夠即刻協調去解決問題。

中心另一方設有機場緊急應變中心，當遇上颱風、意外等突發情況，相關職員會係呢到開會，商討航班編排以及維持機場正常運作。由聯繫空中航班到管理機場地面事務，職員既工作可謂集「天地」於一身。





而當值既經理Carrie見到我同嘉欣，就好熱情咁向嘉欣逐一介紹呢間「赤鱲角公司」既大腦。而我地都認真去聽Carrie講解，除左令嘉欣可以對呢到有一個基本既認識之外，亦都係令自己可以溫故知新，可以更加熟記呢到既運作。突然間Carrie就攞左我身上既Walkie，就教嘉欣點樣可以唔使經過我就可以同呢邊聯絡。





參觀完之後，Carrie因為有Duty在身，於是我就問佢借兩件反光衣同耳塞，就同嘉欣出Apron，而Carrie都好識做，叫佢下屬Ashley去車我地。而今次我地要坐既引導車就係寶馬i3。Ashley係同我一齊考入機管局。不過佢已經結左婚，做左人地既媽咪。當然，嘉欣同Ashley即刻扮到好熟，完全冇將我放係眼內。喂喂喂我好似係你既師傅喎！



為左比嘉欣更加熟悉「赤鱲角公司」既Apron，我就提議比嘉欣同Ashley一齊坐。而Ashley都好比面，好詳盡咁樣介紹到底我地如果出到Apron要點樣做，揸車到底要用咩速度等等，唔知點解以前實習嗰陣，係Apron揸車會好悶，完全冇咩笑料可言。只係想快啲完晒Duty就算。

我地三個就係Apron行左個圈，而控制塔由於我地個Permit入唔到去，所以只係係外圍行左一陣就返去停機位就落車。臨落車之前，我同Ashley就叮囑嘉欣一定要戴耳塞。

「點啊？好唔好玩啊？」Ashley問。





「幾好啊！原來香港個Apron係咁靚！」嘉欣話。

「Apron再靚點都唔夠溫嘉欣小姐靚。」我打趣地講。

「你去死啦！攞本小姐同Apron比？」嘉欣又對我打罵，而Ashley就係到食花生。

我地三個係到有講有笑，而嘉欣都好識做，知道係Apron做野要遵守規矩。不過個傻妹係台灣都係做呢行，如果唔識既話就唔會過到黎呢到啦！反正，根據規定。世界各地既民用機場要遵守既野都係大同小異。唔好當嘉欣唔識架！

「不如⋯⋯我幫你地影張相啦！」Ashley話。





「好啊！」我同嘉欣異口同聲地話。

於是我地兩個就一齊企係架引導車左右兩側⋯⋯等緊Ashley影相。就係咁我同嘉欣一齊On Duty既合照就誕生左啦！

由於係我地身邊既飛機要準備起飛，為免令到佢地Delay，於是我地三個就即刻上引導車返去Terminal。