我娶左個台妹做我老婆啊！: Chapter 34

返到去，由於早幾日上頭通知左嘉欣件制服已經有得攞，所以佢就要同我地一樣，要著返制服On Duty。

話時話，嘉欣既制服look真係好搶眼，加上佢親切既笑容，亮麗既外表，迷人既身材，清秀既氣質，搞到我對佢有啲意亂情迷。佢呢個look就好似上天派落凡間既天使，黎拯救我呢個平凡既世人。

溫嘉欣小公主，點解你可以咁靚架？


「做咩咁樣望住人地喎？」嘉欣嬌嗲咁問我。

「因為你靚囉！！」我好曖昧咁講。



「唔靚！」嘉欣話。

「嘻嘻！行啦，我地要巡Terminal啦！」我話。

呢個時候，Sandy同Mandy就過左黎，見到我同嘉欣係到就奸笑。我心諗大家同事唔使咁既。好彩我冇向大家講話嘉欣同我一齊住，如果唔係我肯定會日日比人話以返工為名，溝女為實。

「嘩Leslie，你又同Ally係到⋯⋯⋯⋯」Sandy話。

「咩喎？」嘉欣話。



「你兩隻野唔使做咩？」我話。

「唔係啊，我地兩個岩岩返工咋！而家去巡Terminal。」Mandy話。

「不如我地一齊行囉！」嘉欣話。

「唔使、唔好、夠啦、多啦！你同Ally姐姐慢慢Happy Happy啦！」Sandy同Mandy異口同聲地話。

呢兩姊妹真係呢⋯⋯搞到我真係啞口無言、無話可說。嘉欣就無視我既苦況，係到食花生。



我同嘉欣就出去Terminal巡邏，而Sandy同Mandy就留係Office處理文書工作。呢個時候，我地個Walkie收到Call，原來UO Counter有旅客不適，要求我地去提供協助。

一去到，我地見到有個旅客面青口唇白，呼吸困難咁訓左係地下。睇黎真係冇左心跳同Pulse。當遇著呢啲情況，我就叫嘉欣去打999同該名旅客既同行者及地勤人員詢問咩情況，及叫其他同事去攞AED，萬一救護員未到嗰陣，我地都盡量可快幫傷者施救，等佢送院前仍然有生存機會。

呢個時候，Andy同佢兩個機場特警同事就過左黎，我就向佢地講解左情況，而佢地就好識做，就叫其他人盡量退後，留返個Area比我地幫傷者進行急救。

我同Andy一邊幫傷者進行心外壓，一邊用AED去電擊傷者。不斷來來回回地做⋯⋯幸好皇天不負有人，當我地進行急救到Round 10嗰陣，個傷者終於回復心跳。我同Andy、嘉欣都鬆一口氣。

過左一陣，救護既同事過左黎接走傷者上救護車去醫院做一個詳細既檢查，該名傷者就有一名家屬同行，雖然呢個旅客冇得坐飛機離開香港，但係總好過係冇左條命。

而其他旅客就如常登機，同事們都按章工作。得返我、嘉欣同Andy係到。而Andy既下屬都好識做，自動自覺咁行開。

「好野啊，又救返條人命。」嘉欣話。



「都係好彩咋，靠你老公囉！」Andy話。

「佢就想啦 ！」我笑住咁講。

「慳啲啦屌你，我先唔會嫁比你架！」嘉欣又對我打罵，同時又對我伸脷。

「哈哈，講返正經野啦！你地係咪去Samuel同Roista既婚禮啊！」Andy話。

「係啊，阿Sir你都去架可？」我話。

「當然啦！你唔係唔帶Ally去啊嘛？」Andy奸笑。

「你放心啦！我一定會痴住佢去既嘻嘻！」嘉欣話。

「好啦到時見啦！」我話。



Andy就返去會合佢既下屬，而我同嘉欣就繼續On Duty。呢個時侯我老細Jeff就叫我同嘉欣入去佢Office，心諗唔係好事黎。

於是我同嘉欣就入左去⋯⋯

「Leslie，Ally你地入黎啦？」Jeff問。

「係啊！有咩吩咐呢？」Ally問。

「搵你地兩個，有個重要任務交比你地！上邊大老細話一定要交比你地做。」Jeff話。

經過一連串長話短說後，原來機管局要拍一條Vlog黎做宣傳。大老細話點到名一定搵機管局既職員去主演今次既作品，經過多番之遴選。就決定叫我同嘉欣做本作品既男女主角。我心諗機管局咁有錢，點解唔搵出邊啲明星去拍呢？再唔係搵啲Youtuber同KOL去拍都得架？係都要搵我同嘉欣拍呢？實在不思費解。

既然上面傳達落黎既Order，我地呢啲做細嘅當然冇得Say No啦！想搏鬧咩？



內容大致如下，就係講以前有一對青梅竹馬小朋友，係舊機場道別，然後N年後，呢對小朋友已經長大成人，成為一對夫妻，拖住子女係新機場到坐飛機。

喂喂喂，咁即係將我同嘉欣既故事搬上大銀幕？？？