靈魂早就已經飛走,心機都冇埋。

回程嘅時候,我都唔知點樣翻去。

可能係肉身依照記憶咁行,反正自我意識就冇架啦。

不過,呢件事應該會令我更加注意自己嘅行事方式,始終都係溫和啲比較好。

我都唔想成為一個滿手鮮血嘅人。



墜落?依家未係時候。

依家係要幫大家尋回希望。

係,係希望。

—————
「我明咗,咁佢係邊個?」

「頂你明知我唔會答架啦,我驚我諗起佢個名我就會想喊。



我未有喺呢個時刻陪佢分擔壓力,又未有同佢交流傾談。依家佢又下落不明,咁樣我要點做?」

「書都有寫啦,「別難過,有我在」啊,兄弟我幫你咪得囉。」

「嗯?真嘅?」

「係啊,唔好咁婆媽啦,我幫你啊。你知唔知佢會喺邊度出現?」

「佢屋企住觀塘⋯」



「唔係啊嘛。咁啱得咁喬?」

「就係咁啱啊⋯」

「認真問你,如果真係搵到佢,你會點?」

「咁梗係開心到癲啦,我會默默咁喺佢左近。」

「咁,如果係失去咗生命嘅佢呢?」

「我會陪佢。」

「咁,如果,佢成為咗嗰啲嘢嘅一份子呢?」我哽咽了,我不敢相信自己會問出這種顯示人性兩面的問題。



「我會陪佢,直到世界終結。即使,佢唔再知道,唔再感受到。

即使,佢永遠唔會知道係邊個同佢走到各自嘅世界盡頭。

我會再一次喺佢耳邊講愛佢一萬年。即使,佢聽唔到。」

情緒就似江海一般澎湃。

眼淚就似水流一樣滔滔不絕。

我地兩個男子漢,都流出咗各自嘅男兒淚。

並非易事啊。

更加可笑嘅係「故事的終結,早已注定沒法制止」。



如果個天要你happy ending,你先可以去盡情投入感情。

不過,sad ending,都未嘗少見。

從一開始,走向就早已定立,只等待請君入甕。

開心,還是傷心,都要行落去。

總之,未來見啦!

「嗱,你話架,就憑你嘅誓言,我就已經冇辦法唔幫你。」

回憶中,我同阿樂嘅對話,再次上腦。



回神回神。

「啊—頭仲係好痛。」我敲敲自己的腦袋,感覺有爆炸的機會。

唔夠膽想像腦漿爆出嚟嘅一刻。

有夠核突。

「幾..幾點啦?」我不知向誰發問着。

「11點啦,你醒啦?」一把熟悉不已的聲音在我耳邊悠然起舞。

「係你啊?原來都咁晏啦,搞到唔知時間添。係啦,頭先發生咩事?」

「吓?頭先你咪同隔離班個阿樂一齊翻嚟囉。你好勁啊!又救到一個人翻嚟。」原來女神早已在我身邊。



「邊度勁啊⋯我⋯成日都係喺重要時刻先至甩轆。我連想救嘅人,都救唔到,我真係好冇用。」

「邊度係啫,我知你盡咗力⋯」說到這裏,她已眼泛淚光,顯然還是無法釋懷。

我不該再次提起的,但我也不能原諒自己。

正常嘅,自己嘅親人已經離去,邊個會接受到?

仲要係咁突然。

「嗰次唔係你嘅錯。你都講咗佢地兩個嗰時嘅事俾我知,呢個係佢地嘅選擇。」

「唔係咁架,如果我早啲出現喺嗰度,或者佢地唔使遭到感染者嘅毒手!」

我突然醒起,我會遲咗到嘅原因,並非其他事,正正係救緊其他人。

又係一個該死嘅選擇題。

我係咪唔應該亂咁行?


唔係。

咁我周圍行咗啦,我見到第二個人,

咁我應該救邊個?

呢次嘅結果已經同我講咗冇得兩邊都救。

救兩個人係咪好過救一個人?

但冇俾我救到嘅人呢?佢都好無辜架喎。

「或者,佢會俾另一個人救走呢?」

L嘅出現,的確及時。
已有 0 人追稿